Isikiel
Kapas akom
I. Iten ei puk: Isikiel, pun mine a mak lon, püsin pworausan me an kewe kapasen osuni. Wewen ei it Isikiel: Kot epwe apöchöküla.
II. Chon makei ei puk: Isikiel
III. Itelapemongen ei puk: Lingen Kot.
IV. Kapas aüchean ei puk: Isikiel a mochen achipa o apöchöküla leluken ekewe chon Juta ren an pwäri ngeniir pwe Kot epwe aliwinisefäliir seni ar oola. Nge a pwal mochen atai seniir ewe ekiek mi mwäl pwe repwe müttir liwinsefäliti fanüer.
V. Masouen ei puk Isikiel: Isikiel a oola lon Papilon lon ewe fansoun mwen talan Jerusalem lon ewe ier 586 mwen Kraist (B.C.) tori pwal mürin. An kewe afalafal ra fän iten ekewe chon oola lon Papilon, pwal fän iten ekewe aramas lon Jerusalem. Ei puk Isikiel a kinikinitiu lon 6 kinikin:
1. Kot a köri Isikiel pwe epwe eman soufos.
2. Kapasen asilesil ngeni ekewe aramas pwe Kot epwe apwüngüür o ataela Jerusalem.
3. Pworaus seni ewe Samol mi Lapalap usun an epwe apwüngü ekewe mwü mi ariaföüü o atokala nöün aramas.
4. Kapasen achipachip fän iten chon Israel mürin talan Jerusalem, me kapasen pwon pwe epwe war eu fansoun mürina.
5 Kapasen osuni usun feiengauen Kok.
6. Künään ewe soufos Isikiel usun ewe imwenfel mi kaüsefäl me fisisefälin ewe mwün Israel.
Isikiel eman mwän mi fokun alolol an ekiek me an lükü Kot. Chomong mine a silei a pwä ngeni lon künaan, nge an kewe afalafal a eäni lon mwökütükütün me pwomwan. Isikiel a fokun kapas usun aüchean försefälin leluk me ngün, pwal usun ukun eman me eman won an tipis. A pwal pwärätä an apilükülüköch pwe epwe wor siwilisefälin manauen chon ewe mwün Israel. Pokiten Isikiel eman souasor me eman soufos, iei mine a pwal fokun aücheani ewe imwenfel me än aramas repwe manaueni eu manau mi pin.
VI. Tettelin masouen ei puk:
Isikiel a kö me ren Kot 1.1–3.27
Afalafal usun än Jerusalem epwe tala 4.1–24.27
Än Kot apwüng ngeni ekewe mwü 25.1–32.32
Än Kot pwon ngeni nöün kewe aramas 33.1–37.28
Kapasen osuni usun feiengauen Kok 38.1–39.29
Künään Isikiel usun ewe imwenfel me ewe fanü chon Israel repwe fanüeni lon ekewe fansoun repwe feito 40.1–48.35
1
Ewe soufos Isikiel a küna lingen Kot
1.1-28
1 Iwe, lupwen üa ierini ilik lon alimuen ränin ewe arüanün maram, ngang ewe souasor Isikiel nöün Pusi we mwän üa nom lein ekewe chon oola arun ewe chanpupu Kepar lon Papilon. Iwe, a fis pwe läng a sukula, nge a wor künaei seni Kot. ✡ Pwär 19.11 2 Lon alimuen ränin ewe maram, iei alimuen ierin än ewe king Jehoiachin oola, ✡ 2.King 24.10-16; 2.Kron 36.9-10 3 ewe Samol mi Lapalap a kapas ngeniei me lon ewe fanü Papilon arun ewe chanpupu Kepar. Iwe, ikenan üa mefi pwe än ewe Samol mi Lapalap manaman a feitiu woi.
4 Iwe, lupwen üa nenela, üa küna eu mölümöl a feito me efeng, pwal eu kuchu mi watte o fokun saramaram ünükün. Iwe, ekkei a fifiwu fochofoch seni, nge lukalapen ewe ekkei a usun chök piras mi molupolup. 5 Iwe, a pwä me lon ewe ekkei lapalapen föman mönümanau, ra lapalapeni lapalapen aramas, ✡ Pwär 4.6 6 nge iteiten eman me eman leir a wor rüanü won mesan, pwal fofoch pöükässin. 7 Iwe, pecher ra wenewenetiu, nge apachapacher ra usun chök apachapachen nienifön kow o molupolup usun piras mi misimis. 8 Fän pöükässir me lepekir me rüanü a wor pöür mi wewe ngeni pöün aramas. Iwe, ir me föman a wor won meser me pöükässir. 9 Efoch me efoch pöükässir ra aküfengen me pöükässin chiener, eman me eman leir a fetal wenewen, nge resap kul lupwen ar fetal. 10 Iwe, iei usun lapalapen won meser: Won mesen eman me eman me fän meser a usun chök won mesen eman aramas, nge won meser me lepelifichir a usun chök won mesen eman laion. Iwe, won meser me lepelimöngür a usun chök won mesen eman ätemwänin kow, nge won meser me epinikür a usun chök won mesen eman ikel. ✡ Is 10.14; Pwär 4.7 11 Iei lapalapen won meser. Iwe, ruofoch pöükässir ra itiwu pwe ra aküfengen me pöükässin chiener, nge ren ruofoch ra pwölüela inisir. 12 Eman me eman leir a chök fetal wenewen ia ewe ngün a emwenirela ie, nge resap kul lupwen ar fetal. 13 Iwe, lukalapen ekewe mönümanau a wor och mi usun chök molien ekkei mi sarara, pwal usun chök töl mi mwökütükütfetal lein ekewe mönümanau. Iwe, ewe ekkei a saramaram, nge fifi a fifiwu seni me lon. ✡ Pwär 4.5 14 Iwe, ekewe mönümanau ra säfetal usun chök müttirin fifi.
15 Iwe, lupwen üa nenengeni ekewe mönümanau, üa küna rüanü wiil me won fanü, eu wiil lepekin eman me eman ekewe föman mönümanau. 16 Nge iei usun lapalapen ekewe rüanü wiil: ra meriweriw usun chök ewe fau aüchea itan kirisolait, nge lapalaper a wewefengen. Iwe, lapalaper a usun chök eu wiil mi nom lon eu, 17 pwe lupwen ra fetal, ra tongeni fetal ngeni ekewe rüanü pekin, nge resap kul lupwen ar fetal. 18 Iwe, ekewe rüanü wiil a wor ünükür pwal mwüchün lor, nge ünükür a kula ren föün mas. ✡ Pwär 4.8 19 Lupwen ekewe mönümanau ra fetal, ekewe wiil ra pwal fetal lepekir, nge lupwen ekewe mönümanau ra feitä seni won fanü, ekewe wiil ra pwal feitä. 20 Iwe, ia ewe ngün a feila ie, ir ra pwal feila, nge ekewe wiil ra etiir le feila, pun ngünün ekewe mönümanau ra nom lon ekewe wiil. 21 Lupwen ekewe mönümanau ra fetal, ekewe wiil ra pwal fetal. Lupwen ir ra üla, ekewe wiil ra pwal üla. Nge lupwen ir ra feitä seni won fanü, ekewe wiil ra pwal etiir le feitä, pun ngünün ekewe mönümanau ra nonom lon ekewe wiil. ✡ Is 10.9-13
22 Iwe, asen ekewe mönümanau a wor och mi wewe ngeni eu läng mi meresila me won mökürer, a molupolup o kurufat usun ewe fau itan kristal. ✡ Pwär 4.6 23 Nge fän ewe läng ekewe mönümanau ra aitiewu ruofoch pöükässir pwe ra aküfengen me pöükässin chiener kewe. Nge ren ruofoch pöükässir ra pwölüela inisir. 24 Lupwen ra fetal, üa rong üngüngün pöükässir mi wewe ngeni ngüngün watten no, a pwal wewe ngeni mwelien ewe Kot mi Manaman me akürangen eu mwichemongun sounfiu mi mwökütüküt. Iwe, lupwen ra üla, ra aitietiu pöükässir. ✡ Pwär 1.15; 19.6 25 Mürin a towu eu möngüngü seni asen ewe läng me won mökürer, lupwen ra üla fän pöükässir mi ititiu.
26 Iwe, asen ewe läng me won mökürer a wor och mi wewe ngeni eu lenien motun king mi för seni ewe fau aüchea itan safaia. Nge ewe mi mot won a lapalapeni lapalapen eman aramas. ✡ Is 10.1; Pwär 4.2-3 27 Iwe, feitä seni mine a usun chök won wilan üa küna och a wewe ngeni piras mi misimis, pwal och usun ekkei a pwelifeili ünükün. Nge feitiu seni mine a usun chök won wilan üa küna och mi wewe ngeni ekkei, a pwal wor och saram ünükün. ✡ Is 8.2 28 Iwe, usun lapalapen ewe resim a pwä lon kuchu lupwen püngün üt, iei usun lapalapen ewe saram ünükün ewe mi mot. Iei usun lapalapen lingen ewe Samol mi Lapalap. Iwe, lupwen üa küna ei, üa chapetiu lepwül o rongorong mwelien eman mi kapas.