1 Iwe, lon awonuen ierin ach oola, lon alimuen ränin ewe awonuen maram, üa mot lon imwei, nge ekewe souakomwen chon Juta mi oola ra mot rei. Ikenan än Kot ewe Samol mi Lapalap manaman a toriei. 2 Üa netä o küna eman a lapalapeni lapalapen eman aramas. Iwe, feitiu seni mine a usun chök won wilan a wor ekkei, nge feitä seni won wilan a usun chök lapalapen och saramaramen piras mi misimis. ✡Is 1.27 3 A aitiewu och usun lapalapen efoch pau o amwöchü meten mökürei. Lon künaei we Ngünün Kot a ekieitä lefilen fanüfan me läng o emwenieila Jerusalem. A anomuei lükün ewe asamalap mi nom efengin ewe leni mwen ewe imwenfel. Ikenan a wor eu uluulun anümwäl Kot a fokun chou ren. 4 Üa pwal küna lingen ewe Koten Israel ikenan, usun üa küna lon künaei we me lon ewe lemol. ✡Is 1.28 5 Iwe, Kot a üreniei, “Nöün aramas, kopwe nela efeng.” Iei mine üa nenela efeng o küna ewe uluulun anümwäl Kot a fokun chou ren, a nom arun ewe rongen asor ren ewe asamalapen tolong. 6 Kot a pwal üreniei, “Nöün aramas, ifa usun, ka küna mine ra föri? Ka küna ekewe föför mi anioput, chon Israel ra föri ikei, pwe repwe asüeila toau seni leniei mi pin? Nge kopwe pwal küna sokun föför mi fokun anioput seni ekei.”

7 Mürin a emwenieila ren asamalapen ewe leni lükün imwenfel. Nge lupwen üa nenefeil, üa küna eu pwang lon ewe tit. 8 Iwe, a üreniei, “Nöün aramas, kopwe pwangeni ewe tit.” Nge lupwen üa pwangeni, üa küna eu asamalap. 9 Kot a üreniei, “Kopwe tolong lon ewe rum o nengeni ekewe föför mi ngau o anioput ra föri lon.” 10 Iwe, üa tolong lon o küna me won ekewe etip meinisin liosun sokun mantötö me man mi anioput, pwal liosun än chon Israel kewe uluulun anümwäl meinisin. 11 Iwe, me fän mesen ekewe lios fik mwän seni ekewe souakomwen chon Israel ra ütä, nge Jaasania nöün Safan we a nom lefiler. Iteiten eman me eman a amwöchü an sepien asoren ötüöt, nge ötüötür a ötütä seni lor. 12 Mürin a üreniei, “Nöün aramas, ifa usun, ka küna mine ekewe souakomwen chon Israel ra föri lemonomon? Iteiten eman me eman a fel mwen an lenien uluulun anümwäl, pun ra apasa, ‘Ewe Samol mi Lapalap esap künakich. A likitala ewe fanü.’ ” 13 Nge a pwal üreniei, “Kopwe pwal küna ar föri föför mi fokun anioput seni ekei.”

14 Mürin, Kot a emwenieila ren asamalapen imwenfelin ewe Samol mi Lapalap mi sape ngeni efeng. Ikenan üa küna fefin ra kechüeiti ewe kot Tamus *Tamus eman koten Papilon, aramas ra lükü pwe a mäla, lupwen ekewe irä ra mwor chör lon fansoun patapat., a mäla. 15 Iwe, a üreniei, “Nöün aramas, ifa usun, ka küna ei? Nge kopwe pwal küna sokun föför mi fokun anioput seni ekei.”

16 Mürin, Kot a emwenieila ren ewe leni mwen imwenfelin ewe Samol mi Lapalap. Me ikenan üa küna rüe me liman mwän lükün asamalapen ewe imwenfel lefilen kengkangan me ewe rongen asor. Iwe, ra kul seni ewe imwenfel, ra newenewen ngeni ötiu o fel ngeni akkar. 17 Iwe, a üreniei, “Nöün aramas, ifa usun, ka küna ei? Ifa usun, esap ku ngeni chon Juta ar föri ekei föför mi anioput ikei, pwe ra pwal aurala ewe fanü ren föförün mwänewüs o sopwela le asongaei? Nengeni, ra pwal pwölü pwötür ngeni palen irä. 18 Iei mine üpwe apwüngüür fän ai song. Üsap achikeer, üsap pwal eäni tong ngeniir. Inamwo are repwe kechü ngeniei fän leüömong lon ar iotek, üsap fokun aüselingeer.”