10
Künään Taniel me ünükün ewe chanpupu Tikris
10.1–11.1
Lon aülüngatin ierin mwün Sirus ewe kingen Persia, eu kapas a pwä ngeni Taniel mi pwal iteni Peltesasar. Ei kapas a let, a pwal pwärätä usun eu fansoun riaföü watte. Iwe, an weweiti ewe kapas a tori me lon künan.
Lon ewe fansoun, ngang Taniel üa letipeta lon ükükün ülüngat wik. Üsap mongö mongö mi anö, üsap fokun ochoch fituk ika ün wain, üsap pwal epitiei tori wesin ekewe ülüngat wik. Iwe, lon rüe me rüanün ränin ewe aeuin maram lon ewe chök ier, üa ütä ünükün ewe chanpupu watte itan Tikris. Nge lupwen üa nenela, üa küna eman mwän a üföüf üf mi pwechepwech, nge ririn lukalapan a för seni kolt mi mürina. Inisin a usun chök ewe fau aüchea itan kirisolait, won mesan a usun chök fifi, lon mesan a usun chök pulopulen töl, pöün me pechen ra usun chök piras mi meriweriw, nge mwelian a usun chök leüömongun eu mwicheichen aramas. Pwär 1.13-15; 2.18; 19.12 Iwe, ngang chök üa küna künaei we, nge ekewe mwän mi etiei resap küna. A toriir eu niuokus watte, pwe ra süla o op. Iwe, ngang chök üa nom o küna künaei we mi lapalap. Esap chüen wor pöchökülei, won mesei a fokun wopwechepwechela pwe esap wor eman a sileniei, üa pwal fokun apwangapwangala. Nge lupwen üa rongorong an kapas, och masaroch a toriei, pwe üa chapala lepwül.
10 Mürin, pöün eman a atapaei o alisiei pwe üa tongeni aitenges o aüpwäsuk, nge üa fokun chechech. 11 Iwe, ewe chon läng a üreniei, “Taniel, en eman mwän mi watte chenum me ren Kot. Kopwe ütä o aüselingöchü mine üpwe ürenuk, pun iei Kot a tinieito reöm.” Nge lupwen a kapas ngeniei, üa ütä fän chechech. 12 Iwe, a pwal üreniei, “Taniel, kosap niuokus, pun Kot a aüselinga om tüngor seni lon ewe aeuin rän lupwen ka atekisonok fän mesen om we Kot, pun ka fokun mochen weweiti künaom we. Iei üa feito pwe pälüen om iotek. 13 Iwe, ewe anüsorun ewe mwün Persia a apetiei lon ükükün rüe me eu rän. Nge Mikael, eman lein ekewe samolun chon läng, a feito o alisiei, pun üa aleeman ikenan ren ewe anüsorun mwün Persia. Pwär 12.7 14 Iei üa feito pwe üpwe aiti ngonuk mine epwe fis ngeni aramasom lon kan fansoun repwe feito, pun künaom a pwärätä usun.”
15 Iwe, lupwen a üreni ei, üa nenetiu lepwül o fanafanala. 16 Mürin, ewe chon läng mi lapalapeni lapalapen eman aramas a atapa tinawei pwe üa tufichin fos. Iwe, üa üreni ätewe mi ütä mwei, “Ai samol, künaei we a fokun ariaföüüei, üa pwal fokun apwangapwang ren. 17 Ifa usun, ngang noum ei chon angang üpwe tongeni kapas ngonuk ai samol? Pun esap chüen wor pöchökülei, a pwal weires ai ngasangas.”
18 Mürin, ewe chon läng a atapasefäliei, iwe, üa pöchökülsefäl. 19 Iwe, a apasa, “En eman mwän mi watte chenum me ren Kot. Kosap niuokus. Kinamwe epwe toruk. Kopwe apöchökülok o apworai letipom.” Nge lupwen a kapas ngeniei, üa pöchökülsefäl o apasa, “Ai samol, kose mochen kopwe kapas ngeniei, pun ka apöchökülaei.” 20 Mürin a üreniei, “Ifa usun, ka silei popun ai feito reöm? Üa feito pwe üpwe aiti ngonuk mine a mak lon ewe puken let. Nge üpwe pwal müttir liwinla pwe üpwe fiu ngeni ewe anüsorun Persia. Iwe, lupwen üpwe wes me fiu ngeni, ewe anüsorun Kris epwe feito. 21 Esap wor eman epwe alisiei le fiu ngeniir pwe Mikael chök, ewe samolun chon läng mi wisen tümwünü chon Israel.

10:6: Pwär 1.13-15; 2.18; 19.12

10:13: Pwär 12.7