1 Feiengauen Jerusalem, än Kot rongen asoren kek. Jerusalem, ewe telinimw ia Tafit a imweimw ie, epwe feiengau. Epwe wes eu ier pwal eu ier fengen me ekewe chulap mi fis lor. 2 Mürin ngang üpwe afeiengaua ewe telinimw mi wewe ngeni eu rongen asoren kek me rei. Epwe wor ngüngüres me kechü lon. 3 Iwe, üpwe pwelifeiliik, Jerusalem, üpwe aüetä imwen maun mi tekia ünükum o amolätä ai pisekin maun pwe üpwe maun ngonuk. 4 Lupwen ka turutiu fan, kopwe fos seni won pwül. Om kapas epwe fatangau seni fan. Iwe, mweliom epwe ngüngü seni fän pwül usun chök ngüngün eman anü, nge om kapas epwe osongin lein pwül moromor.

5 Nge ekewe mwichen chon oputok repwe wiliti pwül moromor, ekewe mwicheichen sounfiu mi eniwokus repwe wewe ngeni pön wiich mi ässila. Iwe, epwe müttir fis, 6 pwe ewe Samol mi Unusen Manaman epwe feito o afeiengaueer ren chopulap me chechechin fanü me akürang watte, ren ewiniär me mölümöl, pwal ren ekkei mi ngetenget. 7 Mürin, sounfiun ekewe mwü meinisin mi maun ngeni Jerusalem än Kot rongen asoren kek, pwal ir mi maun ngeni an kewe imwen maun o ariaföüü, repwe morukola usun chök eu tan, pwal usun chök künan eman lepwin. 8 Iwe, chon ekewe mwü meinisin mi maun ngeni Jerusalem repwe usun chök eman chon echik a tan pwe a mongö, nge lupwen a nela, a chüen echik. Repwe pwal usun chök eman chon kaka a tan pwe a ün, nge lupwen an nela, a fokun apwangapwang ren an kaka, pun esap wes.

9 Oupwe weitifengenikemi o nonom lon niuokus. Oupwe püsin achunakemi pwe oupwe chun. Oupwe puchala, nge sap ren wain, oupwe mwaroro, nge sap ren sakau. 10 Pun ewe Samol mi Lapalap a apüngätiu womi eu möürüchou. Iwe, a apüngala mesen ekewe chon mesenikemi, nöümi kewe soufos, a pwal pwölüela möküren ekewe chon mökürenikemi, nöümi kewe souürür. ✡Rom 11.8

11 Iwe, ekei kapasen osuni meinisin ra usun chök kapas monomon ngenikemi mi mak lon eu puk mi pwau. Lupwen ra ngeni eman mi sile alea o üreni pwe epwe aleani, epwe apasa, “Üsap tongeni, pun ei puk a pwau.” 12 Iwe, lupwen ra ngeni eman esap sile alea, pwe epwe aleani, epwe apasa, “Üsap sile alea.” 13 Iwe, ewe Samol a apasa, “Ekei aramas ra kan ngeniei ren kapasen awer chök, ra pwal asamoluei ren tinawer chök, nge leluker a fokun toau seniei. Ar fel ngeniei a chök fis ren allük me örünien aramas. ✡Mat 15.8-9; Mark 7.6-7 14 Iei mine üpwe förisefäli mettoch mi amwarar o amairü lein ekei aramas. Iwe, nöür kewe soutipachem repwe umwesila, nge ekiekin nöür kewe souekiek epwe lomotongau.” ✡1.Kor 1.19

15 Feiengauen chokewe ra aopala ar ekiek seni ewe Samol mi Lapalap. Ra föri ar föför lemonomon, ra pwal ais, “Iö a künakich? Iö a silei mine sia föri?” 16 Ra sorongauei mettoch. Ifa usun, ewe chon föri sepi esap aüchea seni ewe pwül a angang ngeni? Ifa usun, och mettoch a tongeni apasa usun ewe chon föri, “I esap föriei,” ika eu sepi epwe tongeni apasa, usun ewe chon föri, “Esap wor an sile?” ✡Ais 45.9

17 Ifa usun, esap fansoun mochomoch chök pwe ewe chuk Lepanon epwe wiliti eu tanipi mi pwülüöch, nge ewe tanipi mi pwülüöch epwe usun chök eu lenien wöllap? 18 Lon ena fansoun chon selingapwas repwe rongorong kapasen eu puk, nge chon mesechun mi nom lon toputop me rochokich repwe küna mwer. 19 Ekewe chon tipetekison repwe eäni pwapwa me ren ewe Samol mi Lapalap, nge chon wöüngau repwe mwänek ren Ewe mi Pin lon Israel. 20 Iwe, chon mwänewüs repwe mola, chon turunufas repwe mochola, nge chon ekiekin föri mine a ngau repwe rosola. 21 Kot epwe arosala chokewe mi atipisi aramas, chokewe mi sorei pwüngün kapwüng fän iten chon föföringau, pwal chokewe mi apasätä kapas chofana pwe repwe pinei än ekewe chon wenechar pwüng.

22 Iei mine ewe Samol mi Lapalap, ewe Koten Israel, ewe mi amanaua Apraham seni an weires, a apasa, “Nei aramas, ousap chüen itengau, ousap pwal chüen wowon säw. 23 Pun lupwen oupwe küna nöümi kewe üpwe ngenikemi, oupwe silei pwe ngang ewe Kot mi pin lon Israel. Ämi oupwe asamoluei o meninitiei. 24 Iwe, chokewe esap wor ar mirit repwe kaiö mirit, nge chon lalapat repwe aleasochisi kapasen fön.”