1 Iwe, ewe Samol mi Lapalap a üreni Moses me Aaron lon ewe fanü Isip, 2 “Ei maram epwe iei aeuin maramen ier ngenikemi. 3 Kopwe kapas ngeni ekewe chon Israel, pwe lon engolun pwinin ei maram eman me eman mwän epwe angei eman lam *lam eman apanen sip a aliosunätä usun Jesus Joh 1.29-36 fän iten en me an famili, eman lam nge eu famili. 4 Nge ika eu famili a chokükün pwe esap it eman lam rer, repwe inetfengen won me chon arur. Repwe püsin aükü ükükün fiteman aramas repwe eti, pwal ükükün ochän eman. 5 Ewe man oupwe afili, epwe eman ätemwän eu ierin esap wor terin. Oupwe angei seni me lein ekewe pwiin sip ika kuuch. 6 Oupwe iseis ekewe lam tori engol me rüanün pwinin ei maram. Nge lekuniolupwin unusen ewe mwichen chon Israel repwe niela nöür lam. 7 Mürin repwe angei ekis chan ewe lam o tofi ngeni penkasamen imwer lepekin me ruepek, pwal me asan, ewe ia ra ochoch ewe lam ie. 8 Iwe, lon ewe pwin repwe arapa fitukan o ochoch fiti pilawa esap wor iis lon me chön irä mi kipwin. 9 Ousap ochamas ika kuku lon koluk, nge oupwe arapa fiti möküran me pechen pwal masouen lon. 10 Iwe, ousap fokun likiti ekis lusun tori lesosor. Nge mine esap it remi tori lesosor oupwe kenala. 11 Epwe iei usun lapalapemi le mongö: Oupwe ri lukalapemi, oupwe ipweip sus o amwöchü wokumi lepöümi. Oupwe tawat le mongö. Ei Pasofer än ewe Samol mi Lapalap. 12 Pun lon ewe pwinin üpwe fetalfeil lon ewe fanü Isip o niela ekewe mwänichi meinisin lein aramas me ekewe mweinöün man. Iwe, üpwe awarato ai apwüng won ekewe koten Isip meinisin, pun ngang ewe Samol mi Lapalap. 13 Ewe cha epwe eu asisilen imwemi, pun lupwen üpwe küna ewe cha, üpwe lus me womi. Esap wor feiengau epwe kükemi, lupwen üpwe afeiengaua ekewe chon Isip. ✡Lif 23.5; Num 9.1-5; Tut 16.1-2

14 Ei rän epwe eu ränin chulap fän itemi. Lon ei rän oupwe chechemeni mine ngang ewe Samol mi Lapalap üa föri. Seni eu täppin aramas tori eu täppin oupwe föri pwüngün ei rän tori feilfeilachök. 15 Lon ükükün fisu rän oupwe mongö pilawa esap wor iis lon. Lon aeuin rän oupwe atowu ewe pilawa a wor iis lon me lon imwemi, pun ika eman me leimi epwe mongö och fiti iis seni aeuin rän tori afisuan, epwe käriwu me lein chon Israel. 16 Iwe, lon aeuin rän oupwe föri eu mwich mi pin, pwal lon ewe afisuen rän. Ousap angang lon ekana rän, mine chök oupwe eni oupwe amolätä. 17 Oupwe föri ewe chulapen mongö pilawa esap wor iis lon, pun lon ewe rän üa emwenawu ämi mwicheichen aramas seni lon ewe fanü Isip. Iei mine oupwe föri pwüngün ei rän seni eu täppin aramas tori eu täppin feilfeilachök. 18 Iwe, lekuniolupwinin ewe engol me rüanün ränin ewe aeuin maram oupwe mongö pilawa esap wor iis lon tori lekuniolupwinin ewe rüe me aeuin rän. 19 Iwe, lon ükükün fisu rän esap wor lon imwemi pilawa mi wor iis lon, pun ika eman epwe mongö och fiti iis, epwe käriwu me lein ekewe aramasen Israel. Ese lifilifil ika i eman chon ekis ika i eman chon wilipos. 20 Ousap fokun mongö och fiti iis, pun lon leniemi meinisin oupwe chök mongö pilawa esap wor iis lon.” ✡Eks 23.15; 34.18; Lif 23.6-8; Num 28.17-25; Tut 16.3-8

21 Mürin, Moses a körato ekewe souakomwen Israel meinisin o üreniir, “Oupwe afili ekewe man fän itemi ükükün chochon ämi famili o niela ewe lamen Pasofer. 22 Iwe, oupwe angei ulun ewe irä itan isop o otukalong lon ewe sepien cha. Mürin oupwe tofi ewe cha ngeni penkasamen imwemi lepekin me ruepek pwal asan. Nge esap wor eman epwe towu seni imwan tori lesosor. 23 Pun ewe Samol mi Lapalap epwe fetalfeil lon ewe fanü pwe epwe niela chon Isip. Nge lupwen epwe küna ewe cha won penkasamen imwemi lepekin me ruepek pwal asan, epwe lus me won imwemi. Iwe, esap mwüt ngeni ewe chon ninni epwe tolong lon imwemi o niikemi. ✡Ipr 11.28 24 Oupwe föri pwüngün ei rän fän itemi pwal fän iten nöümi kana tori feilfeilachök. 25 Iwe, lupwen oupwe tori ewe fanü ewe Samol mi Lapalap a pwon pwe epwe ngenikemi, oupwe tümwünü pwüngün angangen ei rän. 26 Pun lupwen nöümi repwe aisinikemi, ‘Met wewen ei angang?’, 27 oupwe üreniir, ‘Iei asorun än ewe Samol mi Lapalap Pasofer. Pun a lus me won imwen ekewe aramasen Israel lon Isip, lupwen a niela ekewe re Isip, nge esap niikich.’ ” Mürin, ekewe aramas ra chapetiu o fel ngeni Kot. 28 Iwe, ekewe aramasen Israel ra feila o föri meinisin usun mine ewe Samol mi Lapalap a allük ngeni Moses me Aaron.

29 Iwe, lukenipwin ewe Samol mi Lapalap a niela mwänichi meinisin lon ewe fanü Isip, seni nöün Farao mwänichi epwe siwili lon wisan wisen king, tori mwänichien nöün chon fötek mi nom lon imwen fötek, pwal mweinöün ekewe man meinisin. ✡Eks 4.22-23 30 Iwe, Farao a pwätä lon ewe pwinin, i me nöün kewe nöüwis me chon Isip meinisin. Iwe, a fokun wor kechü me ngüngüres watte lon Isip, pun lon imw meinisin a wor mönümä. 31 Nge lon chök ewe pwinin Farao a titi Moses me Aaron o üreniir, “Oupwe towu seni lein nei aramas, ämi me ekewe aramasen Israel. Oupwe feila! Oupwe fel ngeni ewe Samol mi Lapalap, usun oua fen apasa. 32 Oupwe angei nöümi sip me kow o feila usun oua fen apasa, nge oupwe pwal afeiöchüei.”

33 Iwe, ekewe chon Isip ra pesei ngeni ekewe chon Israel pwe repwe müttir towu seni ewe fanü, pun ra apasa, “Kich meinisin sipwe le mäla.” 34 Iwe, ekewe aramas ra angei ener pilawa mi öüwöü esamwo wor iis lon fiti sepier le öüwöü o firoskini, pwe repwe öüafara. 35 Nge ekewe aramasen Israel ra fen föri usun mine Moses a üreniir, pun ra tüngor seni ekewe chon Isip fout seni silifer me kolt pwal mangaku. 36 Iwe, ewe Samol mi Lapalap a ngeni ekewe aramas ümöümöch me ren ekewe chon Isip, pwe ra mwüt ngeniir mine ra tüngor. Iei usun ra angeala wöün chon Isip. ✡Eks 3.21-22

37 Iwe, ekewe aramasen Israel ra sai seni Rameses, pwe repwe sai ngeni Sukot. Iteiten ekewe mwän mi asai wonopükü ngeröü lükün fefin me semirit. 38 Pwal chomong sokopaten mwichen aramas ra etiir fiti chomong pwiin sip me kow. 39 Ra umuni ewe pilawa esap wor iis lon ra uweela seni Isip. Pokiten chon Isip ra asürela, resap tongeni witiwit pwe ewe pilawa epwe po, resap pwal tongeni amolätä amötür.

40 Iwe, ekewe aramasen Israel ra nonom Isip lon ükükün föpükü ilik ier. ✡Ken 15.13; Kal 3.17 41 Lon amüchülan ränin ekewe föpükü ilik ier, ekewe mwicheichen aramas än ewe Samol mi Lapalap meinisin ra towu seni ewe fanü Isip. 42 Nge lon ewe pwinin ewe Samol mi Lapalap a mamas pwe epwe emwenirewu seni ewe fanü Isip. Iei mine ekewe aramasen Israel repwe mamas lon ei pwinin pwe repwe asamolu ewe Samol mi Lapalap, seni eu täppin aramas tori eu täppin.

43 Iwe, ewe Samol mi Lapalap a kapas ngeni Moses me Aaron, “Iei allükün ewe Pasofer: Esap wor eman re ekis epwe mongö seni. 44 Nge iteiten amanau mi mön moni ra tongeni mongö seni mürin ar sirkomsais. 45 Esap wor eman chon siamü ika chon angang mi angei liwin epwe tongeni mongö seni. 46 Oupwe mongö ewe mongön Pasofer lon en me imwan, nge ousap uweela och fituk lükün imwemi. Ousap kupi efoch chün ewe lamen Pasofer. ✡Num 9.12; Joh 19.36 47 Iwe, ekewe chon Israel meinisin repwe föri pwüngün ei rän. 48 Nge ika eman re ekis mi nom remi a mochen choni ewe mongön Pasofer än ewe Samol mi Lapalap, mwänin lon an we famili meinisin repwe akomwen sirkomsais. Mürin epwe tongeni choni. Iwe, epwe usun chök eman re wiliposun ewe fanü. Nge eman esap sirkomsais esap tongeni mongö seni. 49 Iwe, epwe eu chök allük fän iten ekewe re wilipos me re ekis mi nom remi.”

50 Iei usun ekewe aramasen Israel ra föri meinisin mine ewe Samol mi Lapalap a allük ngeni Moses me Aaron. 51 Iwe, lon ewe chök ränin ewe Samol mi Lapalap a emwenawu ekewe aramasen Israel lon mwicheicher seni lon ewe fanü Isip.