Nahum
Kapas akom
I. Iten ei puk: Nahum, pun mine a mak lon, künaen Nahum. Wewen ei it Nahum: Ewe chon achipachip.
II. Chon makei ei puk: Nahum
III. Itelapemongen ei puk: Kot epwe ngeni aramas meinisin chappen ar föför, pun i a pin.
IV. Kapas aüchean ei puk: Pokiten ewe Samol mi Lapalap a pin o kirikiröch, epwe awarato apwüng won chon Ninifa mi tipis, nge epwe tümwünü ekewe chon pwüng lon Juta.
V. Masouen ei puk Nahum: Kapasen lon ei puk a usun chök echö köl mi pwärätä pwapwa ren talan Ninifa ewe samolun telinimwen Asiria. Ei mwün Asiria a fokun oput chon Israel o ariaföüür. Ewe soufos Nahum a pwärätä pwe talan Ninifa mi fis lon ewe ier 612 mwen Kraist (B.C.), än Kot apwüng ngeni chon eu mwü mi fokun ariaföüü aramas o lamalamtekia.
VI. Tettelin masouen ei puk:
Än Kot apwüng epwe tori Ninifa 1.1-15
Talan ewe telinimw Ninifa 2.1–3.19
1
Kot a song ngeni Ninifa
1.1-14
1 Iei än Kot kapas usun ewe telinimw Ninifa. Lon ei puk a mak künaen Nahum ewe re Elkos. ✡Ais 10.5-34; 14.24-27; Sef 2.13-15
2 Ewe Samol mi Lapalap i eman Kot mi lukomong.
A apwüngü chokewe mi ü ngeni.
Lon an song a ngeni chon oputan chappen ar föför.
3 Ewe Samol mi Lapalap a mang le song,
nge a fokun manaman,
esap likitala an epwe apwüngü ewe chon tipis.
Ia ewe Samol mi Lapalap a fetal ie, a fis mölümöl,
nge ekewe kuchu pipisüsün fän pechen.
4 A apwüngü ewe matau o apwasapwasatä,
a akotätä ekewe chanpupu meinisin.
Ekewe tanipi lon Pasan ra aiolol,
irän won ewe chuk Karmel ra oleol lechör,
nge ekewe pön irän Lepanon ra aiemämä.
5 Ekewe chuk ra chechech me mwen ewe Samol mi Lapalap,
nge ekewe chukutekison ra sönüla,
fanüfan me meinisin mine a nom won ra chechech me fän mesan.
6 Iö a tongeni ütä me mwen an song?
Iö a tongeni nom fän watten an song?
An lingeringer a kü usun ekkei,
nge ekewe achau ra mökküfesen me mwan.
7 Ewe Samol mi Lapalap a kirikiröch,
a tümwünü nöün aramas lon
fansoun riaföü,
a silei chokewe mi anomu ar apilükülük won.
8 Nge epwe arosala chokewe mi ü ngeni ren eu lölö mi pumong,
epwe asüelong chon oputan lon rochopwak.
9 Met oua eäni rawangau ngeni ewe Samol mi Lapalap?
I epwe arosakemiila.
Esap wor eman a tongeni pälüeni Kot fän ruu.
10 Oupwe karala usun irafölüföl mi likäräfit,
pwal usun fetilipwas. 11 A wor eman a feito senuk, Ninifa, a rawangauei ewe Samol mi Lapalap o eäni kapasen öüröür mi ngau.
12 Iei alon ewe Samol mi Lapalap ngeni chon Israel, “Inamwo ika chon Asiria ra pöchökül o chomong, repwe chök kärila o rosola. Nei aramas, üa ariaföüükemi, nge üsap chüen ariaföüüsefälikemi. 13 Iei üpwe awesi än Asiria nemenem womi o mwüti föfömi.”
14 Ewe Samol mi Lapalap a föri eu allük fän itom, Ninifa, o apasa, “Esap chüen wor mwirimwirum repwe sopwela itom. Üpwe ataela ekewe uluulun anümwäl mi fal, pwal ekewe seni mächä me lon imwen om kewe kot. Üpwe tuw peiasom, pun ka fokun manauangau.”
Pworausen asilesil usun talan Ninifa
1.15–2.12
15 Nengeni, eman chon künö a feito won ekewe chuk, a uwato pworausen asilesil mi mürina o asilefeili kinamwe. Ämi chon Juta, oupwe föri ämi kewe chulap o apwönüetä ämi kewe pwon. Pun ekewe aramasangau resap chüen liwinitikemi o maun ngenikemi. Ra fokun rosola. ✡Ais 52.7