1 Lon aengolun ierin ach oola, lon engol me ruuen ränin ewe aengolun maram, ewe Samol mi Lapalap a kapas ngeniei, ✡Ais 19.1-25; Jer 46.2-26 2 “Nöün aramas, kopwe newenewen ngeni Farao ewe kingen Isip. Kopwe osuni usun feiengauan me feiengauen unusen ewe fanü. 3 Iwe, kopwe üreni, pwe iei aloi ngang Kot ewe Samol mi Lapalap: Üpwe ü ngonuk, Farao kingen Isip. En ewe alikitor mi watte, ka kon lon om chanpupu o apasa, ‘Iei ai we chanpupu Nil, ngang üa püsin föri.’ 4 Üpwe akköü ngächum o föri pwe ikenen lon om chanpupu repwe pach ngonuk. Iwe, üpwe nukiikewu seni lon ewe chanpupu Nil fiti ikenen lon meinisin ra pach ngonuk. 5 Iwe, üpwe aturukela lon fanüapö, en me ikenen om we chanpupu. Kopwe turula won eu leni mi amassawa, nge esap wor eman epwe angeek o peiasenuk. Iwe, üpwe pöütukela ngeni ekewe manmwacho me mansüsü pwe repwe ocheek.

6 Mürin, ekewe chon Isip meinisin repwe silei pwe ngang ewe Samol mi Lapalap. Iwe, ka apwangapwang usun chök efoch liwo me ren chon Israel. ✡Ais 36.6 7 Lupwen ra amwöchuk, ka sätekis o ekinasa lon pöür, nge lupwen ra üllenuk, ka kupula pwe sökürür a fingau. 8 Iei mine ngang Kot ewe Samol mi Lapalap üa apasa: Üpwe emwenato aramas pwe repwe niela noum aramas me man ren ketilas. 9 Iwe, ewe fanü Isip epwe wesewesen wiliti eu fanüapö. Mürin oupwe silei pwe ngang ewe Samol mi Lapalap. Iwe, ka apasa, ‘Ai we chanpupu Nil, ngang üa föri.’ 10 Iei mine üpwe ü ngonuk me om we chanpupu Nil, üpwe pwal awili ewe fanü Isip ngeni wesewesen fanüapö seni Miktol mi nom efeng tori Aswan mi nom ör, pwal tori kiännin Itiopia. 11 Esap wor eman aramas ika man epwe fetal won, esap pwal so lon ükükün faik ier. 12 Iwe, üpwe awili ewe fanü Isip ngeni eu fanüapö mi pön lap seni ekewe fanüapö meinisin. Iwe, telinimwan kewe repwe pwal tatakis lon ükükün faik ier lap seni ekoch telinimw mi tatakis. Üpwe atoropasafeili ekewe chon Isip lein chon ekewe mwü me ekewe fanü.”

13 Pun iei alon Kot ewe Samol mi Lapalap, “Lesopolan ekewe faik ier üpwe achufengeni ekewe chon Isip seni me lein ekewe mwü ia ra toropasfeil ie. 14 Üpwe aliwinala ekewe chon Isip mi oola ngeni ewe fanü Patros, iei fanüen ar kewe lewo. Iwe, ikenan repwe mwüni eu mwü mi apwangapwang. 15 Ei mwü epwe eu mwü mi apwangapwang seni mwü meinisin, pwe esap chüen püsin atekiatä asen ekewe mwü meinisin. Üpwe fokun achokisikisiir, pwe resap chüen tongeni nemenisefäli ekewe mwü. 16 Iwe, ekewe chon Israel resap chüen apilükülükü Isip, nge mine a fis ngeni Isip epwe achema ngeniir tipisin ar kütta alilisir seni. Mürin, chon Israel repwe silei pwe ngang Kot ewe Samol mi Lapalap.”

17 Iwe, lon rüe me fisuen ierin ach oola, lon ewe aeuin ränin ewe aeuin maram, ewe Samol mi Lapalap a kapas ngeniei, 18 “Nöün aramas, Nepukatnesar ewe kingen Papilon a awisa ngeni nöün mwichen sounfiu och angang mi weires, repwe föri lon ar maun ngeni Tirus. Iwe, iteiten möküren sounfiu a paan, iteiten afar a kinas, nge Nepukatnesar esap fokun angei och liwinin ei angang seni Tirus fän itan ika fän iten nöün kewe sounfiu. 19 Iei mine ngang Kot ewe Samol mi Lapalap üa apasa: Üpwe ngeni Nepukatnesar ewe kingen Papilon ewe fanü Isip. Iwe, Nepukatnesar epwe angei fän pöchökül pisekin Isip, epwe pwal uweela wöün meinisin pwe liwinin nöün kewe sounfiu. 20 Üpwe ngeni Nepukatnesar ewe fanü Isip pwe liwinin an angang weires, pun nöün kewe sounfiu ra angang ngeniei. Ngang Kot ewe Samol mi Lapalap üa kapas.

21 Iwe, lupwen epwe fis ei, mürin üpwe aüsefälietä mwün Israel o atufichisefäliik, Isikiel, pwe kopwe tufichin kapas lefiler. Mürin repwe silei pwe ngang ewe Samol mi Lapalap.”