1 Iwe, ewe chon läng a pwal üra, “Lon ewe fansoun Mikael ewe samolun chon läng kana, ewe chon peni aramasom, epwe war. Epwe wor eu fansoun riaföü esamwo fis seni me lom, lupwen mwü rekärän poputä tori ei fansoun. Nge lupwen epwe tori ei fansoun, aramasom meinisin mi mak iter lon nöün Kot we puk repwe küna manau. ✡Mat 24.21; Mark 13.19; Pwär 7.14; 12.7 2 Iwe, chomong lein chokewe mi mäla repwe manausefäl. Ekoch repwe eäni manau esemüch, nge ekoch repwe eäni itengau me säw esemüch. ✡Ais 26.19; Mat 25.46; Joh 5.29 3 Iwe, ekewe chon mirit repwe meriweriw usun meriweriwen läng, nge chokewe mi aiti ngeni chomong aramas usun ar repwe föri mine a pwüng repwe titin usun fü kana tori feilfeilachök. 4 Nge en Taniel, kopwe tukumala ekei kapas, kopwe numala ewe puk o fötala tori fansoun sopolan fanüfan. Iwe, chomong aramas repwe sotun kütta wewen, nge ar weweiti epwe lapala.” ✡Pwär 22.10

5 Mürin, ngang Taniel üa küna pwal ruoman chon läng, eman a ütä epek ewe chanpupu, nge eman epek. 6 Iwe, eman leir a aisini ewe mwän mi üföüf üf mi pwechepwech o ütä asen ewe chanpupu, “Ifa ükükün fansoun tori ekei mettoch mi amwarar repwe wes.” 7 Iwe, ewe mwän mi üföüf üf mi pwechepwech o ütä asen ewe chanpupu a aitietä läng pöüifichin me pöüimöngün. Üa rong pwe a akapelü Ewe mi Manau tori feilfeilachök o apasa, “Epwe la ülüngat esop ier, nge lupwen manamanen ewe mi ariaföüü ekewe aramas mi pin epwe wes, ekei mettoch meinisin repwap pwönüetä.” ✡Pwär 10.5; 12.14 8 Iwe, üa rong mine a apasa, nge üsap weweiti. Mürin üa ais, “Ai samol, epwe met sopolan ekei mettoch?” 9 Nge ewe mwän a pälüeni, “Taniel, kopwe feila, pun wewen ekei kapas epwe monomon o kaopola tori fansoun sopolan. 10 Chomong aramas repwe limelim pwe repwe unusen limöch o mürina. Nge ekewe chon föföringau repwe föri mine a ngau. Esap wor eman leir epwe wewe, pwe chokewe chök mi mirit. ✡Pwär 22.11 11 Nge seni ewe fansoun ewe asor mi fis iteiten rän epwe ükütiu, pwal ewe mettoch mi anioput a afeiengau epwe nom ükükün engeröü rüöpükü tiwe rän repwe la. ✡Tan 9.27; 11.31; Mat 24.15; Mark 13.14 12 Feiöchün ewe aramas epwe witiwit o awesi ükükün engeröü ülüpükü ilik me limu rän. 13 Nge en Taniel kopwe likitü tori sopolan. Mürin kopwe mäla o manausefälitä, pwe kopwe angei wisom lesopolan fansoun.”