1 Iwe, ewe Samol mi Lapalap a kapas ngeniei, 2 “Nöün aramas, kopwe osuni usun feiengauen ekewe sounemenem, ir ekewe chon masen Israel, kopwe osuni usur o üreniir, pwe iei aloi ngang Kot ewe Samol mi Lapalap: Feiengauemi, ämi chon masen Israel, pun oua püsin tümwünükemi. Ifa usun, sap wisen chon mas pwe repwe tümwünü sip? 3 Ämi oua ünümi ewe milik, oua üföüf üf seni ülen sip, oua pwal niela o ochei fituken ekewe man mi öümanau, nge ousap fokun tümwünü ekewe sip. 4 Iwe, ämi ousap tümwünü ekewe chon apwangapwang o apöchöküla ekewe chon samau, ousap filiti kinasen chokewe mi kinas, ousap aliwini ekewe chon malechela, ousap pwal kütta ekewe chon pöütüla, nge oua nemeniir fän echimw me pöchökül. 5 Iei mine ekewe sip ra toropasfeil, pun esap wor ar chon mas. Iwe, ekewe manmwacho ra ocheer. ✡Num 27.17; 1.King 22.17; Mat 9.36; Mark 6.34 6 Nei sip kana ra malechfeil won ekewe chukutekison me ekewe chukutekia. Iwe, ra toropasfeil won unusen fanüfan, nge esap wor eman a kütteer ika tümwünüür.

7 Iei mine ämi kewe chon mas oupwe rongorong aloi ngang ewe Samol mi Lapalap. 8 Mwo manauei, ngang Kot ewe Samol mi Lapalap üa apasa: Nei sip kana ra oola pwe ekewe manmwacho ra ocheer, pun esap wor ar chon mas. Iwe, nei kewe chon mas resap kütta nei sip kana, pwe ra püsin tümwünüür, nge resap tümwünü nei sip kana. 9 Iei mine ämi kewe chon mas oupwe rongorong aloi: 10 Ngang Kot ewe Samol mi Lapalap üa apasa: Üa ü ngenikemi, ämi chon mas. Üpwe angei senikemi nei kewe sip o awesikemi seni wisen chon mas, pwe ousap chüen tongeni püsin tümwünükemi. Iwe, üpwe amanaua nei kewe sip senikemi, pwe ousap chüen tongeni ocheer.

11 Pun iei aloi ngang Kot ewe Samol mi Lapalap: Püsin ngang üpwe kütta nei sip kana o tümwünüür. 12 Usun eman chon mas a kütta nöün pwiin sip mi toropasfeil o achufengeniir, ina usun üpwe achufengeni nei sip kana o tümwünüür. Iwe, üpwe amanaueer seni ekis meinisin ia ra toropasfeil ie lon fansoun räningau me rochokich. 13 Üpwe emwenirewu seni lein ekewe mwü, üpwe pwal achufengeniir seni lon ekewe fanü o emwenirelong lon poputän fanüer. Üpwe amongöör won ekewe chukun Israel, ünükün ekewe chanpupu, pwal lon ekewe leni meinisin mi so lon ewe fanü. 14 Üpwe amongöü ngeniir fetil mi mürina, repwe kütta ener mongö me won ekewe chukun Israel. Ikenan repwe kon won leni mi mürina fän kinamwe o kütta ener mongö mi annö won ekewe chukun Israel. 15 Iwe, püsin ngang üpwe chon masen nei sip kana, üpwe kütta eu leni ia ra tongeni asösö ie. Ngang Kot ewe Samol mi Lapalap üa kapas. 16 Üpwe kütta chokewe mi pöütüla o aliwini chokewe mi malechela, üpwe filiti kinasen chokewe mi kinas o apöchöküla chokewe mi apwangapwang, nge üpwe arosala chokewe mi öümanau o pöchökül, pun ngang eman chon mas mi föri mine a pwüng.

17 Iwe, iei aloi ngang Kot ewe Samol mi Lapalap ngeni ämi nei sip kana: Üpwe apwüngükemi o aimwüfeseni ekewe sip mi mürina seni ekewe mi ngau, ekewe ätemwänin sip seni ekewe ätemwänin kuuch. 18 Ifa usun, esap ku ngenikemi ämi mongö ekewe fetil mi mürina, pwe oua pwal purätiu mine a lusun? Ifa usun, esap ku ngenikemi ämi ün seni ewe koluk mi fat, pwe oua pwal apölökü ren pechemi mine a lusun? 19 Ifa usun, nei sip kana repwe mongö mine oua purätiu fän pechemi, repwe pwal ün mine oua apölökü ren pechemi?

20 Iei mine ngang Kot ewe Samol mi Lapalap üa ürenikemi: Ngang üpwe püsin apwüngükemi o aimwüfeseni ekewe sip mi kitinup seni ekewe sip mi kichüchü. 21 Ämi oua etia ren möküremi me lepekimi ekewe mi apwangapwang, oua pwal pureer ren mächämi tori ra toropasfeil ekis meinisin. 22 Iei mine üpwe amanaua nei sip kana, pwe esap chüen wor eman epwe ariaföüür, üpwe pwal apwüngüür meinisin o aimwüfeseni ekewe sip mi mürina seni ekewe mi ngau. 23 Iwe, üpwe awisa eman chök chon mas pwe epwe tümwünüür. I epwe usun chök nei chon angang Tafit, epwe foleniir, epwe pwal ar chon mas. ✡Pwär 7.17 24 Iwe, ngang ewe Samol mi Lapalap üpwe ar Kot, nge eman king usun nei chon angang Tafit epwe nemeniir. Ngang ewe Samol mi Lapalap üa kapas. ✡Is 37.24

25 Iwe, üpwe föri eu pwonen kinamwe lefiler me ngang o arosala manmwachon ewe fanü, pwe nei sip kana repwe nonom lon fanüapö fän kinamwe o möür lein ekewe wöllap. 26 Üpwe uwato feiöch wor, pwal won ewe fanü ünükün chuki mi pin, üpwe apüngätiu üt lon fansoun fich, nge ewe üt epwe eu ütten feiöch. 27 Ekewe irän lemäl repwe ukua, nge pwülün fanü epwe ämärätä irä mi mürina. Iwe, ekewe aramas repwe nom lon fanüer fän kinamwe. Lupwen üpwe mwüti fööför kewe selimächä o angaseer seni chokewe mi nöüniir amanau, mürin repwe silei pwe ngang ewe Samol mi Lapalap. 28 Iwe, chon ekewe mwü resap chüen liapeniir, manmwachon ewe fanü resap chüen ocheer, pwe repwe nonom fän kinamwe, nge esap wor eman epwe chüen eniwokusuur. 29 Iwe, üpwe awora tanipi mi mürina fän iter, pwe resap chüen mäla ren echik lon ewe fanü, resap pwal chüen itengau me ren chon ekewe mwü. 30 Mürin repwe silei pwe ngang ar Kot ewe Samol mi Lapalap üa nonom rer, repwe pwal silei pwe ir chon Israel nei aramas. Ngang Kot ewe Samol mi Lapalap üa kapas. 31 Pun ämi nei sip kana, üa folenikemi ämi nei aramas, nge ngang ämi Kot,” iei alon Kot ewe Samol mi Lapalap.