1 Iwe, ewe Samol mi Lapalap a üreni Moses, 2 “Kopwe allük ngeni ekewe aramasen Israel: Oupwe tümwünü pwe oupwe uwato rei ekewe asor fän itei lon ekewe fansoun mi kefilitä, ekewe asoren mongö üa efich pwoon. 3 Iwe, kopwe üreniir: Iei ewe asor oupwe eäni asor ngeni ewe Samol mi Lapalap. Iteiten rän oupwe chök äkeäni asor ruoman ätemwänin lam eu ieriir esap wor terir. 4 Iwe, ewe aemanün oupwe eäni asor lesosor, nge ewe aruomanün oupwe eäni lekuniol. 5 Oupwe pwal achu ngeni ruu paun pilawa mi amas o mürina mi nofitfengen me eu kuoch apüra seni föün olif mi wüsüs pwe asoren mongö. 6 Iei ewe asoren kek epwe chök fifis iteiten rän, usun a fen kefis me fäsonun ewe chuk Sinai, pwe eu asor ewe Samol mi Lapalap a efich pwoon. 7 Nge fän iten eman me eman lam epwe wor asoren ün eu kuoch wain. Oupwe ninätiu ei asoren ün ngeni ewe Samol mi Lapalap lon ewe leni mi pin. 8 Iwe, ewe aruomanün lam oupwe eäni asor lekuniol. Oupwe pwal achu ngeni ewe asoren mongö me ewe asoren ün, usun chök ewe asor a fis lesosor, pwe eu asor ewe Samol mi Lapalap a efich pwoon.”

9 “Iwe, lon ewe ränin sapat oupwe eäni asor ruoman ätemwänin lam eu ierir esap wor terir, pwal rüanü paun pilawa mi amas o mürina mi nofitfengen me apüra, pwe eu asoren mongö me ewe asoren ün. 10 Iei ewe asoren kek epwe fis iteiten ränin sapat lükün ewe asoren kek me ewe asoren ün mi chök fifis iteiten rän.

11 Iwe, lepoputän iteiten maram oupwe eäni asoren kek ngeni ewe Samol mi Lapalap ruoman nienifön ätemwänin kow, eman ätemwänin sip, füman ätemwänin lam eu ierir esap wor terir. 12 Iwe, wonu paun pilawa mi amas o mürina mi nofitfengen me apüra epwe chu ngeni eman me eman ätemwänin kow, rüanü paun pilawa mi amas mi nofitfengen me apüra epwe chu ngeni ewe ätemwänin sip, 13 nge ruu paun pilawa mi amas o mürina mi nofitfengen me apüra epwe chu ngeni eman me eman lam pwe asoren mongö. Iei eu asoren kek ewe Samol mi Lapalap a efich pwoon. 14 Iwe, ikkei ekewe asoren ün: esop kalon wain epwe chu ngeni eman me eman ätemwänin kow, eu esop kuoch wain epwe chu ngeni ewe ätemwänin sip, nge eu kuoch wain epwe chu ngeni eman me eman lam. Iei ewe asoren kek epwe fis iteiten maram lon eu ier. 15 Iwe, oupwe pwal eäni asor ngeni ewe Samol mi Lapalap eman ätemwänin kuuch pwe asoren tipis. Ei asor epwe fis lükün ewe asoren kek me ewe asoren ün mi chök fifis iteiten rän.”

16 “Iwe, lon engol me rüanün ränin ewe aeuin maram epwe fis än ewe Samol mi Lapalap Pasofer. ✡Eks 12.1-13; Tut 16.1-2 17 Nge lon engol me limuen ränin ewe chök maram epwe fis eu chulap. Lon ükükün fisu rän oupwe mongö pilawa esap wor iis lon. 18 Iwe, lon aeuin rän oupwe afisi eu mwich mi pin. Ousap föri och angang lon. 19 Oupwe eäni eu asoren kek ngeni ewe Samol mi Lapalap ruoman nienifön ätemwänin kow, eman ätemwänin sip me füman ätemwänin lam eu ierir. Oupwe pii pwe esap wor terir. 20 Epwe pwal chu ngeniir ewe asoren mongö pilawa mi amas o mürina mi nofitfengen me apüra. Iwe, wonu paun pilawa epwe chu ngeni eman me eman ätemwänin kow, rüanü paun epwe chu ngeni ewe ätemwänin sip, 21 nge ruu paun pilawa epwe chu ngeni eman me eman kewe füman lam. 22 Oupwe pwal eäni asoren tipis eman ätemwänin kuuch, pwe epwe fis asoren amusamusen tipis fän itemi ren. 23 Iwe, oupwe eäni ekei asor lükün ewe asoren kek mi chök fifis iteiten lesosor. 24 Iei usun oupwe eäni asor iteiten rän lon ükükün fisu rän. Ei eu asoren mongö ewe Samol mi Lapalap a efich pwoon, epwe fis lükün ewe asoren kek me ewe asoren ün mi chök fifis iteiten rän. 25 Iwe, lon afisuen rän oupwe pwal afisi eu mwich mi pin. Ousap föri och angang lon. ✡Eks 12.14-20; 23.15; 34.18; Tut 16.3-8

26 Iwe, oupwe pwal afisi eu mwich mi pin lon ewe ränin kinikinin mwen ua, lupwen oupwe eäni ewe asoren mongö seni ekewe föün wiich mi fö ngeni ewe Samol mi Lapalap lon ewe chulapen wiik. Ousap föri och angang lon. 27 Nge oupwe eäni asoren kek ruoman nienifön ätemwänin kow, eman ätemwänin sip me füman ätemwänin lam eu ierir, pwe ewe Samol mi Lapalap epwe efich pwoon. 28 Epwe pwal chu ngeniir ewe asoren mongö pilawa mi amas o mürina mi nofitfengen me apüra. Iwe, wonu paun pilawa epwe chu ngeni eman me eman ätemwänin kow, rüanü paun epwe chu ngeni ewe ätemwänin sip, 29 nge ruu paun pilawa epwe chu ngeni eman me eman kewe füman lam. 30 Iwe, oupwe pwal eäni asor eman ätemwänin kuuch, pwe epwe fis asoren amusamusen tipis fän itemi ren. 31 Iwe oupwe eäni ekei asor fitifengen me ekewe asoren ün lükün ewe asoren kek me ewe asoren mongö mi chök fifis iteiten rän. Oupwe pii pwe esap wor terin ekewe mönün asor. ✡Eks 23.16; 34.22; Tut 16.9-12