1 Lon ena fansoun chün ekewe king me nöüwisen Juta, chün ekewe souasor me soufos, pwal chün ekewe chon Jerusalem repwe katowu seni ekewe peias. 2 Iwe, repwe toropas fän akkar me maram pwal fän ekewe fün läng meinisin. Pun ikei ekewe mettoch ekewe aramas ra echeniir o angang ngeniir, ra pwal angei ar öüröür me rer o fel ngeniir. Esap wor eman epwe ionifengeni ekewe chü o peiaseniir. Repwe usun chök kiten mongö me won pwül. 3 Nge chokewe meinisin mi chüen manau me lein chon ei mwü mi ngau repwe efich mäla lap seni manau me lon ekewe leni ia üa asürela ie. Ngang ewe Samol mi Unusen Manaman üa kapas.”

4 Ewe Samol mi Lapalap a akünöüei pwe üpwe üreni nöün aramas, “Ifa usun, lupwen aramas ra turula, resap pwal ütäsefäl? Ifa usun, are eman a tok seni ewe al, esap pwal liwinsefäl? 5 Pwota chök ämi nei aramasen Jerusalem oua tokofochofochola, nge ousap fokun kulsefäl? Oua kamwöchünuk won ämi kewe uluulun anümwäl, nge ousap fokun mochen liwinsefäl. 6 Ngang üa afäli ämi kewe kapas o aüselingeer, nge ousap eäni kapas wenechar. Esap wor eman aramas a ekieksefäl seni an föföringau o apasa, ‘Pwota üa föri ei sokun föför mi mwäl?’ Iteiten eman me eman a chök fetal won püsin alan, usun eman oris mi purefochofocholong lon maun. 7 Ewe öröpwech mi äs fän läng a silei an fansoun liwinsefäl, pwal ewe lisom, ewe ekiek me ewe kawakaw ra silei fansoun ar repwe ässifeil. Nge ämi nei aramas ousap silei ai kewe allük.

8 Pwota oua tongeni apasa, ‘Sia tipachem, pun än ewe Samol mi Lapalap allük a nom rech?’ Nengeni, ekewe allük ra siwil ren ekewe soumak mi chofana. 9 Ekewe aramas mi tipachem repwe säw, repwe rükö o oo. Are ra pöütala ai kewe kapas, met sokun tipachem ra eäni? 10 Iei mine üpwe fangala pwülüer ngeni chon ekis, pwal fanüer ngeni chokewe mi liapeniir. Pun seni ekewe mi kis tori ekewe mi lap, ir meinisin ra kütta ar win fän pwüngingau, pwal seni ekewe soufos tori ekewe souasor, ir meinisin ra atupu aramas. 11 Ra atupun säfeni nei aramas ren ar apasa, ‘A wor kinamwe, a wor kinamwe,’ ngei esor kinamwe. ✡Is 13.10 12 Ifa usun, oua säw lupwen oua föri ekei föför mi anioput? Apwi, ousap fokun säw, esap pwal wilila wowomi. Iei mine oupwe pöütütiu lein chokewe mi pöütütiu, oupwe feiengau lupwen üpwe apwüngükemi. Ngang ewe Samol mi Lapalap üa kapas. ✡Jer 6.12-15

13 Üa mochen achufengeni nei aramas usun eman aramas a achufengeni kinian ua. Nge ir ra usun chök efoch irän wain ika efoch irä fik esap wor uar, pwal chör ra pwasala. Iei mine üa mwüt ngeni ekewe chon ekis pwe repwe angei fanüer. Ngang ewe Samol mi Lapalap üa kapas.”

14 Nge ekewe aramas ra apasa, “Pwota sa chök momot? Ousipwe chufengen o sülong lon ekewe telinimw mi pöchökül tittir, pwe sipwe mäla ikenan. Pun ewe Samol mi Lapalap ach Kot a anümamauakich pwe sipwe mäla. A ngenikich koluk mi poison pwe sipwe ün, pun sia tipis ngeni ewe Samol mi Lapalap. 15 Sa apilükülükü kinamwe, nge feiengau a war. Sa apilükülükü eu fansoun pöchökülsefäl, nge niuokus watte a torikich. 16 Ekewe chon oputakich ra fen feito ren ewe telinimw Tan. Sia rongorong tikin nöür oris. Unusen ewe fanü a chech ren tikin nöür kewe oris mi pöchökül. Ekewe chon oputakich ra feito pwe repwe ataela fanüach me masouan meinisin, repwe pwal ataela ach kewe telinimw o niela meinisin mi imweimw lor.” 17 Iei alon ewe Samol mi Lapalap, “Nengeni, üpwe tinato leimi serepenit, sokun serepenit mi fokun poison, esap wor eman a tongeni förüörüür. Iwe, repwe kükemi.”