1 Iwe, ewe Samol mi Lapalap a kapas ngeniei, 2 “Nöün aramas, kopwe newenewen ngeni ewe fanü Etom o osuni usun feiengauan. 3 Iwe, kopwe üreni ekewe aramas pwe iei aloi ngang Kot ewe Samol mi Lapalap:

5 Iwe, fansoun langatam ka chou ngeni chon Israel o oputeer, ka pwal asechirela pwe repwe mäla ren ketilas lon fansoun ar feiengau, lupwen ra tolong lon apwüngün lesopolan. 6 Mwo manauei, ngang Kot ewe Samol mi Lapalap üa apasa: Pokiten ka föri ei, üpwe föri pwe aramas repwe nimanaueek, nge kosap tongeni sü seniir. Pokiten ka tipisin nimanau, kopwe püsin küna nimanau. 7 Ewer, üpwe awili ewe chukuchukutän Etom ngeni fanüapö o ärala chokewe meinisin mi saifetal won. 8 Iwe, üpwe pwölüela chukum kewe mi tekia ren somä, nge aramas mi mäla lon maun repwe turula won chukum mi tekison, pwal lon om kewe lemol me pwokur. 9 Iwe, üpwe awili ngonuk eu fanüapö feilfeilachök, pwe om kewe telinimw resap chüen so. Mürin kopwe silei pwe ngang ewe Samol mi Lapalap.

10 Iwe, ka apasa, ‘Üpwe nemeni ekei ruu mwü Juta me Israel, üpwe fanüeni fanüer, inamwo ika ewe Samol mi Lapalap a nonom lon.’ 11 Iei mine ngang Kot ewe Samol mi Lapalap üa apasa: Mwo manauei, üpwe liwini ngonuk ükükün ewe song me lolowo ka eäni ngeniir, lupwen ka pwäri ngeniir om oputeer. Iwe, repwe silei pwe ngang üa apwünguk pokiten mine ka föri ngeniir. 12 Mürin ämi aramasen Etom oupwe silei, pwe ngang ewe Samol mi Lapalap üa rongorong iteiten kapasen turunufas oua eäni ngeni ekewe chukun Israel, lupwen oua apasa usur, ‘Ra tala o pön, ra oolong lepöüch pwe sipwe fanüeniir.’ 13 Ngang üa püsin rongorong chomongun ämi kapasen tunosikesik oua ü ngeniei ren. 14 Iei aloi ngang Kot ewe Samol mi Lapalap: Chon fanüfan meinisin repwe pwapwa, lupwen üpwe awiluk ngeni eu fanüapö. 15 Pokiten ka pwapwa pwe ewe fanüen chon Israel a tala, üpwe pwal föri ngonuk mine a fis ngeniir. Iwe, kopwe pwal tala, en chuk Seir me unusen ewe fanü Etom. Mürin aramas meinisin repwe silei pwe ngang ewe Samol mi Lapalap.” ✡Ais 34.5-17; 63.1-6; Jer 49.7-22; Is 25.12-14; Am 1.11-12; Op 1-14; Mal 1.2-5