10
1 Feiengauemi ämi mi förätä allük mi pwüngingau, pwal ämi mi apwüngala mine aramas repwe riaföü ren. 2 Feiengauemi ämi mi epeti pwüng seni chon riaföü, mi ataela pwüngün chon wöüngau pwe oupwe angemwäli pisekin ekewe fefin mi mä pwülüer me wöün chon mäsen. 3 Iwe, met oupwe föri lon ränin apwüng, lupwen feiengau epwe torikemi seni toau? Iö oupwe süla ren pwe epwe alisikemi, nge ia oupwe aopa wöümi ie? 4 Esap wor och mine oupwe tongeni föri lükün chök ämi oupwe nom lein chon oola ika lein chokewe mi mäla lon maun. Iwe, lon ekei feiengau än Kot song esap kisikisila, nge pöün a chüen afeiengaueer.
Än Kot apwüng ngeni Asiria
10.5-19
5 Ewe Samol mi Lapalap a apasa, “Feiengauen Asiria, ewe mwü üa aea usun efoch wok, pwe üpwe apwüngü chokewe üa songeitiir. ✡Ais 14.24-27; Nah 1.1–3.19; Sef 2.13-15 6 Üa tinala chon Asiria ren chon eu mwü resap niueitiei, nge üa allük ngeniir pwe repwe maun ngeni ekewe aramas üa songeitiir. Repwe angei seniir wöür o soläni pisekir, repwe pwal puriir usun chök pwakaken won al. 7 Iwe, ewe kingen Asiria esap ekieki ina usun, esap pwal tipeni. Nge, a chök ekiekin ataela o arosala chomong mwü. 8 Pun a apasa lon an sikesik, “Ifa usun nei samolun sounfiu, ir resap king meinisin? 9 Ifa usun, üsap liapeni Kalno me Karkemis, Hamat me Arpat, pwal Samaria me Tamaskus? 10 Iwe, ai nemenem a tori ekana mwü mi angang ngeni anümwäl, nge ar uluulun anümwäl ra kon chomong seni ekewe uluulun anümwäl lon Jerusalem me Samaria. 11 Ifa usun, üsap tongeni ataela Jerusalem me an kewe uluulun anümwäl usun chök üa ataela Samaria me an kewe uluulun anümwäl?”
12 Nge ewe Samol a apasa, “Lupwen üa awesala ai angangen apwüng meinisin won ewe chuk Sion pwal won Jerusalem, üpwe pwal apwüngü ewe kingen Asiria pokiten an sikesik me lamalamtekia.” 13 Pun ewe kingen Asiria a apasa lon an sikesik, “Ngang üa föri ekei mettoch meinisin ren ai pöchökül me ai tipachem, pun mi wor ai silelap. Üa ataela kiännin mwü kana o uweela wöür. Ren ai pöchökül mi usun chök pöchökülen eman karopwow mi mwacho üa aturätiu chokewe ra mot won lenien motun king. 14 Iwe, üa angei ekewe mwü meinisin usun eman a angelong lon fasen machang, üa pwal ionifengeni wöür usun eman a ionifengeni sokul esap wor machang wor. Nge esap wor eman a amwökütü pöükässin ika amasala awan pwe epwe tikitik.”
15 Nge ewe Samol mi Lapalap a apasa, “Ifa usun, efoch kouk epwe aingaing ngeni ewe chon falafal, ika efoch ngerenger epwe püsin atekiatä won ewe chon ngerenger? Pun esap tufich pwe efoch wok epwe pöüätä ewe mi amwöchü, esap pwal tufich pwe efoch amwüch epwe äteri eman aramas.” 16 Iei mine ewe Samol, ewe Samol mi Unusen Manaman, epwe tinato samau mi afeiengau ren nöün ewe kingen Asiria sounfiu mi pöchökül, epwe pwal fisala lingan pwe epwe karala. 17 Iwe, Kot ewe saramen Israel epwe wiliti ekkei, Ewe mi Pin lon Israel epwe usun chök ngetenget. Epwe kenala o arosala pwal mwo nge pötöwölingauen Asiria me an iräfölüföl lon eu chök rän. 18 Ewe Samol mi Lapalap epwe wesewesen ataela än Asiria wöllap mi ling me an kewe tanipi mi mürina, usun chök ika eu samau mi afeiengau a niela eman aramas. 19 Nge ekewe irä mi chüen nom repwe fokun chokisikis, pwe eman semirit epwe tongeni aleaniir.
Ekewe lusun chon Israel mi chüen manau
10.20-27
20 Iwe, epwe fis lon ewe rän, pwe ekewe lusun chon Israel, chokewe mi chüen manau seni mwirimwirin Jakop, resap chüen anomu ar apilükülük won ewe mwü mi afeiengaueer, nge repwe anomu ar apilükülük won ewe Samol mi Lapalap, Ewe mi Pin lon Israel. 21 Iwe, ekoch chon Israel mi chüen manau repwe liwinsefäliti ar we Kot mi manaman. 22 Pun inamwo ika ekewe chon Israel ra chomong usun chök pien aroset, ekoch chök leir repwe liwinsefäl. Iwe, Kot a apwüngala fän pwüng an epwe afeiengaua chon Israel. 23 Ewer, ewe Samol, ewe Samol mi Unusen Manaman, epwe apwönüetä an apwüng won unusen ewe fanü, pun ina mine a apwüngala. ✡Rom 9.27 24 Iwe, ewe Samol mi Lapalap, ewe Samol mi Unusen Manaman, a apasa, “Nei aramas kana mi imweimw lon Sion, ousap niuokusiti ekewe chon Asiria. Inamwo ika ra ariaföüükemi usun chök mine ekewe chon Isip ra föri me lom. 25 Pun mürin fansoun mochomoch chök ai song ngenikemi epwe wes, nge mürin üpwe song ngeni ekewe chon Asiria pwe repwe feiengau. 26 Iwe, ngang ewe Samol mi Unusen Manaman üpwe wichiir ren efoch säl usun üa wichi chon Mitian arun ewe achau Orep. Üpwe pwal aitetä woki wor usun üa aitiela woki won ewe matau, lupwen üa afeiengaua chon Isip. 27 Iwe, epwe fis lon ewe rän, pwe üpwe angei seni won afaremi ewe wosochou me ren chon Asiria, nge ar we waas esap chüen nom lükün üemi.”
Sounfiun Asiria ra fetalelong lon Juta
10.28-34
28 Iwe, ekewe sounfiun Asiria ra arapoto seni Rimmon, ra tori Aiat, ra lu seni Mikron, nge ra iseni ar pisek lon Mikmas. 29 Ra feila pekilan ewe chuk, nge lon ewe pwinin ra annut Kepa. Iwe, chon Rama ra chechech fän niuokus, nge chon Kipea, ewe telinimwen ewe king Saul, ra süla. 30 Oupwe pupuchör, ämi chon Kallim! Oupwe rongorong ar puchör, ämi chon Laisa, oupwe palüeniir, ämi chon Anatot! 31 Iwe, chon Matmena ra sü, nge ekewe chon Kepim ra kütta ar lenien op. 32 Ikenai ekewe sounfiun Asiria repwe asösö lon Nop, ikenan repwe pwal aköü pöür ngeni ewe chuk Sion, ngeni ewe telinimw Jerusalem.
33 Nengeni, ewe Samol, ewe Samol mi Unusen Manaman, epwe atururetiu o pöküretiu usun eman a pökü palen irä ren an pöchökül mi fokun eniwokus. Iwe, ekewe mi tekia repwe pöküpök, nge ekewe mi lamalamtekia repwe küna tekison. 34 Iwe, ewe Samol mi Lapalap epwe ukufirela usun eman a ukufala irän lein wöllap ren efoch kouk, usun eman a pöküela ekewe irän won Lepanon mi fokun lingöch.