1 Feiengauen Samaria, mwärin chokewe mi sikesik won o ünüpuch lon Israel. Lingan mi watte a chök wewe ngeni epö pön irä mi aiolol. Feiengauen ewe telinimw a nom lon ewe lemol mi fokun wöü, ia ra nom ie chokewe mi puch ren wain. 2 Nengeni, a fen wor eman mi manaman o pöchökül, ewe Samol epwe tinala, a usun chök eu ütten fau mi afeiengau me eu mölümöl, pwal usun chök üt mi püngümong me eu noter. Iwe, i epwe aturala Samaria won pwül fän pöchökül. 3 Epwe puri fän pechen ewe telinimw, mwärin chokewe mi sikesik won o ünüpuch lon Israel. 4 Lingan mi watte a wewe ngeni epö pön irä mi aiolol, ewe telinimw a nom won ewe lemol mi fokun wöü, epwe usun chök eföü mwen uän fiik. Are eman epwe küna, epwe ochei lon ewe chök otun a nom lepöün.

5 Lon ena fansoun ewe Samol mi Unusen Manaman epwe usun chök epa mwärämwärin fau aüchea mi fokun ling fän iten nöün aramas mi chüen manau. 6 Epwe afisätä ekiekin pwüngüöch ngeni ätewe mi wiseni ewe wisen soukapwüng, epwe pwal apworai chokewe mi wisen asüela chon maun lükün asamalapen tittin ewe telinimw.

7 Iwe, pwal ekewe souasor me soufos ra kukuul ren wain, ra mwaroro ren sakau. Ra ünümong wain me sakau pwe ra mwaroro o umwesila. Iwe, ekewe soufos ra mwäl lon künaer, ekewe souasor ra pwal mwäl lon ar apwüng. 8 Ar kewe chepel ra kula ren mus, nge esap chüen wor eu leni mi limöch me won. 9 Iwe, ra apasa usi, “Iö ätei a ekiekin aiti ngeni ei pworaus? Iö ätei a mochen afalafala? Ifa usun, a ekieki pwe kich sa wewe ngeni semirit mi mwü seni oup? 10 Pun a chök eliwini ngenikich eu itechikin kapas pwal eu itechikin kapas, eu ititin fos pwal eu ititin fos, eu lesen pwal eu lesen.”

11 Ewer, ewe Samol mi Lapalap epwe fos ngeni nöün aramas lon kapasen ekis mi küküngau. 12 Iwe, a apasa ngeniir me lom, “Iei ewe lenien kinamwe chon weiresikis repwe asösö lon. Ewer, iei ewe lenien asösö.” Nge resap mochen rongorong. ✡1.Kor 14.21 13 Iei mine ewe Samol mi Lapalap epwe aiti ngeniir eu itechikin kapas pwal eu itechikin kapas, eu ititin fos pwal eu ititin fos, eu lesen pwal eu lesen. Mürin repwe chepetek won ekewe al ra fetal won, repwe seletä o kinas, repwe oo o fötek.

14 Iei mine oupwe rongorong alon ewe Samol mi Lapalap, ämi chon turunufas, ämi mi nemeni ekei aramasen Jerusalem. 15 Iwe, oua tunosikesik o apasa, “Sa pwonfengen me mäla, sa pwal tipeeufengen me ewe lenien sotup. Lupwen ewe feiengau epwe war usun eu noter, esap tongeni torikich, pun sa aopakich ren kapas chofana, sa pwal eäni lenien op kapas atuputup.” 16 Iei mine Kot ewe Samol mi Lapalap a apasa, “Nengeni, üa anomu lon Sion eföü föün longolong mi nüküchar, eföü föün lepwokuku mi aüchea o pos. Iö a lükü i esap lichipüng. ✡Kölf 118.22-23; Rom 9.33; 10.11; 1.Pet 2.6 17 Iwe, üpwe eäni apwüng usun eu selipich, nge pwüng usun selin awenewen.” Iwe, ütten fau epwe pwölüela ewe lenien op itan kapas chofana, nge koluk mi pumong epwe purala. 18 Mürin, ämi pwonfengen me mäla epwe wesila, nge ämi tipeeufengen me ewe lenien sotup esap fis. Iwe, lupwen ewe feiengau epwe war usun eu noter, epwe uweekemiila. 19 Epwe afeiengauakemi iteiten fansoun a torikemi. Iteiten lesosor epwe torikemi, epwe pwal torikemi lerän me lepwin. Nge ir mi wewe ren ei pworaus repwe chök fokun niuokus. 20 Ämi oupwe wewe ngeni eman mwän lon eu mwiitun, a mochen annut won echö kieki mi mochomoch, nge esap kuch lon. A pwal mochen pwölüela ren echö chenikam, nge a chökisikis. 21 Iwe, ewe Samol mi Lapalap epwe ütä usun a ütä won ewe chukun Perasim, epwe pwal song usun a song me lon ewe lemolun Kipeon. Epwe föri sokun föför esap wor eman a küküna me mwan, epwe afisi an angang, sokun angang aramas resap wewe ren. ✡2.Sam 5.20; 1.Kron 14.11; Jos 10.10-12 22 Iei mine ousap eäni kapasen turunufas pwe fööföömi resap mwäinüküla. Pun üa rongorong me ren Kot ewe Samol mi Unusen Manaman, pwe a amolätä eu feiengau epwe tori unusen ei fanü.

23 Oupwe aüseling o rongorong mweliei, oupwe aüseling o rongorong ai kapas. 24 Ifa usun, eman chon tanipi a chök tuttuw pwül, lupwen a mochen fofot? Ifa usun, a chök akapwetetei ewe pwül? 25 Ifa usun, mürin an asosonöchü ewe pwül, esap amorafeili chomong sokun föün nofitin mongö, esap pwal fotuki telin föün wiich ika sokun föün irä lon en me lenian? 26 Iwe, ewe chon tanipi a sileöchü mine epwe föri, pun an Kot a aiti ngeni.

27 Ekewe sokun angangen wichiwich umwun irä resap wewefengen. Ewe chon tanipi esap wichi uän nofitin mongö ren efoch wok mi öümong ika ren pisekin wichiwich mi chou, nge a wichi uän nofitin mongö ren efoch wok mi pwas. 28 Ifa usun, eman a wichi umwun wiich tori föün ra tala? Apwi, esap fokun wichifochei. Nge lupwen a wichi ren pisekin wichiwich, a silei inet epwe ükütiu, pwe ekewe föün resap tala. 29 Ei sokun tipachem a feito seni ewe Samol mi Unusen Manaman. I eman souekiek mi amwarar, a fokun tufich lon an silelap.