1 Ämi chon Kalatia oua tiparoch! Iö a arocha letipemi? Ngang üa afata ngenikemi mwen mesemi usun än Jesus Kraist mäla won iräpenges. 2 Oupwe pölüeni ngeniei ewe eu chök kapas ais, “Ifa usun, oua angei ewe Ngünün Kot ren ämi apwönüetä pwüngün ekewe Allük, ika ren ämi rongorong o lükü ewe Pworausen Manau?” 3 Pwota a iei me tiparochumi? Oua popuetä ämi souläng ren ewe Ngünün Kot, ifa usun, oua mochen sopwela ämi souläng iei lon fituk? 4 Ifa usun, a lomotongau ekewe mettoch ra fis ngenikemi? Enlet, mi wor lomoter! 5 Ifa usun, Kot a ngenikemi Ngünmifel o föri manaman leimi pokiten oua apwönüetä pwüngün ekewe Allük, ika pokiten oua rongorong o lükü ewe Pworausen Manau?

6 Oupwe ekieki usun mine a fis ngeni Apraham. Usun a mak lon ekewe Toropwe mi Pin, “Apraham a lükü Kot, nge pokiten an lükülük a küna pwüng me ren Kot.” ✡Ken 15.6; Rom 4.3 7 Iei mine oupwe silei, pwe ekewe wesewesen mwirimwirin Apraham, ir ekewe aramas mi wor ar lükülük. ✡Rom 4.16 8 Ekewe Toropwe mi Pin ra fen pwärätä me mwan, pwe Kot epwe anomu ekewe chon lükün Israel lon tettelin chon pwüng ren ar lükülük. Iei usun mine a mak lon ekewe Toropwe mi Pin usun ewe Pworausen Manau a tori Apraham, “Aramas meinisin won fanüfan repwe küna feiöch reöm.” ✡Ken 12.3 9 Apraham a lükü Kot o a feiöch ren, iei usun chokewe mi lükü Kot repwe pwal feiöch usun Apraham.

10 Iwe, chokewe meinisin mi anomu ar apilükülük won ar aleasochisi ekewe Allük ra anümamau. Pun a mak lon ekewe Toropwe mi Pin, “Iö esap aleasochisi meinisin mine a mak lon ewe puken Allük epwe anümamau!” ✡Tut 27.26 11 Iwe, iei a fat pwe esap wor eman aramas epwe küna pwüng me ren Kot ren an apwönüetä ekewe Allük, pun a mak lon ekewe Toropwe mi Pin, “Ewe chök aramas mi küna pwüng me ren Kot epwe manau ren an lükülük.” ✡Ap 2.4 12 Nge ekewe Allük resap longolong won lükülük, pun iei usun mine a mak lon ekewe Toropwe mi Pin, “Iö a föri pwüngün ekewe Allük epwe manau.” ✡Lif 18.5

13 Nge ren än Kraist küna anümamau fän itach a angasakich seni ewe anümamau ekewe Allük ra atoto woch, pun a mak lon ekewe Toropwe mi Pin, “Iö a mwöch won efoch irä a anümamau me ren Kot.” ✡Tut 21.23 14 Kraist a föri ei, pwe ewe feiöch Kot a pwon ngeni Apraham epwe tori ekewe chon lükün Israel ren Kraist Jesus, pwe ren ach lükü sipwe angei ewe Ngünmifel Kot a fen pwon ngenikich.

15 Ämi pwii kana, üpwe eäni eu pworausen awewe usun nonomun aramas: Lupwen ruoman aramas ra tipeeufengen won och o saini eu toropwen atipeeu, esap fokun wor eman a tongeni atai ewe toropwen atipeeu ika apacha och ngeni mürin an sain. 16 Iwe, Kot a föri an pwon ngeni Apraham me mwirimwirin we. Lon ekewe Toropwe mi Pin esap mak “mwirimwirin kana”, wewen chomong aramas, nge a mak “mwirimwirin we”, wewen eman chök aramas, iei i Kraist. ✡Ken 12.7 17 Iei usun mine üa mochen apasa: Kot a föri eu pwonen atipeeu ngeni Apraham o pwon ngeni pwe epwe apwönüetä. Ekewe Allük Kot a ngeni ekewe chon Israel föpükü ilik ier mürin resap tongeni atala ewe pwonen atipeeu, esap pwal tongeni amorala än Kot we pwon. ✡Eks 12.40 18 Pun are än Kot we lifang epwe longolong won ekewe Allük, mürin esap chüen longolong won än Kot pwon. Nge Kot a ngeni Apraham ei lifang pokiten an we pwon. ✡Rom 4.14

19 Iwe, met popun a wor ekewe Allük? Kot a apachatä ekewe Allük ngeni ewe pwonen atipeeu ar repwe aiti ngeni aramas ar föför mi mwäl, repwe pwal nonom tori epwe war mwirimwirin Apraham we, ätewe Kot a eäni ewe pwon fän itan. Ekewe chon läng ra uwätiu ekewe Allük le pöün eman chon afför lefilen Kot me aramas. 20 Esap wor lomoten eman chon afför lupwen a wor eman chök aramas, pun Kot eman chök.

21 Iwe, ifa usun, wewen ei pwe ekewe Allük ra ü ngeni än Kot kewe pwon? Apwi, esap fokun ina! Pun are aramas ra angei eu allük mi atoto manau, mürin ir meinisin repwe tongeni küna pwüng me ren Kot ren ar aleasochis ngeni ei allük. 22 Nge a mak lon ekewe Toropwe mi Pin pwe unusen fanüfan a nom fän nemenien tipis. Iei mine ewe lifang Kot a pwon, a longolong won än eman lükü Jesus Kraist, a tori chokewe mi lükü.

23 Nge mwen ewe fansoun ewe lükülük esamwo wor, ekewe Allük ra fötekinikich tori wareton ei lükülük epwe pwäpwäla. 24 Iei usun ekewe Allük ra nemenikich tori Kraist a war, pwe sia tongeni küna pwüng me ren Kot ren ach lükülük. 25 Nge iei otun ewe lükülük a war, ekewe Allük resap chüen nemenikich. 26 Lon Kraist Jesus ämi meinisin oua nöün Kot ren ämi lükü. 27 Pun ämi meinisin mi fen papatais lon Kraist oua manaueni manauen Kraist. 28 Esap wor sokofesenin lefilen chon Juta me chon lükün Israel, lefilen amanau me aramas mi ngas, lefilen mwän me fefin, pun ämi meinisin oua eufengen lon Kraist Jesus. 29 Are ämi oua nöün Kraist, mürin oua mwirimwirin Apraham, iwe, oupwe angei ewe mine Kot a fen pwonei. ✡Rom 4.13