4
1 Iei met üpwe sopwela le apasa: Eman nau epwe angei mettochun saman meinisin, nge lupwen fansoun a chüen eman semirit, a usun chök eman amanau, inamwo ika i a wesewesen eäni ekewe mettoch meinisin. 2 Lupwen a chüen eman semirit, mi wor mwän ra wisen tümwünü i o nemeni mettochun kewe tori ewe fansoun mi kefilitä me ren saman we. 3 Ina chök pwal usun kich. Lupwen sia chüen semirit lon ach souläng, sia nonom fän nemenien ekewe ngün mi nemeni ei fanüfan. 4 Nge lupwen a war ewe fansoun mi kapwüngüla, Kot a tinato püsin Nöün. A uputiu seni eman fefin o a nonom fän ekewe Allük, 5 pwe epwe angasa chokewe mi nonom fän ekewe Allük, pwe sipwe tolong lon tettelin nöün Kot.
6 Iwe, pokiten ämi oua nöün Kot, Kot a tinato Ngünün Nöün we lon lelukemi, ewe Ngün mi apasa, “Sam, Semei!” 7 Iei mine ämi ousap chüen usun amanau, pun oua nöün. Nge pokiten oua nöün, Kot epwe ngenikemi meinisin mine a iseis fän iten nöün kana. ✡Rom 8.15-17
Paulus a öüreki ekewe soulängin Kalatia
4.8-20
8 Me lom, lupwen ousap silei Kot, oua nonom fän nemenien ekewe ngün esap ir kot. 9 Nge iei oua silei Kot, ika üpwe tongeni apasa, pwe iei Kot a silekemi, pwota oua mochen kulsefäliti ekewe ngün mi apwangapwang o attong? Pwota oua mochen oupwe nomsefäl fän nemenier? 10 Oua pinini ekoch rän, maram, kinikinin fansoun me ekoch ier. 11 Üa öürekikemi! Ifa usun, epwe tufich pwe ai angang ngenikemi a lomotongau?
12 Ämi pwii kana, üa fokun tüngor ngenikemi, pwe oupwe wewe ngeniei, pun pwal ngang üa wewe ngenikemi. Ämi ousap föri och mi mwäl ngeniei. 13 Oua silei pwe pokiten üa samau üa afalafala ewe Pworausen Manau ngenikemi lon ewe aeuin fansoun. 14 Nge inamwo ika lapalapen inisi a fokun aweiresikemi, nge ousap turunufaseei ika pöütieila. Iwe, nge oua fen etiwaei usun ämi oua etiwa eman chon läng, oua etiwaei usun ämi etiwa Kraist Jesus. 15 Ämi oua fokun pwapwa! Met a fis ngenikemi iei? Püsin ngang üa tongeni pwärätä, pwe are epwe tufich oupwe alusawu föün mesemi o ngeniei. 16 Iwe, ifa usun, üa wiliti eman chon oputemi iei, pokiten ai ürenikemi mine a let?
17 Iwe, ekewe ekoch aramas ra achocho le chäächäärikemi, nge popun ar chäächäärikemi esap mürina. Ra chök mochen aimwüfesenikich, pwe oupwe chäächääriir usun chök ir ra chäächäärikemi. 18 A öch ach sipwe achocho le chäächääri eman ren eu popun mi mürina. Ei a pwüng fansoun meinisin, nge sap chök lupwen ai nom remi. 19 Ämi nei kana mi achengicheng! Üa usun chök eman fefin lon fansoun an nöünöü. Üa mefi ei sokun metek fänäsengesimi tori manauen Kraist epwe fis lomi. 20 Üa fokun äneän ai üpwe nonom remi iei, pwe üpwe tongeni siwili itiitin ai kapas ngenikemi. Ngang üa fokun öürekikemi!
Kapasen awewe usun Hakar me Sara
4.21-31
21 Üa mochen aisini iö kewe me leimi ra mochen nonom fän nemenien ekewe Allük: Ifa usun, oua wesewesen weweiti mine ekewe Allük ra apasa? 22 A mak pwe a wor ruoman nöün Apraham ät, eman a nöüni me won eman amanau fefin, nge eman a nöüni me won eman fefin mi ngas. ✡Ken 16.15; 21.2 23 Nöün we ät a nöüni me won ewe amanau fefin a uputiu lon lapalapen än aramas uputiu. Nge nöün we a nöüni me won ewe fefin mi ngas a uputiu lon pwüngün än Kot we pwon. 24 Ekei mettoch sia tongeni awewe ngeni eu lios: Ekewe ruoman fefin ra aliosunätä ruu pwon. Nöün ewe fefin Hakar kewe mi up seni ir amanau. Hakar a aliosunatä ewe pwon mi fis me won ewe chuk Sinai. 25 Hakar mi wewe ngeni ewe chuk Sinai lon Arapia a aliosunätä ewe telinimw Jerusalem ikenai, aramasen lon meinisin ir amanau. 26 Nge ewe Jerusalem lon läng mi ngas, iei i inach. 27 Pun a mak lon ekewe Toropwe mi Pin,
“Kopwe pwapwa en fefin mi rit!
Kopwe kökkö fän leüömong
o mweireir fän pwapwa,
en neminewe esap toruk cheuchen fam!
Pun ewe fefin mi aleman epwe wor chomong nöün,
lap seni ewe fefin mi wor pwülüan.” ✡Ais 54.1 28 Ämi pwii kana, iei ämi oua nöün Kot pokiten an we pwon, usun chök Isaak. 29 Lon ena fansoun ewe nau mi uputiu lon lapalapen än aramas uputiu a ariaföüü ewe eman mi uputiu ren manamanen ewe Ngünün Kot. Iei usun a pwal fis ikenai. ✡Ken 21.9 30 Nge met a mak lon ekewe Toropwe mi Pin? A mak, “Kopwe asüela ewe amanau fefin me nöün we, pun nöün ewe amanau fefin esap eti nöün ewe fefin mi ngas le wöüni wöün ewe sam.” ✡Ken 21.10 31 Iei mine ämi pwii kana, sisap nöün ewe amanau fefin, nge sia nöün ewe fefin mi ngas.