1 Iwe, ekoch seni lein ekewe souakomwen chon Israel ra feito rei o mot mwei. 2 Mürin, ewe Samol mi Lapalap a kapas ngeniei, 3 “Nöün aramas, ekei mwän ra asamolu ar kewe uluulun anümwäl lon letiper o mwüt ngeniir pwe repwe emwenirelong lon tipis. Ifa usun, üpwe mwüt ngeniir pwe repwe angei ar öüröür seniei? 4 Iei mine kopwe kapas ngeniir o asile ngeniir pwe iei aloi ngang Kot ewe Samol mi Lapalap, ‘Are eman chon Israel a asamolu an uluulun anümwäl lon letipan o mwüt ngeni pwe epwe emwenalong lon tipis, mürin a pwal churi eman soufos pwe epwe angei an öüröür seni, püsin ngang üpwe pälüeni won aükükün chomongun an uluulun anümwäl. 5 Üpwe föri ei, pwe üpwe elliapasefäli letipen ekewe chon Israel mi likitieila pokiten ar uluulun anümwäl.’

6 Iei mine kopwe üreni ekewe chon Israel pwe iei aloi ngang Kot ewe Samol mi Lapalap, ‘Oupwe ekieksefäl. Oupwe kul seni ämi kewe uluulun anümwäl o sape seni ämi föför mi anioput meinisin. 7 Are eman chon Israel ika eman chon ekis mi nom leir a kul seniei o asamolu an uluulun anümwäl lon letipan, a pwal mwüt ngeni pwe epwe emwenalong lon tipis, nge mürin a pwal churi eman soufos, pwe epwe angei an öüröür seniei, püsin ngang ewe Samol mi Lapalap üpwe pälüeni. 8 Üpwe ü ngeni ei sokun aramas, üpwe föri pwe epwe eu asisil ngeni aramas, repwe leaweni lon ar kapasen ämängau, üpwe pwal ärala me lein nei aramas. Mürin oupwe silei pwe ngang ewe Samol mi Lapalap. 9 Nge are eman soufos epwe tup, pwe epwe osuni ngeni ewe chon ais öüröüran, püsin ngang ewe Samol mi Lapalap üpwe atupu ewe soufos. Ngang üpwe ü ngeni o ärala me lein ekewe aramasen Israel. 10 Ina usun ir me ruoman repwe angei liwinin ar tipis. Liwinin tipisin ewe soufos me ewe chon ais öüröüran epwe wewefengen. 11 Mürin, ekewe chon Israel resap chüen tok seniei, resap pwal chüen alimengaueer ren ar tipis. Iwe, ir repwe nei aramas kana, nge ngang üpwe ar Kot,’ iei alon Kot ewe Samol mi Lapalap.”

12 Iwe, ewe Samol mi Lapalap a kapas ngeniei, 13 “Nöün aramas, are chon eu fanü repwe tipis ngeniei ren ar resap allükülük, üpwe ü ngeniir o angei seniir ener mongö ra manau seni, üpwe tinala lengita rer o arosala aramas me man. 14 Nge are ekewe ülüman mwän Noa, Taniel me Hiop repwe nom lon ewe fanü, repwe chök püsin amanaueer ren ar pwüng,” iei alon Kot ewe Samol mi Lapalap. 15 “Are üpwe awora manmwacho pwe repwe nom won ewe fanü o niela chon, pwe ewe fanü epwe wiliti eu fanü mi pön ia esap wor eman aramas a tongeni fetal ie pokiten ekewe man, 16 mwo manauei, ngang Kot ewe Samol mi Lapalap üa apasa, are ekewe ülüman mwän repwe nonom lon ewe fanü, resap tongeni amanaua nöür mwän ika fefin, pwe ir chök repwe manau, nge ewe fanü epwe wiliti eu fanü mi pön. 17 Are üpwe awarato maun won ewe fanü o tinala efoch ketilas lemenen ewe fanü, pwe üpwe arosala aramas me man, 18 mwo manauei, ngang Kot ewe Samol mi Lapalap üa apasa, are ekewe ülüman mwän repwe nonom lon, resap tongeni amanaua nöür mwän ika fefin, pwe ir chök repwe manau. 19 Are üpwe tinala mätter lon ewe fanü o niela chomong lon ai lingeringer, pwe aramas me man repwe ärela, 20 mwo manauei, ngang Kot ewe Samol mi Lapalap üa apasa, are Noa, Taniel me Hiop repwe nonom lon, resap tongeni amanaua nöür mwän ika fefin, pwe repwe chök püsin amanaueer ren ar pwüng.” 21 Ewer, iei alon Kot ewe Samol mi Lapalap, “Epwe fen ifan feiengauen chon Jerusalem, lupwen üpwe tinala rer ai kewe rüanü feiengau mi watte, maun, lengita, manmwacho me mätter, pwe üpwe arosala aramas me man? ✡Pwär 6.8 22 Nge epwe wor ekoch leir mi chüen manau, nöür mwän me fefin, repwe towu seni ekewe feiengau. Iwe, oupwe nenengeniir, lupwen repwe torikemi, oupwe küna manauer me ar föföringau. Mürin oupwe chipila ren ekewe feiengau meinisin üa awarato won Jerusalem. 23 Iwe, oupwe chipela, lupwen oupwe küna manauer me ar föföringau, pun oupwe mefi pwe ekewe feiengau meinisin üa föri ngeni Jerusalem mi wor popun,” iei alon Kot ewe Samol mi Lapalap.