1 Iwe, ewe Samol mi Lapalap a kapas ngeniei, 2 “Nöün aramas, kopwe osuni feiengauen ekewe soufosun Israel, ir chokewe mi osuni seni püsin ar ekiek. Kopwe üreniir pwe repwe rongorong alon ewe Samol mi Lapalap. 3 Iei alon Kot ewe Samol mi Lapalap: Feiengauen ekewe soufos mi tiparoch ra osuni seni püsin letiper, nge esap wor künaer. 4 Ämi chon Israel, nöümi kewe soufos ra wewe ngeni ekewe foks mi nom lon ekewe leni mi tala. 5 Resap nom ren pwangen ekewe tit pwe repwe tümwünüür, resap pwal senisefälietä ekewe tit fän iten ekewe chon Israel pwe repwe üwenewenetä lon maun lon ränin ewe Samol mi Lapalap. 6 Mine ra osuni a mwakel, nge mine ra pweei a chofana. Ra apasa, ‘Iei alon ewe Samol mi Lapalap,’ nge ngang üsap tinirela. Iwe, ra chök ekieki pwe mine ra apasa epwe pwönüetä. 7 Nge ngang üa üreniir, “Künaemi a chök atuputup, a pwal mwakel chök mine oua pweei, lupwen oua apasa, ‘Iei alon ewe Samol mi Lapalap,’ nge ngang üsap kapas.

8 Iei mine ngang Kot ewe Samol mi Lapalap üa apasa: Pokiten a atuputup mine oua osuni, a pwal mwakel mine oua küna, üpwe ü ngenikemi. 9 Üpwe palüeni ekewe soufos a wor künaer mi atuputup, pwal chokana ra pweei mine a mwakel. Iwe, resap nom lon mwichen nei aramas, lupwen ra pwüngüpwüngfengen, iter esap makelong lon puken tettelin chon Israel, resap pwal tolong lon ewe fanü Israel. Mürin repwe silei pwe ngang Kot ewe Samol mi Lapalap. 10 Ei epwe fis pokiten ar atokala nei kewe aramas ren ar apasa, ‘Epwe chök fis kinamwe,’ nge esap fokun fis. Iwe, ren ei a usun chök pwe nei aramas ra senätä eu tit mi apwangapwang, nge ekei soufos ra chök aopala apwangapwangan ren pweech. ✡Jer 6.14; 8.11 11 Iei mine kopwe üreni chokewe ra chök apwecha ewe tit, pwe epwe turula. Epwe püngütiu ütomong won. Üpwe pwal tinato ütten fau me eu mölümöl won. 12 Nge lupwen ewe tit epwe turula, aramas repwe aisinikemi, ‘Met lomoten ewe pweech oua apwecha ngeni ei tit?’ 13 Iei mine ngang Kot ewe Samol mi Lapalap üa apasa: Lon ai song üpwe awarato eu mölümöl, lon ai lingeringer üpwe apüngätiu üt me ütten fau mi ataela ewe tit. 14 Iwe, üpwe atai ewe tit oua apwecha, üpwe pwal aturala won pwül pwe epwe pwä longolongun. Iwe, lupwen epwe turula, oupwe mäla fan. Mürin oupwe silei pwe ngang ewe Samol mi Lapalap. 15 Iei usun üpwe amüchü ai lingeringer won ewe tit, pwal won chokewe ra apwecha. Iwe, üpwe ürenikemi pwe ewe tit esap chüen wor, nge chokewe ra apwecha resap pwal chüen nom, 16 ir ekewe soufosun Israel ra osuni usun Jerusalem, a pwal wor künaer pwe epwe fis kinamwe lon, nge esap fokun fis.” Iei alon Kot ewe Samol mi Lapalap.

17 Iwe, ewe Samol mi Lapalap a apasa, “Nöün aramas, iei kopwe sape ngeni ekewe fefin lein noum aramas mi osuni seni püsin ar ekiek. Iwe, kopwe osuni usun ar repwe feiengau o apasa, 18 ‘Iei alon Kot ewe Samol mi Lapalap: Feiengauemi, ämi fefin mi föri sokun pisekin roong pwe ririn kumwuch, oua pwal tei pwölüpwölün won mesen aramas meinisin, pun oua mochen nemeni manauen aramas. Ifa usun, oua mochen pwe epwe wor ämi nemenem won manauen me mälan nei aramas fän iten püsin feiöchümi? 19 Oua aitengauaei lein nei aramas fän iten fite kumwuch parli pwal fän iten ekoch sättin pilawa. Oua niela aramas esap ürürün repwe mäla, nge oua amanaua aramas ürürün resap manau, ren ämi chofana ngeni nei aramas mi rongokai ngeni kapas chofana.’

20 Iei mine ngang Kot ewe Samol mi Lapalap üa apasa: Üa oput föriemi pisekin roong oua aea lon ämi mochen nemeni manau me mäla. Iwe, üpwe üttirewu seni won pöümi, üpwe pwal angasa ekewe aramas oua nemeniir. 21 Üpwe pwal kamwei pwölüpwölün won mesemi o angasa nei aramas seni lepöümi, pwe resap chüen nom fän nemeniemi. Mürin oupwe silei pwe ngang ewe Samol mi Lapalap. 22 Iwe, oua apwangapwangala leluken chon pwüng ren ämi kapas chofana, chokewe ngang üsap mochen pwe repwe lolilen. Oua pwal pesei ngeni ekewe aramasangau, pwe resap kul seni ar föför mi ngau o amanaua manauer. 23 Iei mine esap chüen wor künaemi mi atuputup, esap pwal chüen fis ämi pwee. Iwe, üpwe angasa nei aramas seni fän nemeniemi. Mürin oupwe silei pwe ngang ewe Samol mi Lapalap.”