1 Iwe, ewe Samol mi Lapalap a kapas ngeniei, 2 “Nöün aramas, kopwe newenewen ngeni chon Amon o osuni usun feiengaueer. 3 Kopwe üreni ekewe chon Amon, pwe repwe aüselinga mine ngang Kot ewe Samol mi Lapalap üa apasa: Oua takirin ämängau usun imwei mi pin, lupwen aramas ra apiningaua pinin, oua takiri ewe fanü Israel, lupwen a tatakis, pwal ekewe chon Juta, lupwen ra oola. 4 Iei mine üpwe asechikemiilong lepöün ekewe aramasen ötiu pwe repwe nemenikemi. Repwe aüetä imwer imw mangaku o imweimw leimi. Iwe, repwe ochei uän ämi kewe irä o ünümi ünümemi milik. 5 Iwe, üpwe awili Rapa samolun telinimwen chon Amon ngeni lenien fol kamel, nge fanüer üpwe awili ngeni lenien pwiin sip. Mürin oupwe silei pwe ngang ewe Samol mi Lapalap. 6 Pun iei aloi ngang Kot ewe Samol mi Lapalap: Oua alopolop o pupures fän pwapwa, oua pwal takirin ämängau seni letipemi usun feiengauen Israel. 7 Iei mine üa ü ngenikemi o asechikemiilong lepöün chon ekewe mwü pwe repwe liapenikemi. Üpwe ärikemiila me lein ekewe mwü o arosakemiila lon ekewe fanü. Iwe, üpwe afeiengauakemi, pwe oupwe silei pwe ngang ewe Samol mi Lapalap.” ✡Jer 49.1-6; Is 21.28-31; Am 1.13-15; Sef 2.8-11

8 Iei alon Kot ewe Samol mi Lapalap, “Ekewe chon Moap ra apasa, ‘Nengeni, ekewe chon Juta ra feiengau usun chök chon ekewe fanü meinisin.’ 9 Iei mine üpwe asöönü ewe fanü Moap, pwe epwe tala an kewe telinimw mi nom lekiännin meinisin mi epeti sounfiu ar repwe tolong, pwal ekewe telinimw mi ling lon iter Petesimot, Paalmeon me Kiriataim. 10 Iwe, üpwe ngeni ekewe aramasen ötiu fanüen chon Moap me chon Amon pwe repwe nemeniir, pwe esap wor eman epwe chüen chechemeni ekewe chon Amon me lein ekewe mwü. 11 Iwe, üpwe apwüngü Moap. Mürin repwe silei pwe ngang ewe Samol mi Lapalap.” ✡Ais 15.1–16.14; 25.10-12; Jer 48.1-47; Am 2.1-3; Sef 2.8-11

12 Iei alon Kot ewe Samol mi Lapalap, “Ekewe chon Etom ra fokun apwüngüchouwu chon Juta. Ei sokun föför ra fokun tipis ren. 13 Iei mine ngang Kot ewe Samol mi Lapalap üa apasa: Üpwe ü ngeni Etom o arosala aramasan me mönün lon. Üpwe pwal awili ewe fanü ngeni fanüapö. Iwe, ekewe chon Etom repwe mäla lon maun seni Teman tori Tetan. 14 Nei kewe aramasen Israel repwe ngeni chon Etom chappen ar föför fän itei. Ir repwe eäni ai song me lingeringer ngeni chon Etom. Ren ei repwe silei pwe ngang üa ngeniir chappen ar föför,” iei alon Kot ewe Samol mi Lapalap. ✡Ais 34.5-17; 63.1-6; Jer 49.7-22; Is 35.1-15; Am 1.11-12; Op 1-14; Mal 1.2-5

15 Iei alon Kot ewe Samol mi Lapalap, “Ekewe chon Filistia ra fokun apwüngüchouwu chon Juta fän kirikiringauen letiper o kütta usun ar repwe ataela Juta, pokiten ra oputeer seni me lomlom. 16 Iei mine ngang Kot ewe Samol mi Lapalap üa apasa: Üpwe ü ngeni ekewe chon Filistia. Üpwe ärala ekewe chon Keret o niela chokewe mi chüen manau me lon ekewe fanüen aroset. 17 Üpwe awattela ai üpwe ngeni chon Filistia chappen ar föför o apwüngüür fän ai lingeringer. Lupwen üpwe föri ei, repwe silei pwe ngang ewe Samol mi Lapalap.” ✡Ais 14.29-31; Jer 47.1-7; Sow 3.4-8; Am 1.6-8; Sef 2.4-7; Sek 9.5-7