46
Kapasen osuni fänäsengesin Isip
46.1-28
1 Iwe, ewe Samol mi Lapalap a kapas ngeni ewe soufos Jeremaia fänäsengesin chon ekewe mwü, 2 poputä me won Isip. Iei usun mine a apasa fän äsengesin nöün Farao Neko ewe kingen Isip mwichen sounfiu, Nepukatnesar ewe kingen Papilon a akufu me lon Karkemis arun ewe chanpupu Oifrat lon arüanün ierin mwün Jehoiakim ewe kingen Juta nöün Josia we mwän,
3 “Oupwe amolätä ämi tittin maun mi watte me kükün
o feila ngeni maun.
4 Oupwe amolätä nöümi kewe oris o tötä wor, ämi chon wawa oris.
Oupwe atettelikemi fän imwemi akau,
oupwe amisi wokumi
o üföüf üfemi sekitin maun.
5 Nge met üa küna?
Ra rükö o kulsefäl.
Ekewe sounfiu ra kuf o müttir le sü.
Resap nenesökür,
niuokus watte a nom ünükür meinisin.”
Iei alon ewe Samol mi Lapalap.
6 “Chokewe mi müttir resap tongeni sü,
nge ekewe sounfiu resap tongeni süla.
Ra chepetek o turula
lon ewe fanü efeng arun ewe chanpupu Oifrat.
7 Iö ei mi wattela usun ewe chanpupu Nil,
usun ekewe chanpupu mi säsewu.
8 Isip a wattela usun ewe chanpupu Nil,
pwal usun ekewe chanpupu mi säsewu.
A apasa, ‘Üpwe wattela o pwölüela fanüfan.
Üpwe ataela telinimw o niela ekewe aramas mi imweimw lor.’
9 Oupwe allük ngeni ekewe oris pwe repwe sä,
oupwe säpuropur, ämi chon wawa woken.
Oupwe karisila, ämi sounfiu,
ämi re Itiopia me Put mi uwei tittin maun,
pwal ämi re Lut mi föüen le esefich.
10 Ei rän iei ewe ränin Kot ewe Samol mi Unusen Manaman,
eu ränin an epwe ngeni chon oputan chappen ar föför,
eu ränin an epwe apwüngüür.
Ewe ketilas epwe mongö tori an epwe möt,
epwe ün cha tori an epwe ku.
Pun Kot ewe Samol mi Unusen Manaman a föri eu asor
me lon ewe fanü efeng arun ewe chanpupu Oifrat.
11 Ämi aramasen Isip, oupwe feila Kiliat
o angei säfei.
Esap wor lomoten ämi oupwe eäni chomong säfei,
pun ousap pöchökül ren.
12 Chon ekewe mwü ra rongorong usun ämi itengau,
aramas meinisin ra rongorong ämi siö.
Eman sounfiu a chepetek won eman,
ra turupöküla.”
13 Iei ewe kapas ewe Samol mi Lapalap a apworausa ngeni ewe soufos Jeremaia fänäsengesin waren Nepukatnesar ewe kingen Papilon, pwe epwe atai ewe fanü Isip, ✡Jer 43.10-13
14 “Oupwe asilefeili lon Isip
o arongafeili lon Miktol, Memfis me Tapanes ekei kapas,
‘Oupwe ütä o amolakemiitä,
pun pisekimi meinisin epwe tala lon maun.’
15 Pwota ämi kot mi pöchökül itan Apis a turula?
Esap tongeni ütä, pun ewe Samol mi Lapalap a aturätiu.
16 Nöümi kewe sounfiu ra chepetek o turula.
Ra ürafengen lefiler,
‘Ousipwe ütä o liwiniti aramasach me poputän fanüach.
Sipwe sü seni nöün ewe chon ariaföüükich ketilas.’
17 Oupwe aita ngeni Farao ewe kingen Isip eu it mi fö,
‘Akürang watte. A mwüt ngeni an fansoun fich pwe epwe feil seni.’
18 Ngang ewe King itei ewe Samol mi Unusen Manaman üa apasa,
‘Mwo manauei, eman epwe fokun feito,
epwe tekia usun ewe chuk Tapor me lein ekewe chuk,
pwal usun ewe chuk Karmel mi nom aroset.
19 Ämi chon Isip, oupwe amolätä pisekimi,
pun oupwe oola.
Memfis epwe wiliti eu fanüapö,
eu leni mi tatakis esap so.’
20 Isip a wewe ngeni eman kow mi fokun mürina,
nge eman sokun kilisoon kow mi kükkük a feito won seni efeng.
21 Iwe, nöün kewe sounfiu a möniir
ra usun chök nienifön kow mi öümanau.
Nge pwal ir ra kul o süpöküla,
resap üppos.
Pun ränin ar feiengau a feitiu wor,
ewe fansoun ar küna apwüng a war.
22 Isip epwe sü, nge isiis usun isiisin eman serepenit mi sü,
lupwen chon oputan kewe ra karisito fän pöchökül.
Repwe maun ngeni fän nöür kouk usun
chon pöküpök irä.
23 Repwe pöküela an we wöllap,
inamwo ika a fokun malül.
Ra fokun chomong seni lifichimas,
rese tongeni lea.
24 Ekewe chon Isip repwe säw,
repwe oolong lepöün ekewe aramas seni efeng.
Ngang ewe Samol mi Lapalap üa kapas.”
25 Iwe, ewe Samol mi Unusen Manaman, ewe Koten Israel a üra, “Üpwe awarato apwüng won Amon ewe koten Tepes, won Isip me an kewe kot me nöün kewe king, pwal won Farao me chokewe meinisin mi anomu ar apilükülük won. 26 Üpwe asechirelong lepöün chokewe mi mochen nirela, lepöün Nepukatnesar ewe kingen Papilon me nöün kewe meilapen sounfiu. Nge ekoch fansoun mürin, Isip epwe sosefäl usun lon ekewe fansoun lom. Ngang ewe Samol mi Lapalap üa kapas. ✡Ais 19.1-25; Is 29.1–32.32
27 Nge ämi mwirimwirin Jakop nei we chon angang, ousap niuokus,
ämi chon Israel, ousap rükö.
Üpwe amanauakemi seni lon ewe fanü toau.
Üpwe amanaua mwirimwirimi kana seni ewe ia ra oola ie.
Än Jakop cho epwe liwinto o nonomöch fän kinamwe,
nge esap wor eman epwe aniuokusuur.
28 Ämi mwirimwirin Jakop nei we chon angang,
ousap niuokus, pun ngang üpwe etikemi.
Üpwe arosala chon ekewe mwü
ia üa asükemiila ie,
nge ämi üsap arosakemiila.
Üsap tongeni likiti ai üpwe etikemi.
Üpwe apwüngükemi fän aüküköch.
Ngang ewe Samol mi Lapalap üa kapas.” ✡Jer 30.10-11