1 Oupwe chufengen o amwichafengenikemi, ämi chon ewe mwü esap sile säw, 2 me mwen eman epwe asükemiila usun asepwäl a ässala pön wiich, me mwen epwe wareitikemi än ewe Samol mi Lapalap song mi fokun watte, pwal mwen epwe torikemi ränin än ewe Samol mi Lapalap lingeringer. 3 Oupwe kütta ewe Samol mi Lapalap, ämi meinisin mi tipetekison me lon ewe fanü, ämi mi aleasochis ngeni an kewe allük. Oupwe föri mine a pwüng o atekisonakemi. Eli oua tongeni sü seni ewe apwüng lon ränin än ewe Samol mi Lapalap lingeringer. 4 Pun Kasa epwe pönüla, nge Askalon epwe wiliti eu fanüapö. Ekewe aramasen Astot repwe kasüla leoloas, nge ekewe chon Ekron repwe sä seni telinimwer.

5 Feiengau epwe torikemi, ämi mi imweimw aroset, ämi chon Keret. Ewe Samol mi Lapalap a apwüngala pwe epwe ataela Kanaan, ewe fanüen chon Filistia. Epwe arosakemiila tori esap chüen wor eman lusun. 6 Nge fanüemi mi nom aroset epwe wiliti eu mälämäl, ia chon masen sip ra nom ie me ar lenien sip. 7 Ekewe chon Juta mi chüen manau repwe fanüeni ewe fanü mi nom aroset. Repwe foleni nöür sip won, nge lefäf repwe anut lon imwen chon Askalon. Ewe Samol mi Lapalap ar we Kot epwe kirikiröch ngeniir o aliwini ngeniir wöür.

8 Iei alon ewe Samol mi Unusen Manaman, ewe Koten Israel, “Üa rongorong än chon Moap kapasen turunufas me än chon Amon kapasen ämängau usun nei aramas. Ra tunosikesik pwe repwe liapeni fanüer. 9 Mwo manauei, ekewe fanü Moap me Amon repwe tala usun Sotom me Komora, repwe wiliti eu fanüen pötöwölingau me pwangen salt, repwe eu fanüapö tori feilfeilachök. Nei aramas mi chüen manau repwe angei pisekir fän pöchökül o fanüeni fanüer.” ✡Ken 9.24 10 Iei usun mine epwe fis ngeni chon Moap me chon Amon pwe liwinin ar lamalamtekia, pun ra turunufas o tunosikesik ngeni nöün ewe Samol mi Unusen Manaman aramas. 11 Ewe Samol mi Lapalap epwe eniweer, lupwen epwe ataela ekewe koten fanüfan meinisin. Mürin, chon ekewe mwü meinisin repwe fel ngeni Kot lon en me püsin fanüan.

12 Pwal ämi chon Itiopia, oupwe ninnila ren nöün ketilas. ✡Ais 18.1-7 13 Iwe, Kot epwe aitiela pöün ngeni efeng o ataela Asiria. Epwe föri pwe Ninifa epwe pönüla, epwe eu leni mi pwasapwas usun eu fanüapö. 14 Epwe eu leni ia pwin sip me kow me sokopaten man repwe nom ie. Ekewe fukuro repwe nom letonen ekewe ür, nge tirisin ngüngür epwe towu seni ekewe asammwacho. Ioien pipi repwe nom lon ekewe asamalap, etippen ekewe imw seni setar repwe ripiwu. 15 Iei usun mine epwe fis ngeni ewe telinimw mi tekia o nükünük. Aramasen lon ra ekieki pwe ar telinimw a iteföüla seni ekewe telinimwen fanüfan meinisin. Iei epwe wiliti eu leni mi fokun pönüla, eu leni ia manmwacho ra nom ie. Iteiten eman me eman mi pwere seni epwe ngäri o itiitini. ✡Ais 10.5-34; 14.24-27; Ne 1.1–3.19