1 Iwe, ewe Samol mi Lapalap a ngeni Moses 2 ekei allük fän iten ekewe chulap mi kefilitä, lupwen ekewe aramasen Israel repwe mwichefengen o fel ngeni: 3 Lon ükükün wonu rän oupwe angang, nge ewe afisuen rän eu ränin sapat ränin asösö mi pin, eu fansoun mwich mi pin. Ousap föri och angang lon, pun eu ränin sapat fän iten ewe Samol mi Lapalap lon leniemi meinisin. ✡Eks 20.8-10; 23.12; 31.15; 34.21; 35.2; Tut 5.12-14

4 Ikkei ekewe chulap mi kefilitä me ren ewe Samol mi Lapalap, ekewe fansoun mwich mi pin, oupwe asilefeili lon ekewe fansoun ra kefilitä. 5 Iwe, lekuniolun ewe engol me rüanün ränin ewe aeuin maram epwe fis än ewe Samol mi Lapalap Pasofer. ✡Eks 12.1-13; Tut 16.1-2 6 Nge lon engol me limuen ränin ewe chök maram epwe fis än ewe Samol mi Lapalap we chulapen mongö pilawa esap wor iis lon. Lon ükükün fisu rän oupwe mongö pilawa esap wor iis lon. 7 Iwe, lon aeuin rän oupwe afisi eu mwich mi pin. Ousap föri och angang lon. 8 Lon iteiten ekewe fisu rän oupwe eäni eu asor ngeni ewe Samol mi Lapalap. Nge lon ewe afisuen rän oupwe pwal afisi eu mwich mi pin. Ousap föri och angang lon. ✡Eks 12.14-20; 23.15; 34.18; Tut 16.3-8

9 Iwe, ewe Samol mi Lapalap a kapas ngeni Moses, 10 pwe epwe üreni ekewe aramasen Israel: Lupwen oupwe tolong lon ewe fanü, ewe Samol mi Lapalap epwe ngenikemi, o kini uan, oupwe uwato epilük mwen kiniemi uän wiich ren ewe souasor. 11 Iwe, ewe souasor epwe assawa ewe pilük fän mesen ewe Samol mi Lapalap sorotän ewe ränin sapat, pwe Kot epwe etiwakemi. 12 Lon ewe ränin ämi oupwe assawa ewe pilük, oupwe pwal eäni asor eman ätemwänin lam eu ierin esap wor terin, pwe eu asoren kek ngeni ewe Samol mi Lapalap. 13 Iwe, oupwe afiti ngeni rüanü paun pilawa mi amas o mürina pwe asoren mongö, epwe pwal nofitfengen me apüra. Ei epwe eu asor ewe Samol mi Lapalap a efich pwoon. Nge oupwe pwal afiti ngeni eu kuoch wain pwe asoren ün. 14 Ousap fokun mongö pilawa ika föün irän wiich mi tüün ika föün mi fö tori ewe chök rän oua uwato ei asor ngeni Kot. Ei epwe eu allük oupwe apwönüetä ämi me mwirimwirimi kana seni eu täppin aramas tori eu täppin lon leniemi meinisin.

15 Iwe, oupwe aleani ükükün fisu wik seni sorotän ewe ränin sapat, ewe rän oua uwato ewe pilük fän iten asoren assaw. 16 Lon alimeen rän, sorotän ewe afisuen sapat, oupwe uwato ren ewe Samol mi Lapalap pwal eu asoren mongö seni ekewe föün irän wiich mi fö. 17 Oupwe uwato seni lon en me imwan ruofoch pilawa pwe repwe assaw. Ekewe pilawa repwe för seni rüanü paun pilawa mi amas o mürina, repwe um fiti iis, pwe ämi mwen ua ngeni ewe Samol mi Lapalap. 18 Oupwe pwal afiti ngeni ewe pilawa füman lam eu ierir esap wor terir, pwal eman nienifön ätemwänin kow me ruoman ätemwänin sip. Ekei man repwe eu asoren kek ngeni ewe Samol mi Lapalap fiti ämi asoren mongö me asoren ün. Ei epwe eu asor ewe Samol mi Lapalap a efich pwoon. 19 Oupwe pwal eäni asor eman ätemwänin kuuch fän iten asoren tipis, me ruoman ätemwänin lam eu ierir pwe asoren kinamwe. 20 Iwe, ewe souasor epwe assawa ekewe ruoman lam fitifengen me ewe pilawan mwen ua, pwe eu asoren assaw fän mesen ewe Samol mi Lapalap. Ekei asor repwe pin me ren ewe Samol mi Lapalap fän iten ewe souasor. 21 Iwe, lon ewe chök ränin oupwe asilefeili pwe epwe fis eu mwich mi pin. Ousap föri och angang lon. Iei eu allük mwirimwirimi kana repwe apwönüetä seni eu täppin aramas tori eu täppin lon leniemi meinisin. ✡Eks 23.16; 34.22; Tut 16.9-12

22 Iwe, lupwen oupwe kini resin fanüemi, ousap kiniela uän tanipimi tori kiännin, ousap pwal rusifengeni mine a turutiu seni kiniemi wiich. Iwe, oupwe likitirela fän iten chon wöüngau me chon ekis. I ewe Samol mi Lapalap ämi we Kot. ✡Lif 19.9-10; Tut 24.19-22

23 Iwe, ewe Samol mi Lapalap a kapas ngeni Moses, 24 pwe epwe üreni ekewe aramasen Israel: Lon aeuin ränin ewe afisuen maram oupwe afisi eu ränin asösö mi pin, eu ränin achem fiti tikin rappwa, eu fansoun mwich mi pin. 25 Ousap föri och angang lon, nge oupwe eäni eu asor ngeni ewe Samol mi Lapalap.

26 Iwe, ewe Samol mi Lapalap a ngeni Moses ekei allük: 27 Lon aengolun ränin ei afisuen maram epwe fis ewe ränin ächächä. Iwe, epwe eu fansoun mwich mi pin fän itemi, nge oupwe echikefel o eäni asor ngeni ewe Samol mi Lapalap. 28 Ousap föri och angang lon ewe rän, pun eu ränin ächächä, pwe epwe fis asoren amusamusen tipis fän itemi fän mesen ewe Samol mi Lapalap ämi we Kot. 29 Nge iö esap echikefel epwe käriwu seni lein aramasan. 30 Are eman epwe föri och angang lon ewe chök rän, ewe Samol mi Lapalap epwe afeiengaua ewe aramas me lein aramasan. 31 Ousap fokun föri och angang. Iei eu allük oupwe apwönüetä, ämi me mwirimwirimi kana, seni eu täppin aramas tori eu täppin lon leniemi meinisin. 32 Ei rän epwe eu ränin asösön sapat mi pin, ämi oupwe echikefel lon. Seni lekuniolun ewe atiuen ränin ewe maram tori lekuniolun sorotan oupwe apwönüetä ämi asösön sapat. ✡Lif 16.29-34 33 Iwe, ewe Samol mi Lapalap a ngeni Moses ekei allük 34 fän iten ekewe aramasen Israel: Lon engol me limuen ränin ewe afisuen maram epwe fis ewe chulapen likachoch ngeni ewe Samol mi Lapalap lon ükükün fisu rän. 35 Lon aeuin rän epwe fis eu mwich mi pin. Ousap föri och angang lon. 36 Iwe, lon ükükün fisu rän oupwe eäni asor ngeni ewe Samol mi Lapalap. Nge lon awaluen rän oupwe föri eu mwich mi pin o eäni asor ngeni ewe Samol mi Lapalap. Ei mwich a fokun aüchea. Ousap föri och angang lon ewe rän. ✡Tut 16.13-15

37 Ikkei ekewe chulap mi kefilitä me ren ewe Samol mi Lapalap. Oupwe asilefeiliir pwe fansoun mwich mi pin fän iten eäni asor ngeni ewe Samol mi Lapalap, ekewe asoren kek me asoren mongö, sokun asor me asoren ün lon akoten pwüngün fän iten eu me eu rän. 38 Ekei chulap me ekei asor repwe fis lükün än ewe Samol mi Lapalap kewe ränin sapat, pwal lükün ämi lifang, ämi asoren pwon me ämi asor meinisin seni püsin letipemi, oua fang ngeni ewe Samol mi Lapalap.

39 Nge lon engol me limuen ränin ewe afisuen maram, lupwen oua wes me ionifengeni uän fanüemi, oupwe pwal föri eu chulap ngeni ewe Samol mi Lapalap lon ükükün fisu rän. Iwe, ewe aeuin rän epwe eu ränin asösö mi pin, nge ewe awaluen rän epwe pwal eu ränin asösö mi pin. 40 Lon aeuin rän oupwe angei uän irä mi mürina, pan irä palm, pan irä mi muresires, pwal palen ewe irä itan willow mi mär lükün chanpupu. Iwe, oupwe fokun pwapwa fän mesen ewe Samol mi Lapalap ämi we Kot lon ükükün fisu rän. 41 Iteiten ier oupwe föri ei chulap ngeni ewe Samol mi Lapalap lon ükükün fisu rän. Iei eu allük fän itemi me mwirimwirimi seni eu täppin aramas tori eu täppin. Iwe, oupwe föri ewe chulap lon ewe afisuen maram. 42 Iwe, chon wiliposun Israel meinisin repwe imweimw likachoch lon ükükün fisu rän. 43 pwe mwirimwirimi repwe silei pwe ewe Samol mi Lapalap a üreni ekewe aramasen Israel pwe repwe imweimw likachoch, lupwen a emwenirewu seni ewe fanü Isip. I ewe Samol mi Lapalap ämi we Kot. 44 Iei usun Moses a asile ngeni ekewe aramasen Israel ekewe allük usun än ewe Samol mi Lapalap kewe chulap mi kefilitä, pwe repwe apwönüretä.