1 Mürin Pilatus a üreni ekewe sounfiu, “Oupwe etekinala Jesus o wichi.” 2 Iwe, ekewe sounfiu ra fittiifengeni palen iräfölüföl o isetä won möküran pwe mwärin, ra pwal aüfa ngeni echö üf mi parachol. 3 Ra feito ren o apasa, “Ränallim ngonuk, en kingen chon Juta!” Iwe, ra pwal pösapei. 4 Iwe, Pilatus a pwal liwinsefäliwu rer o üreni ewe mwichen aramas, “Nengeni, üpwe emwenawu ätei remi, pwe oupwe silei pwe ngang üsap küna och tipis ren an epwe ninnila.” 5 Iei mine Jesus a towu lükün, a mwärämwär epa mwäramwär seni palen iräfölüföl o üföüf echö üf mi parachol. Iwe, Pilatus a üreniir, “Nengeni, iei i ewe aramas!”

6 Lupwen ekewe souasor mi lap me ekewe chon tümwünü imwenfel ra küna Jesus, ra kökkö fän leüömong, “Kopwe iräpengesi! Kopwe iräpengesi!” Pilatus a üreniir, “Oupwe angei ätei o iräpengesi. Ngang üsap küna och tipis ren an epwe ninnila.” 7 Nge ewe mwichen aramas a pölüeni, “A wor rem eu allük a apasa pwe ätei epwe mäla, pun a apasa pwe i Nöün Kot.” 8 Lupwen Pilatus a rong ekei kapas, a fokun niuokus. 9 A liwinsefälilong lon ewe imw o aisini Jesus, “Ia ka feito me ie?” Nge Jesus esap pölüeni och. 10 Iei mine Pilatus a üreni, “Ifa usun, kosap mochen kapas ngeniei? Kosap silei pwe a wor ai pwüüng ai üpwe angasookala, pwal ai pwüüng ai üpwe apasa pwe kopwe iräpenges?” 11 Jesus a pölüeni, “A chök wor om pwüüng woi pokiten Kot a ngonuk. Iei mine ätewe mi atolongaei lepoumw a kon watte an tipis lap seni om.” 12 Iei mine Pilatus a sotuni le kütta efoch al an epwe angasa Jesus. Nge ewe mwichen aramas a kökkö ngeni fän leüömong, “Are en kopwe angasala ätei, kosap chiechien Sisar! Pun eman mi püsin apasa pwe i king, a ü ngeni Sisar!” 13 Lupwen Pilatus a rongorong ekei kapas, a emwenawu Jesus lükün o a mottiu won an lenien motun souapwüng, lon ewe leni itan “Chech fau.” (Lon kapasen Ipru: Kapata.) 14 Ei otun ina epwe le arapakan leoloasen ewe rän mwen ewe chulapen Pasofer. Pilatus a üreni ekewe aramas, “Nengeni, iei i nöümi we king!” 15 Nge ir ra kökkö ngeni fän leüömong, “Kopwe niela, kopwe niela, kopwe iräpengesi!” Pilatus a aisiniir, “Ifa usun, oua mochen pwe üpwe iräpengesi nöümi king?” Ekewe souasor mi lap ra pölüeni, “Esap wor eman nöüm king pwe Sisar chök.” 16 Mürin Pilatus a mwüt ngeniir Jesus pwe epwe iräpenges. Iwe, ekewe sounfiu ra angei Jesus.

17 Iwe, Jesus a mwärei an iräpenges, a towu lükün ewe telinimw o feila lon ewe leni itan “Lenien Pösökün Mökür” lon kapasen Ipru “Kolkota”. 18 Ikenan ra iräpengesi Jesus. Ra pwal iräpengesi ruoman mwän, eman a nom epek nge pwal eman epek, nge Jesus a nom lukalaper. 19 Pilatus a makkei ekei kapas o pachetä won ewe iräpenges: “Jesus seni Nasaret, ewe Kingen chon Juta.” 20 Chomong aramas ra aleani ekei kapas, pun ewe leni ia Jesus a iräpenges ie a arap ngeni ewe telinimw. Ekewe kapas ra mak lon fosun Ipru, Latin me Krik. 21 Iwe, ekewe souasor mi lap ra üreni Pilatus, “Kosap makkei ‘Kingen chon Juta’, nge kopwe makkei ‘Ei mwän a apasa: Ngang ewe kingen chon Juta’.” 22 Nge Pilatus a pölüeni, “Met üa makkei, ina chök met epwe nom.”

23 Iwe, lupwen ekewe sounfiu ra iräpengesi Jesus, ra angei seni üfan kewe o inetiir lon rüanü kinikin, eman sounfiu nge echö. Ra pwal angei üfan we mi tam esor lekochun, pun a türunus seni won tori fan. 24 Iwe, ra kapasfengen lefiler, “Ousisap kamwei ei üf, nge ousipwe üttüt won, pwe epwe fat iö epwe angei.” Ei a fis pwe epwe pwönüetä mine a mak lon ekewe Toropwe mi Pin:

25 Nge ünükün ewe iräpengesin Jesus ra ütä inan we, pwiin inan we, Maria pwülüen Klopas me Maria Maktalene. 26 Lupwen Jesus a küna inan we me ewe chon kaiö i a echeni mi ütä ikenan, a üreni inan we, “Nengeni, ätenan noumw.” 27 Mürin a üreni ewe chon kaiö, “Nengeni, iei i inom.” Iwe, seni lon ena otun ewe chon kaiö a angei Maria pwe epwe nom ren lon imwan.

28 Mürin Jesus a silei, pwe iei an angang meinisin a wesöchüla. Iwe, fän iten an epwe pwönüetä mine a mak lon ekewe Toropwe mi Pin, Jesus a apasa, “Üa kaka.” ✡Kölf 69.21; 22.15 29 Mi wor eu rume mi ur ren wain mi mwal ikenan. Ra atukalong eu farawa lon o pachetä lesopun efoch mwüch seni ewe irä isop o pöüätä ngeni awen Jesus. 30 Lupwen Jesus a wes me ün ewe wain, a apasa, “A wesila!” Mürin a rotiu o mäla.

31 Mürin ekewe nöüwisen chon Juta ra tüngorei Pilatus pwe epwe mwütätä, pwe repwe kupi pechen ekewe mwän mi iräpenges, repwe pwal angeatiu inisiir seni won ekewe iräpenges. Ra tüngor won ei, pun ei rän eu ränin amol, nge ir resap mochen pwe inisin ekewe aramas repwe nom won ekewe iräpenges lon ewe ränin sapat, pun ei ränin sapat eu rän mi fokun pin. 32 Iei mine ekewe sounfiu ra feila o kupi pechen ewe aemanün me aruomanün mwän ra iräpenges me Jesus. 33 Nge lupwen ar feiliti Jesus, ra küna pwe a fen mäla, iei mine resap chüen kupi pechen. 34 Nge eman ekewe sounfiu a angei wokun siles o posu ngeni lepekin Jesus. Iwe, lon chök ewe otun cha me koluk ra puwu seni. 35 Ewe eman mi küna fisitän ei mettoch a pwärätä usun, pwe ämi oupwe pwal lükü. An kapasen pwärätä a let, a silei pwe mine a apasa a let. 36 Ekei mettoch ra fis pwe epwe pwönüetä mine a mak lon ekewe Toropwe mi Pin: “Esap wor efoch chün epwe kup.” ✡Eks 12.46; Num 9.12; Kölf 34.20 37 Mi pwal wor eu fos a mak lon ekewe Toropwe mi Pin, “Aramas repwe nenengeni ätewe ra posu.” ✡Sek 12.10; Pwär 1.7

38 Mürin ei, Josef seni ewe telinimw Arimatea a tüngorei Pilatus pwe epwe angeatiu somän Jesus me won ewe iräpenges. Josef, eman nöün Jesus kewe chon kaiö, nge le monomon chök, pun a niuokusiti ekewe nöüwisen chon Juta. Iwe, Pilatus a mwütätä, iei mine Josef a feila o angei ewe somä. 39 Pwal Nikotemus a eti Josef, i ätewe a churi Jesus lepwin me mwan. Ätei a uwato löpwokus mi nofit ngeni mör me aloes ina epwe ükükün ipükü paun. ✡Joh 3.1-2 40 Ekei ruoman mwän ra angeatiu somän Jesus o finiti ngeni mangaku mi pwechepwech fiti ekewe löpwokus, pun iei usun örünien chon Juta, lupwen ra amolätä eman somä an epwe peias. 41 A wor eu tanipi lon ewe leni ia Jesus a iräpenges ie. Ikenan a wor eu minefön peias, esap mwo wor eman a peias lon. 42 Pokiten ei rän ewe ränin amol mwen ewe ränin sapat, pwal pokiten ewe peias a chök arap, iei mine ra uwalong somän Jesus lon.