30
Isip epwe tala
30.1-26
1 Iwe, ewe Samol mi Lapalap a kapas ngeniei, 2 “Nöün aramas, kopwe osuni o apasa pwe iei aloi ngang Kot ewe Samol mi Lapalap:
Oupwe ngüngüres usun ewe ränin feiengau.
3 Pun a arap ewe rän, a arap ränin än ewe Samol mi Lapalap apwüng.
Epwe eu ränin rochokich, eu fansoun apwüng fän iten ekewe mwün fanüfan.
4 Epwe fis maun lon Isip, riaföü watte epwe tori Itiopia.
Chomong aramas repwe ninnila lon Isip,
wöün Isip epwe oola,
nge longolongun epwe tatiu.
5 Ekewe sounfiu seni Itiopia me Put me Lut, pwal ekewe chon Arapia me Lipia me aramasen ewe fanüen pwon repwe eti chon Isip le mäla lon ei maun.”
6 Iei alon ewe Samol mi Lapalap, “Chokewe mi alisi Isip repwe mäla lon maun seni Miktol tori Aswan. Nöün Isip mwichen sounfiu mi lamalamtekia repwe rosola. Ngang Kot ewe Samol mi Lapalap üa kapas. 7 Iwe, fanüer epwe tala lap seni ekewe fanü meinisin, nge telinimwer kewe repwe fokun tatakis lap seni ekoch telinimw mi tatakis. 8 Lupwen üpwe keni Isip o arosala chokewe meinisin mi alisi, mürin repwe silei pwe ngang ewe Samol mi Lapalap. 9 Lon ena rän üpwe tinala chon künö won wa, pwe repwe eniwokusu ekewe chon Itopia lon ar kinamwe. Iwe, rükö epwe toriir lon ewe rän Isip a feiengau. Ei epwe fokun fis.”
10 Iei alon Kot ewe Samol mi Lapalap, “Üpwe arosala ewe mwichemongun chon Isip o awesi wöür ren Nepukatnesar ewe kingen Papilon. 11 Üpwe awisa i me nöün mwichen sounfiu mi mwänewüs seni aramas meinisin, pwe repwe ataela ewe fanü. Repwe üttawu nöür ketilas o maun ngeni Isip, pwe unusen ewe fanü epwe ur ren somä. 12 Iwe, üpwe apwasa ewe chanpupu Nil o atolonga ewe fanü fän nemenien chon föföringau. Üpwe ataela ewe fanü me meinisin mine a wor lon ren chon ekis. Ngang ewe Samol mi Lapalap üa kapas.”
13 Iei alon Kot ewe Samol mi Lapalap, “Üpwe ataela ekewe uluulun anümwäl o atowu ekewe uluulun anümwäl me lon Memfis. Iwe, esap chüen wor eman samol lon ewe fanü Isip. Üpwe eniwokusu aramasen unusen ewe fanü. 14 Üpwe ataela Patros mi nom efeng, üpwe keni Soan mi nom ör o apwüngü Thebes. 15 Iwe, üpwe awarato ai lingeringer won Pelusium ewe telinimw mi fokun pöchökül lon Isip, üpwe pwal arosala ewe mwicheichen aramasen Thebes. 16 Ewer, üpwe keni Isip. Chon Pelusium repwe chechech fän niuokus, tittin ewe telinimw Thebes epwe pwangapwang, nge chon maun repwe akariaföüü chon Memfis iteiten rän. 17 Ekewe alüal seni On me Pipeset repwe mäla lon maun, nge chokewe mi chüen nom lon ekei telinimw repwe oola. 18 Saramen rän epwe rochola me lon Tapanes, lupwen üpwe ataela nemenemen Isip o awesi an pöchökül a aingaing won. Iwe, eu kuchu epwe pwölüela Isip, nge chon wisoposopun meinisin repwe oola. 19 Iei usun üpwe apwüngü Isip. Ren ei repwe silei pwe ngang ewe Samol mi Lapalap.”
20 Lon engol me aeuin ierin ach oola lon afisuen ränin ewe aeuin maram ewe Samol mi Lapalap a kapas ngeniei, 21 “Nöün aramas, üa kupi pöün Farao ewe kingen Isip. Nengeni, esap wor eman a säfeeni o filiti pöün, pwe epwe tongeni pöchökülsefäl o tufichin amwöchü efoch ketilas. 22 Iei mine ngang Kot ewe Samol mi Lapalap üa apasa: Üpwe ü ngeni Farao ewe kingen Isip o kupi pöün kewe, ewe efoch mi pöchökül, pwal ewe efoch mi fen kup, pwe nöün ketilas epwe turutiu seni lepöün. 23 Üpwe atoropasafeili ekewe chon Isip lein chon ekewe mwü me fanü. 24 Mürin üpwe apöchöküla pöün ewe kingen Papilon o isenalong nei ketilas lepöün. Nge üpwe kupi pöün Farao, pwe epwe ngüngü me mwen chon oputan, usun eman aramas mi arap ngeni mäla ren kinasan. 25 Ewer, üpwe apöchöküla pöün ewe kingen Papilon, nge pöün Farao epwe sumutiu. Lupwen üpwe isenalong nei ketilas lepöün ewe kingen Papilon, pwe epwe ächewechewa ngeni ewe fanü Isip o afeiengaua, mürin repwe silei pwe ngang ewe Samol mi Lapalap. 26 Iwe, üpwe atoropasafeili ekewe chon Isip lein chon ekewe mwü me fanü. Mürin repwe silei pwe ngang ewe Samol mi Lapalap.”