Taniel
Kapas akom
I. Iten ei puk: Taniel, pun mine a mak lon, püsin pworausan me künaan. Wewen ei it Taniel: Kot ai soukapwüng.
II. Chon makei ei puk: Taniel
III. Itelapemongen ei puk: Kot a nemeni fanüfan pwal mine a fis ngeni aramas fansoun meinisin.
IV. Kapas aüchean ei puk: Usun än Kot tufich me manaman a pwä lon ekewe mwün fanüfan tori fansoun sopolan.
V. Masouen ei puk Taniel: Ei puk a kinikinitiu lon ruu kinikin watte:
1. Pworausen Taniel me chienan kana chon oola mi pwora ngeni chon oputer pokiten ar lükü o aleasochis ngeni Kot. Ekei pworaus ra fis lon fansoun mwün Papilon me Persia.
2. Pworausen künään Taniel lon ekoch sokun lios mi pwärätä fefeitän me turun ekoch mwü watte, poputä seni ewe mwün Papilon. A pwal osuni turun ekewe meilap mi ariaföüü aramas me än nöün Kot kewe aramas win. Seni lon ei puk Taniel a wor ekoch wokisin Jesus a nöünöü lon an afalafal.
VI. Tettelin masouen ei puk:
Taniel me chienan kana 1.1–6.28
Künään Taniel kewe 7.1–8.27
1. Ekewe föman manmwacho 7.1-28
2. Ewe ätemwänin sip me ewe ätemwänin kuuch 8.1-27
Än Taniel iotek 9.1-19
Kapasen osuni usun ekewe fik wik 9.20-27
Künään Taniel usun ewe fansoun sopolan 10.1–12.13
1
Taniel me chienan kana
1.1-21
1 Lon aülüngatin ierin mwün Joiakim ewe kingen Juta, Nepukatnesar ewe kingen Papilon a feito Jerusalem o maun ngeni. ✡2.King 24.1; 2.Kron 36.5-7 2 Iwe, ewe Samol a asechalong Joiakim ewe kingen Juta lepöün Nepukatnesar. Nepukatnesar a pwal angei ekoch pisek seni Imwenfelin Kot o uweerela lon ewe fanü Papilon lon imwen an we kot, pwe epwe iseis lon an lenien pisek mi aüchea. 3 Mürin, ewe king a allük ngeni Aspenas ewe meilapen chon tümwünü imwen ewe king, pwe epwe emwenato ekoch aramasen Israel seni familien ewe king, pwal seni familien aramas mi tekia, 4 alüal esap ter inisir, ra äteöch me mirit, ra tipachem o wewekai, ra pwal tufich ngeni ar repwe angang lon imwen king. Iwe, ekewe alüal repwe wisen kaiö maken Papilon me fosun ie. 5 Iwe, ewe king a ngeniir wiser mongö seni püsin anan mongö mi anö me ünüman wain iteiten rän. Repwe kaiö lon ükükün ülüngat ier, mürin repwe angang ngeni ewe king. 6 Iwe, ekoch me lein ekewe alüal seni ewe ainangen Juta iter Taniel, Hanania, Misael me Asaria. 7 Nge ewe meilapen chon tümwünü imwen ewe king a siwili iter: Taniel a aita ngeni Peltesasar, Hanania a aita ngeni Satrak, Misael a aita ngeni Mesak, nge Asaria a aita ngeni Apetneko.
8 Nge Taniel a amolätä letipan pwe esap alimengaua ren enen ewe king mongö mi anö me ünüman wain. Iei mine a tüngor ngeni Aspenas, epwe mwüt ngeni pwe esap alimengaua ren ekewe mongö. 9 Iwe, Kot a angang lon leluken Aspenas pwe a eäni ümöümöch me tong ngeni Taniel. 10 Iwe, Aspenas a üreni Taniel, “Üa niueiti ewe king ai we samol, pun a allük usun mine oupwe eni ika ünümi. Are epwe küna pwe oua kichüchü seni pilomi alüal, epwe tongeni nieila.” 11 Mürin, Taniel a churi ewe chon souwan, ätewe a fil me ren Aspenas pwe epwe tümwünü Taniel, Hanania, Misael me Asaria. 12 Iwe, Taniel a üreni, “Kopwe sotuni noum chon angang lon ükükün engol rän. Kopwe chök amongöökem iäsäi o aünükem koluk. 13 Wesin ekewe rän kopwe anönöfengeni inisim me inisin ekewe alüal ra mongö seni enen ewe king mongö mi anö. Mürin, kopwe föri ngenikem ükükün mefiom.” 14 Iwe, ewe chon souwan a mwüt ngeniir ar we tüngor o sotuniir lon ükükün engol rän. 15 Nge wesin ekewe engol rän a pwä pwe inisir a pöchökül o aümanau seni inisin ekewe alüal mi mongö seni enen ewe king mongö mi anö. 16 Iei mine ewe chon souwan esap chüen ngeniir ener mongö mi anö me ünümer wain, nge a chök amongöör iäsäi.
17 Iwe, Kot a fang ngeni ekewe föman alüal mirit me tipachem me sokun silelap lon pekin puk me weweiti tipachemen aramas. Nge Taniel a wor an tufichin awewei sokun tan me künään aramas. 18 Iwe, lupwen a tori fansoun ar repwe feito fän mesen ewe king, usun a fen allük me mwan, Aspenas a emwenato ekewe alüal meinisin mwen Nepukatnesar. 19 Iwe, ewe king a kapas ngeniir, nge esap küna eman leir a wewe ngeni Taniel, Hanania, Misael me Asaria. Iei mine ra fil pwe repwe angang ngeni ewe king. 20 Lon sokopaten tipachem me silelap meinisin ewe king a ais ngeniir won, a küna pwe ekewe föman alüal ra silelap fän engol lap seni ekewe soutipachem me ekewe sourong mi angang lon unusen mwün. 21 Nge Taniel a nonom lon imwen ewe king tori aeuin ierin mwün Sirus ewe kingen Persia.