48
Kapasen osuni fänäsengesin Moap
48.1-47
1 Iei usun mine ewe Samol mi unusen Manaman, ewe Koten Israel a apasa fänäsengesin Moap,
“Feiengauen ekewe aramasen Nepo,
pun ar telinimw a tala.
Kiriataim a itengau o oola.
Ewe imwen maun mi pöchökül
a itengau o tatiu.
2 Esap chüen wor iteüöchün Moap.
Lon Hespon ra rawei usun ar repwe ataela Moap o apasa,
‘Ou etto, ousipwe ärala Moap, pwe esap chüen eu mwü.’
Pwal en ewe telinimw Matmen, kopwe fanafanala,
pun sounfiu repwe maun ngonuk.
3 Oupwe rongorong eu puchör seni Horonaim,
pokiten a fis angangen kata me afeiengau watte.
4 Moap a tala.
Aramas ra rong puchörün ekewe semirit.
5 Ra feitä nge kechü
lon ewe aletä ngeni Luhit,
lon ewe aletiu ngeni Horonaim
aramas ra rong eu puchörün feiengau.
6 Oupwe sü. Oupwe kütta manauemi.
Oupwe sä usun eman aas mi mwacho lon fanüapö.
7 Pokiten oua anomu ämi apilükülük won ämi imwen maun mi pöchökül me won wöümi,
ämi oupwe pwal kuf.
Iwe, Kemos *Kemos eman koten Moap epwe oola
fiti nöün kewe souasor me nöüwis.
8 Ewe chon kata epwe feito won iteiten telinimw,
nge esap wor eu epwe tiwewu.
Ewe lemol epwe tatakis,
nge ewe maasies epwe tala
usun ngang ewe Samol mi Lapalap üa fen kapas.
9 Oupwe awora pöükässin Moap pwe epwe tongeni ässila.
An kewe telinimw repwe tala,
nge esap wor eman epwe nom lor.”
10 A anümamau ätewe mi föri än ewe Samol mi Lapalap angang fän tümwününgau. A anümamau ätewe mi amwöchü an ketilas seni an epwe ni aramas.
11 Iwe, ewe Samol mi Lapalap a üra, “Moap a nom fän kinamwe fansoun meinisin, esap oola mwo fän eu. Moap a usun chök wain mi nonomopos lon lenian, esap niiniwu me lon eu pör o niinilong lon pwal eu. Nennan esap ngauala, nge pwonnan ususun we chök. 12 Iei mine epwe war ewe fansoun, lupwen üpwe tinala aramas repwe niinawu Moap usun ach niinawu wain. Repwe apöwu seni lon lenian o amökkü ekewe pör. Ngang ewe Samol mi Lapalap üa kapas. 13 Mürin Moap epwe lichipüng ren Kemos, usun ekewe chon Israel ra lichipüng, lupwen ra anomu ar apilükülük won Petel.
14 Ämi re Moap, pwota oua apasa pwe ämi sounfiu
me mwän mi pwora lon maun?
15 Moap epwe tala, pwal an kewe telinimw repwe oola.
Nöün kewe alüal mi sipeöch lon maun repwe ninnila.
Ngang ewe King itei ewe Samol mi Unusen Manaman
üa kapas.
16 Feiengauen Moap a arapoto,
an riaföü epwe warakai.
17 Oupwe kechüeiti Moap, ämi chokewe mi nom pwelin ünükün,
pwal ämi meinisin mi silei iteüöchün,
oupwe üra, ‘A fokun wes an nemenem pöchökül,
esap chüen wor an ling me manaman.’
18 Ämi chon Tipon,
oupwe sapwilitiu seni leniemi mi iteföüla
o mot won pwül mi sangang.
Pun ewe chon atai Moap a feito
o ataela ämi kewe imwen maun mi pöchökül.
19 Ämi chon Aroer,
oupwe ütä ünükün ewe al o katol.
Oupwe aisini ekewe mwän me ekewe fefin mi sü,
‘Met a fis?’
20 Repwe pälüeni, ‘Moap a itengau, pun a tatakis.
Oupwe kechü o püchör.
Oupwe asilefeili aroppen ewe chanpupu Arnon
pwe Moap a tala.’
21 Kapwüng a feito won ekewe telinimw lon ewe maasies, won Holon, Jasa me Mefat, 22 won Tipon, Nepo me Pet-tiplataim, 23 won Kiriat-aim, Petkamul me Petmeon, 24 won Keriot, Posra me ekewe telinimw meinisin mi arap me toau lon ewe fanü Moap. 25 Än Moap pöchökül a wesila, nge an pwora a ükütiu. Ngang ewe Samol mi Lapalap üa kapas. 26 Oupwe apucha Moap, pun a ü ngeniei ngang ewe Samol mi Lapalap. Moap epwe sööki lon musan, nge aramas repwe ämängaua. 27 Ifa usun, ämi chon Moap ousap ämängaua Israel? Ifa usun, Israel a pwä me lein chon solä pwe iteiten fansoun, lupwen oua kapas usun, oua elifechifechi möküremi ngeni fän ämängau?
28 Ämi chon Moap, oupwe likiti ämi kewe telinimw o nom lon pwangen ekewe achau. Oupwe usun eman lisom mi fas mesen eu föimw. 29 Chon Moap ra fokun lamalamtekia. Üa rongorong usun ar ürannang, ar lamalamtekia me ar tunosikesik, pwal usun tipetekian leluker. 30 Ngang ewe Samol mi Lapalap üa silei ar sikesik. Ar aingaing a pön, ar föför a lomotongau. 31 Iei mine üpwe ngüngüres fän iten chon Moap meinisin, üpwe letipeta fän iten ekewe aramasen Kir-eres. 32 Üpwe kechüeituk, en Sipma, lap seni ai kechüeiti Jaser. En telinimw Sipma ka wewe ngeni efoch irän wain, palom kewe ra itila pekilan ewe Setin Mäla, pwal tori Jaser. Ewe chon kata a atai uom kewe mi nup me om kewe föün irän wain. 33 Pwapwa me meseik ra katowu seni ewe fanü Moap mi pwülüöch. Üa aükätiu puupuun wain seni ewe lenien wüchüch. Esap wor eman epwe puri ekewe föün irän wain fän mweireiren pwapwa. Ika mwo epwe wor mweir, nge esap mweireiren pwapwa.
34 Ekewe aramasen Hespon me Eleale ra puchör. Ekewe aramasen Jahas ra rong ar puchör, pwal chon Soar tori chon Horonaim me chon Eklat-selisia. Pwal ekewe kolukun Nimrim ra pwasatä. 35 Üpwe aükätiu me lon Moap än ekewe aramas asor won ekewe leni tekia me ar keni apach mi pwokus ngeni ar kewe kot. Ngang ewe Samol mi Lapalap üa kapas. 36 Iei mine lelukei a letipeta o ngüngü usun tikin eu aangün fän iten Moap pwal fän iten ekewe aramasen Kir-eres, pun wöür meinisin ra ionifengeni a rosola. 37 Iwe, ir meinisin ra räisöüla mökürer o fichiela alüser. Ra akinasa pöür o pwölü ngeni wänükür üf seni tuk. 38 Won imwen chon Moap meinisin pwal lon ekewe lenien amwicheich, aramas ra chök kechü. Pun üa amökkü Moap usun eman a amökkü eu pör esap aücheani. 39 Moap a fokun tatakis. Ekewe aramas ra fokun ngüngüres. Moap a kulu sökürün fän säw. A wiliti och minen turunufas me och minen eniweniw ngeni meinisin mi nom pwelin ünükün. Ngang ewe Samol mi Lapalap üa kapas.”
40 Iei alon ewe Samol mi Lapalap, “Nengeni, eu mwü epwe müttir ässitiu won Moap usun eman ikel o ameresala pöükässin won. 41 Epwe liapeni ekewe telinimw me ekewe imwen maun mi pöchökül. Lon ena rän, ekewe sounfiun Moap repwe niuokus usun chök eman fefin, lupwen a tori an cheuchen fam. 42 Moap epwe tala pwe esap chüen eu mwü, pun a püsin atekiatai o ü ngeniei. 43 Niuokus watte, pwang me likatup ra sounikemi, ämi chon Moap. Ngang ewe Samol mi Lapalap üa kapas. 44 Ätewe mi mochen sü seni ewe niuokus epwe turulong lon ewe pwang. Nge ätewe mi towu seni ewe pwang epwe tup lon ewe likatup. Pun ngang ewe Samol mi Lapalap üpwe awarato won Moap ewe fansoun an küna apwüng.
45 Ekewe choisä ra üla fän nürün Hespon lon ar apwangapwang. Iwe, eu ekkei a küwu seni Hespon, eu ngetenget a ngetewu seni imwen Sihon. A kenala kiännin ewe fanü Moap me chukun ewe mwichen aramas mi sani maun. 46 Feiengauom, en Moap. Ekewe aramas mi fel ngeni Kemos ra rosola, nge nöür kewe mwän me fefin ra oola. 47 Nge lon kan fansoun mwach, üpwe aliwinisefäli ekewe chon Moap mi oola. Ngang ewe Samol mi Lapalap üa kapas.” Iei ükütiuen ewe apwüng won Moap. ✡Ais 15.1–16.14; 25.10-12; Is 25.8-11; Am 2.1-3; Sef 2.8-11