1 Iei än Kot kapas usun Isip: Ewe Samol mi Lapalap a wawa eu kuchu mi müttir le äs, pwe epwe tori Isip. Iwe, ekewe anümwälin Isip repwe chechech me mwan, nge letipen chon Isip epwe kisikisila. ✡Jer 46.2-26; Is 29.1–32.32 2 Iwe, ewe Samol mi Lapalap a üra, “Üpwe afiu chon Isip pwe eman epwe fiufengen me pwin, iteiten eman me eman epwe fiu ngeni chon arun. Eu telinimw epwe ü ngeni pwal eu telinimw, nge eman mi mochen king epwe ü ngeni ewe king. 3 Iwe, esap chüen wor än chon Isip pwora, nge ngang üpwe ataela mine ra ekiekin föri. Repwe tüngor ar alilis seni ar kewe uluulun anümwäl o angei öüröürer seni ar kewe sourong me souawarawar me soupwe. 4 Nge ngang üpwe atolonga ekewe chon Isip fän nemenien eman samol mi nemepöchökül, eman king mi rochongau epwe nemeniir. Ngang ewe Samol mi Unusen Manaman üa kapas.

5 Iwe, kolukun ewe chanpupu Nil epwe morotä, pwe lon epwe pwasapwas. 6 Warawaren ewe chanpupu repwe pwongauala, ekewe öüwön Isip repwe pwasatä, nge ekewe liwo mi mär lon repwe pwasala. 7 Iwe, ekewe lenien fetil ünükün ewe chanpupu Nil, pwal meinisin mine a fotetiu lon ekewe tanipi ünükün repwe pwas. Asepwäl epwe pönirela pwe resap chüen nom. 8 Ekewe chon attau repwe lolilen, chon efief repwe kechü, nge chon kotur epilo repwe letipeta. 9 Iwe, chon angang ngeni silifö pwal chon angangen türüni mangaku mi pwechepwech repwe fokun osupwang. 10 Ekewe chon tür repwe letipeta, nge chokewe mi angangen moni repwe riaföü.

11 Iwe, ekewe samolun Soan ra fokun umwesila, nöün Farao kewe chon öüröür mi tipachem ra eäni kapasen chon tiparoch. Fän meni sokun pwüng oua tongeni üreni Farao, pwe ämi nöün ekewe chon tipachem pwal mwirimwirin ekewe kingen lom? 12 En kingen Isip, ikafa ir noum kewe chon tipachem? Repwe aiti ngonuk o asile ngonuk mine ewe Samol mi Unusen Manaman a akota pwe epwe föri ngeni Isip. 13 Iwe, ekewe samolun Soan ra wiliti chon umwes, ekewe samolun Memfis ra ruongau, ekewe samolun Isip ra emweningaua chon Isip. 14 Ewe Samol mi Lapalap a föri mine ar öüröür ngeni aramas epwe fitikoko ren. Iwe, ra aruka chon Isip, pwe ra chepetek lon ar föför meinisin usun eman chon sakau a mit lon musan. 15 Esap wor eman lon Isip a tongeni alisiir, esap lifilifil ika eman chon wöümong, ika eman chon wöüngau, ika eman mi wor itan, ika eman esor itan.

16 Lon ena fansoun chon Isip repwe wewe ngeni fefin, repwe chechech fän niuokus, lupwen repwe küna pwe ewe Samol mi Unusen Manaman a ü ngeniir. 17 Ewe fanü Juta epwe eu pisekin eniweniw ngeni chon Isip. Meinisin mi rong usun chon Juta repwe fokun niuokus ren mine ewe Samol mi Unusen Manaman a akota pwe epwe föri ngeniir.

18 Lon ena fansoun epwe wor limu telinimw lon Isip aramasen lon repwe eäni fosun Ipru, repwe pwal pwon fän akapel pwe repwe lükü ewe Samol mi Unusen Manaman. Iwe, eu lein ekewe telinimw epwe iteni ‘Telinimwen Akkar’.

19 Lon ena fansoun epwe wor eu rongen asor fän iten ewe Samol mi Lapalap lukalapen ewe fanü Isip, epwe pwal wor eföü föün achem fän itan lekiännin. 20 Ei epwe eu asisil, pwal eu pisekin pwärätä, pwe ewe Samol mi Unusen Manaman a nom lon ewe fanü Isip. Nge lupwen ekewe aramas repwe siö ngeni ewe Samol mi Lapalap lon ar riaföü, epwe tinala rer eman chon amanau pwe epwe peniir o angaseer. 21 Iwe, ewe Samol mi Lapalap epwe püsin pwäri i ngeni chon Isip. Lon ena fansoun chon Isip repwe pwärätä pwe ewe Samol mi Lapalap ar Kot. Repwe fel ngeni ren asoren mongö me asoren kek, repwe pwon ngeni o apwönüetä mine ra pwon. 22 Iwe, ewe Samol mi Lapalap epwe fokun afeiengaua chon Isip ren eu mätter, nge mürin epwe pwal apöchöküeler. Repwe liwiniti ewe Samol mi Lapalap, nge i epwe aüselinga ar kewe tüngor o apöchöküleer.

23 Lon ena fansoun epwe wor efoch alalap seni Isip tori Asiria. Iwe, ekewe chon Asiria repwe feito Isip, chon Isip repwe feila Asiria, nge chon Isip me chon Asiria repwe chufengen le fel ngeni ewe Samol mi Lapalap.

24 Lon ena fansoun Israel epwe chiechi ngeni Isip me Asiria, nge fanüfan epwe feiöch ren ekei ülüngat mwü. 25 Iwe, ewe Samol mi Unusen Manaman epwe afeiöchüür o apasa, “Üpwe afeiöchuk Isip, en nei aramas, pwal en Asiria förien pei. Üpwe pwal afeiöchuk Israel, en ewe mwichen aramas üa nöüni.”