Amos
Kapas akom
I. Iten ei puk: Amos, pun mine a mak lon, an kapasen osuni me künaan. Wewen ei it Amos: Eman mi uwei och wosochou.
II. Chon makei ei puk: Amos
III. Itelapemongen ei puk: Kot a oput föför mi ngau, an kewe allük ra pin.
IV. Kapas aüchean ei puk: Ewe soufos Amos a afalafala ekewe chon Israel pwe repwe aier seni ar tipis.
V. Masouen ei puk Amos: Ei mwän Amos i ewe aemanün soufos a mak chomong an kewe afalafal. Inamwo ika i eman chon Juta seni ewe telinimw Tekoa, nge a afalafal ngeni ekewe chon Israel, ewe mwün Efeng, arapakan ngeni ewe ier 760 mwen Kraist (B.C.). Ei fansoun eu fansoun pisekisekila, eu fansoun achocho lon pekin lamalam me eu fansoun nonom fän kinamwe. Nge Amos a küna pwe ekewe chon wöümong chök ra pisekisekila pokiten ar pwüngingau ngeni ekewe chon wöüngau o ariaföüür. A pwal küna pwe ar achocho lon pekin lamalam esap seni lon leluker, nge ar nonom fän kinamwe esap let. Amos a afalafal fän pwora, pwe Kot epwe apwüngü ekewe chon Israel. A fönöör pwe repwe eänifochei pwüngüöch usun eu chanpupu a pupufochofoch. A üra, “Eli Kot, ewe Samol mi Unusen Manaman epwe ümöümöch ngeni chokewe mi chüen manau me lein chon Israel” (5.15).
VI. Tettelin masouen ei puk:
Kapasen osuni usun feiengauen chon ekewe mwü ünükün Israel 1.1–2.5
Kapasen osuni usun feiengauen chon Israel 2.6–6.14
Künaan Amos usun än Kot apwüng 7.1–9.10
Kapasen osuni usun än Kot epwe aliwinisefäli chon Israel o afisisefäli mwüür 9.11-15
1
Kapasen apwüng fänäsengesin chon ekewe mwü ünükün Israel
1.1–2.5
1 Ikkei ekewe kapas än Am, eman chon masen sip seni Tekoa. Ruu ier mwen ewe chechechin fanü, lupwen Usia a king lon Juta, nge Jeropoam nöün Jehoas we a king lon Israel, Kot a pwäri ngeni Am ekei mettoch fänäsengesin Israel. ✡2.King 14.23-29; 15.1-7; 2.Kron 26.1-23 2 Iwe, Am a üra,
“Ewe Samol mi Lapalap a leüömong le kökkö seni ewe chuk Sion
o aronga mwelian seni Jerusalem.
Ekewe lenien enen sip ra pwasala,
ewe fetil won ewe chuk Karmel a aiolol.” ✡Sow 3.16
3 Iei alon ewe Samol mi Lapalap, “Chon Tamaskus ra chök sopwela le föri tipis, iei mine üpwe fokun apwüngüür. Ra wichi chon Kiliat ren pisekin wichiwich seni mächä, usun eman a wichi umwun wiich. 4 Iei mine üpwe tinala ekkei pwe epwe kenala imwen ewe king Hasael me ekewe imwen maun mi pöchökül än Penhatat. 5 Üpwe ataetiu asamalapen ewe telinimw Tamaskus o ärala chokewe mi imweimw lon ewe lemolun Awen, pwal ätewe mi nemenem lon Peteten. Iwe, ekewe chon Siria repwe oola Kir.” Iei usun mine ewe Samol mi Lapalap a apasa.
6 Iei alon ewe Samol mi Lapalap, “Chon Kasa ra chök sopwela le föri tipis, iei mine üpwe fokun apwüngüür. Ra liapeni chon eu mwü meinisin o amömörela ngeni chon Etom. 7 Iei mine üpwe tinala ekkei pwe epwe kenala tittin ewe telinimw Kasa me an kewe imwen maun mi pöchökül. 8 Üpwe ärala ekewe mi nemenem lon Astot me Askalon. Üpwe maun ngeni chon Ekron, tori ekewe chon Filistia mi chüen manau repwe rosola.” Iei usun mine Kot ewe Samol mi Lapalap a apasa. ✡Ais 14.29-31; Jer 47.1-7; Is 25.15-17; Sow 3.4-8; Sef 2.4-7; Sek 9.5-7
9 Iei alon ewe Samol mi Lapalap, “Chon Tirus ra chök sopwela le föri tipis, iei mine üpwe fokun apwüngüür. Ra liapeni o amömöla chon eu mwü meinisin ngeni Etom, nge resap chechemeni ewe pwonen pwipwi. 10 Iei mine üpwe tinala ekkei pwe epwe kenala tittin ewe telinimw Tirus me an kewe imwen maun mi pöchökül.”
11 Iei alon ewe Samol mi Lapalap, “Chon Etom ra chök sopwela le föri tipis, iei mine üpwe fokun apwüngüür. Ra tapweri pwiir kewe chon Israel fän ketilas, nge resap eäni tong ngeniir. Esap wor aükükün ar song, nge ra chök amwöchüfochei. 12 Iei mine üpwe tinala ekkei pwe epwe kenala ewe telinimw Teman me ekewe imwen maun mi pöchökül lon Posra.” ✡Ais 34.5-17; 63.1-6; Jer 49.7-22; Is 25.12-14; 35.1-15; Op 1-14; Mal 1.2-5
13 Iei alon ewe Samol mi Lapalap, “Chon Amon ra chök sopwela le föri tipis, iei mine üpwe fokun apwüngüür. Ra tileni luken fefin mi pwopwo me lon Kiliat, lupwen ar maun fän iten ar repwe awatteela kiännin fanüer. 14 Iei mine üpwe aküw eu ekkei pwe epwe kenala tittin ewe telinimw Rapa me an kewe imwen maun mi pöchökül. Epwe wor arükak lon ewe ränin maun, nge ewe maun epwe usun chök eu mölümöl. 15 Ar we king me nöün kewe nöüwis repwe oola.” Iei usun mine ewe Samol mi Lapalap a apasa. ✡Jer 49.1-6; Is 21.28-32; 25.1-7; Sef 2.8-11