30
Kot a pwon pwe ekewe chon oola repwe liwinsefäl
30.1–31.26
1 Iwe, ewe Samol mi Lapalap, ewe Koten Israel a üreni Jeremaia, 2 “Kopwe makei lon eu puk ekewe kapas meinisin üa ürenuk. 3 Pun epwe war ewe fansoun pwe ngang üpwe aliwinisefäli nei aramasen Israel me Juta o aliwinireto ngeni ewe fanü üa ngeni ar kewe lewo pwe repwe fanüeni. Ngang ewe Samol mi Lapalap üa kapas.” 4 Ikkei ekewe kapas ewe Samol mi Lapalap a apasa fän äsengesin Israel me Juta,
5 “Üa rongorong eu puchörün rükö me niuokus,
nge sap mweireiren kinamwe.
6 Iei oupwe ais o ekieki.
Ifa usun, a tufich än eman mwän epwe nöünätiu eman semirit?
Pwota üa küna pwe ekewe mwän meinisin
ra anomu pöür won wilar
usun eman fefin mi cheri an cheuchen fam?
Pwota won meser a wopwechepwechela?
7 Eu rän mi fokun eniuokus epwe war,
esap wor eu rän usun chök ei.
Epwe eu fansoun riaföü fän iten ekewe mwirimwirin Jakop,
nge ir repwe ngasewu seni.”
8 Iei alon ewe Samol mi Unusen Manaman, “Lupwen epwe war ewe fansoun, üpwe kupi ewe waas seni won üwer, üpwe mwüti fööföör, nge ekewe chon ekis resap chüen nöüniir amanau. 9 Nge repwe angang ngeniei ngang ewe Samol mi Lapalap ar we Kot, pwal ngeni eman mwirimwirin Tafit, ätewe üpwe seikätä pwe epwe ar king.
10 Nge ämi mwirimwirin Jakop nei chon angang,
ousap niuokus, ousap rükö,
ämi chon Israel.
Pun üpwe fokun amanauakemi seni ewe fanü mi toau,
pwal mwirimwirimi seni ewe fanü ia ra oola ie.
Ämi mwirimwirin Jakop, oupwe liwinsefälito o nonom fän kinamwe,
nge esap wor eman epwe eniuokusukemi.
11 Iwe, ngang üpwe etikemi o amanauakemi.
Üpwe fokun arosala chon ekewe mwü
ia üa atoropasakemi ie,
nge ämi üsap fokun arosakemiila.
Üsap likiti ai üpwe apwüngükemi,
nge lupwen üpwe apwüngükemi,
üpwe apwüngükemi fän aüküköch.
Ngang ewe Samol mi Lapalap üa kapas.” ✡Jer 46.27-28
12 Iwe, iei alon ewe Samol mi Lapalap ngeni nöün aramas,
“Feiengauemi esap tongeni wes,
nge kinasemi kewe resap moela.
13 Esap wor eman mi tümwünükemi,
esap wor säfeen kinasemi,
esap pwal wor ämi apilüköch pwe oupwe pöchökülsefäl.
14 Peliemi kewe meinisin ra manlükikemiila,
resap chüen ekiekikemi.
Üa wichikemi usun üa wichi chon oputaei.
Ai apwüngükemi a fokun pöchökül
pokiten chomongun ämi kewe föföringau
me watten ämi kewe tipis. 15 Pwota oua siö ren ämi feiengau?
Ämi metek esap tongeni moela.
Üa föri ngenikemi ekei föför,
pokiten chomungun ämi kewe föföringau
me watten ämi kewe tipis.
16 Nge iei chokewe meinisin mi arosakemiila repwe pwal rosola,
ekewe chon ü ngenikemi meinisin repwe oola,
chokewe mi ariaföüükemi repwe riaföü,
nge chokewe mi angei pisekimi fän pöchökül, aramas repwe pwal angei pisekir fän pöchökül.
17 Iwe, ngang üpwe apöchökülakemi
o amoela kinasemi,
inamwo ika chon oputakemi ra aita ngenikemi chon pöütüla
o apasa, ‘Esap wor eman a chüngü Sion.’
Ngang ewe Samol mi Lapalap üa kapas.”
18 Iei alon ewe Samol mi Lapalap,
“Nengeni, üpwe aliwinisefäli nei aramas ngeni fanüer
o tongei lenier.
Jerusalem epwe kaüsefäl won lerasan me lom,
nge ewe imwen king epwe kaütä won wesewesen lenian.
19 Seni lon ekewe imw aramas repwe chietä kölün kilisou
o mweireiren pwapwa.
Üpwe achomongerela, pwe resap chokükün.
Üpwe aitöchüür, pwe resap chüen itengau.
20 Nöür kana repwe usun chök lon ekewe fansoun lom,
ar mwich epwe nüküchar me fän mesei,
nge üpwe apwüngü meinisin mi ariaföüür.
21 Nöür souemwen epwe eman seni püsin leir,
nge ar samol epwe ütä me leir.
Epwe kaneto rei lupwen üpwe köri,
pun iö a tongeni püsin kaneto rei, nge üsap köri?
Ngang ewe Samol mi Lapalap üa kapas.
22 Ir repwe nei aramas,
nge ngang üpwe ar Kot.”
23 Än ewe Samol mi Lapalap lingeringer a usun chök eu mölümöl, a usun eu ewiniär, epwe chopwiti won möküren ekewe aramasangau. 24 Än ewe Samol mi Lapalap song mi watte esap kul tori epwe afisätä o awesala mine a ekieki lon lelukan. Lon ekewe fansoun mürin oupwap weweiti usun ekei mettoch.