Nöün Paulus Toropwe ngeni ekewe Souläng lon
Efisos
Kapas akom
I. Chon makkei ei toropwe: Ewe soukünö Paulus.
II. A mak ngeni iö me fansoun a mak: Ngeni chon ewe mwichefel lon Efisos, eli a mak me lon imwen fötek lon Rom lefilen ekewe ier 60 me 64 A.D.
III. Itelapemongen ei toropwe: Chon mwichefel repwe eu chök lon Kraist.
IV. Kapas aüchean ei toropwe: Esap wor sokofesenin chon Juta me chon lükün Israel mi lükü Jesus.
V. Masouen ei toropwe: Nöün Paulus toropwe ngeni chon ewe mwichefel lon Efisos a akomwen apworausa usun än Kot akot fän iten an epwe achufengeni förian meinisin mi nom läng me won fanüfan pwe repwe nom fän nemenien Kraist. (1.10) A pwal tüngor ngeni nöün Kot aramas pwe repwe manau lon ei sokun manau mi fich ngeni ei akot mi lapalap fän iten atipeeufengenin aramas meinisin won fanüfan ren ar eufengen me Kraist Jesus.
Lon aeuin kinikinin ei toropwe Paulus a awewei aüchean eufengen ren an kapas usun än Kot ewe Sam a filätä nöün aramas, usun an amuserela o angaseerela seni ar tipis, pwal usun än Kot apwönüetä an we pwon mi lapalap ren ewe Ngünmifel. Lon aruuen kinikin a tüngor ngeni ekewe chon aleani ei toropwe, pwe repwe manau lon ei sokun manau pwe ar eufengen lon Kraist epwe pwä lon ar manaufengen.
Paulus a aea ekoch kapasen awewe pwe epwe pwärätä ewe ririfengenin nöün Kot aramas lon ar eufengen me Kraist: ewe mwichefel a usun chök eu inis, nge Kraist ewe mökür, ika a usun chök eu imw, nge Kraist ewe föün lepwokuku, ika a usun chök eman fefin, nge Kraist pwülüan. Ei toropwe a masou ren sokun ekiek mi tekia lupwen Paulus a mak fän an mwökütüküt ren än Kot ümöümöch lon Kraist. A küna meinisin lon saramen än Kraist we tong, an asor manauan, an amusala tipis, an ümöümöch me an limelimöch.
VI. Tettelin masouen ei toropwe:
Kapas akom 1.1-2
Kraist me ewe mwichefel 1.3–3.21
Ewe manau mi fö lon Kraist 4.1–6.20
Kapasen lesopolan 6.21-24
1
Kapong
1.1-2
Ngang Paulus eman nöün Kraist Jesus soukünö fän letipen Kot, üa kapong ngeni ekewe chon pin lon Efisos mi allükülük lon manauer lon Kraist Jesus: Föf 18.19-21; 19.1 Samach Kot me ach Samol Jesus Kraist epwe fang ngenikemi ümöümöch me kinamwe.
Ekewe feiöchün Ngün lon Kraist
1.3-14
Sipwe kilisou ngeni Kot Semen ach Samol Jesus Kraist, pun a afeiöchükich lon Kraist ren ekewe feiöchün ngün meinisin ra nonom lon läng. Kot a afilikich lon Kraist me mwen än fanüfan esamwo fis, pwe sipwe pin o unusöch me mwen mesan. Lon an chen a fen afilikich pwe sipwe tolong lon tettelin püsin nöün ren Jesus Kraist, pun iei usun met a apwapwai letipan. Sipwe mwareiti Kot ren an we ümöümöch mi fokun amwarar, a lifang ngenikich lon püsin Nöün we mi achengicheng! Pun lon Kraist sia ngasala ren chaan, pwe ach kewe tipis ra musala. A ifan me watten än Kot we ümöümöch Kol 1.14 a fang ngenikich lon an kisäsew mi somwosomwola! Lon än Kot tipachem me tipemirit meinisin a apwönüetä mine a fen eäni akot o asile ngenikich an ekiek mi monomon a fen filätä pwe epwe aunusala ren Kraist. 10 Ei ekiek Kot epwe aunusöchü lupwen epwe tori ewe fansoun mi afat pwe epwe achufengeni förian meinisin lon läng me fanüfan, pwe repwe nonom fän nemenien Kraist.
11 Ekei mettoch meinisin ra fisitä usun met Kot a fen ekiekietä o filätä. Kot a afilikichetä pwe sipwe nöün aramas lon Kraist lon pwüngün an akot mi longolong won met a fen filätä me lepoputän. 12 Iei mine kich mi akomwen apilükülükü Kraist sipwe eu lenien mwareiti lingen Kot. 13 Pwal ämi oua wiliti nöün Kot aramas lupwen oua rongorong ewe kapasen Kot mi let, iei ewe Pworausen Manau oua küna manau ren. Ämi oua lükü Kraist, nge Kot a pwaunikemi pwe oupwe nöün ren an ngenikemi ewe Ngünmifel, usun i a fen pwonei. 14 Pokiten sia eäni Ngünmifel, sia fokun silei pwe sipwe angei mine Kot a fen pwon ngeni nöün aramas. Ei a allükülükü ngenikich pwe Kot epwe wesewesen angasala nöün kana meinisin. Sipwe mwareiti an we ling!
Än Paulus iotek
1.15-23
15 Iei popun, seni ewe fansoun üa rongorong usun ämi lükü ach Samol Jesus pwal usun ämi echeni ekewe chon pin meinisin, 16 üsap ükütiu le kilisou ngeni Kot fänäsengesimi. Üa chechemenikemi lon ai iotek 17 o tüngor ngeni än ach we Samol Jesus Kraist we Kot, i Samach we mi ling, pwe epwe ngenikemi ewe Ngünmifel. I ewe mi atipachemakemi o asile ngenikemi usun Kot, pwe epwe lapala ämi silei i. 18 Üa tüngor pwe mesen letipemi epwe nennela pwe oupwe küna an saram, pwe oupwe silei usun ewe apilükülüköch i a köri ngenikemi, pwal usun watten ekewe feiöch mi amwarar i a pwon ngeni ekewe chon pin, 19 pwal usun löllön an we manaman mi angang loch chon lükü i. Ei sokun manaman a wewe ngeni än Kot we manaman mi pöchökül 20 a aea lupwen a amanauasefäli Kraist seni mäla o amota i lepelifichin lon läng. Kölf 110.1 21 Kraist a watte an nemenem ikenan lap seni ekewe sounemenem lon läng, seni ekewe manaman me ekewe samol. Wisan a tekia seni wisen ekewe sounemenem lon ei fansoun pwal lon ekewe fansoun repwe feito. 22 Kot a anomu mettoch meinisin fän nemenien Kraist. A awisa i pwe epwe möküren mwichefel o nemeni mettoch meinisin. Kölf 8.6 23 Mwichefel iei ewe inisin Kraist. Iwe, mwichefel a afisätä unusöchülan Kraist, usun püsin Kraist a aunusöchüela mettoch meinisin ekis meinisin. Kol 1.18

1:1: Föf 18.19-21; 19.1

1:7: Kol 1.14

1:20: Kölf 110.1

1:22: Kölf 8.6

1:23: Kol 1.18