1 Iwe, Atonisetek ewe kingen Jerusalem a rong pwe Josua a liapeni Ai o fokun ataela. A föri ngeni Ai me an king usun mine a föri ngeni Jeriko me an king. A pwal rong pwe chon Kipeon ra kinamwe ngeni chon Israel o nonom lefiler. 2 Ren ei ewe king me nöün aramas ra fokun niuokus. Pun Kipeon eu telinimw mi watte usun ekewe telinimwen king, a pwal watte seni Ai, nge mwänin lon meinisin ra fokun pwora. 3 Iei mine Atonisetek ewe kingen Jerusalem a tinala pworaus ren Hoham kingen Hepron, Piram kingen Jarmut, Japia kingen Lakis pwal Tepir kingen Eklon o üreniir, 4 “Oupwe etto rei o alisiei pwe sipwe maun ngeni Kipeon. Pun chon Kipeon ra kinamwe ngeni Josua me ekewe aramasen Israel.” 5 Mürin, ewe kingen Jerusalem, ewe kingen Hepron, ewe kingen Jarmut, ewe kingen Lakis me ewe kingen Eklon, ir ekewe limman kingen chon Amor, ra amwichafengeni nöür sounfiu meinisin o feila Kipeon, ra pwelifeili ewe telinimw o maun ngeni.

6 Nge ekewe chon Kipeon ra titi Josua me lon Kilkal ewe ia a nom ie o üreni, “Kosap asechikeemila äm noum chon angang. Kopwe müttir feito rem, kopwe amanauakem o alisikem. Pun ekewe kingen chon Amor meinisin mi nom lon ewe fanü mi chukuchukutä ra chufengen o maun ngenikem.” 7 Iei mine Josua a feitä seni Kilkal, ir me ekewe sounfiu meinisin fiti ekewe mi pwora o pöchökül. 8 Iwe, ewe Samol mi Lapalap a üreni Josua, “Kosap niuokusiitir, pun üa fen awinnok. Esap wor eman me leir epwe tongeni ü ngonuk.” 9 Iwe, Josua a fetal seni Kilkal lon unusen ewe pwin o aserengaua ekewe sounfiun Amor. 10 Iwe, ewe Samol mi Lapalap a atolongeer lon niuokus watte, lupwen ra küna ekewe chon Israel. Nge Josua a fokun akufuur o nirela me lon Kipeon, a pwal tapweriretiu won ewe al ngeni Pet-horon o sopwela le nirela tori Aseka me Maketa. 11 Iwe, lupwen ra sü me mwen ekewe chon Israel o sütiu won ewe al ngeni Pet-horon tori Aseka, ewe Samol mi Lapalap a apüngätiu ütten fau mi watte wor seni läng, pwe ra mäla. Iwe, a wor chomong mi mäla pokiten ewe ütten fau, lap seni chokewe ekewe re Israel ra nirela ren ketilas.

12 Iwe, lon ewe ränin, lupwen ewe Samol mi Lapalap a atolonga ekewe chon Amor lepöün chon Israel, Josua a kapas ngeni ewe Samol mi Lapalap o apasa me fän mesen ekewe chon Israel, “Akkar, kopwe üla me asen Kipeon, nge en, maram, kopwe üla me asen ewe lemolun Aialon.” 13 Iwe, akkar a üla pwal ewe maram, tori ekewe chon Israel ra akufu chon oputeer. Ei pworaus a mak lon nöün Iasar puk. Iwe, akkar a üla me lukalapen läng, nge a mang le tuputiu lon ükükün unusen eu rän. ✡2.Sam 1.18 14 Iwe, esap wor eu rän usun ei rän lon ekewe fansoun mwan ika me mürin, pwe ewe Samol mi Lapalap a aüselinga alon eman aramas. Pun ewe Samol mi Lapalap a maun fän iten Israel.

15 Mürin, Josua me nöün sounfiu meinisin ra liwiniti Kilkal ewe ia ra nom ie. 16 Iwe, ekewe limman king ra süla o op lon ewe fööimw lon Maketa. 17 Nge eman a küneer o asile ngeni Josua pwe ra op lon ewe fööimw lon Maketa. 18 Mürin Josua a üra, “Oupwe pünüweto fau mi watte mesen ewe fööimw, oupwe pwal awisa ekoch mwän pwe repwe mamaseer. 19 Nge püsin ämi ousap nonom ikenan, pwe oupwe tapweri chon oputakemi. Oupwe maun ngeniir me lükisökürür, nge ousap mwüt ngeniir pwe repwe tolong lon ar kewe telinimw. Pun ewe Samol mi Lapalap ämi we Kot a awinnakemi.” 20 Iwe, Josua me ekewe re Israel ra nirela o aroserela, chilon chök ekoch mi süri ekewe telinimw mi tit. 21 Mürin ra liwin ngeni Josua lon Maketa ewe ia ra nom ie fän kinamwe. Iwe, esap wor eman me lon ewe fanü a tongeni pälüeni eman lein ekewe aramasen Israel.

22 Mürin Josua a apasa, “Oupwe suki ewe fööimw o emwenato rei ekewe limman king.” 23 Iwe, ra suki ewe fööimw o emwenawu ekewe limman king ren Josua: ewe kingen Jerusalem, ewe kingen Hepron, ewe kingen Jarmut, ewe kingen Lakis me ewe kingen Eklon. 24 Nge lupwen ra emwenireto ren, Josua a körato ekewe re Israel meinisin o üreni ekewe samolun sounfiu mi eti le maun, “Oupwe kanoto o ipwetä won üwen ekei king.” Mürin ra kanoto o ipwetä won üwer. 25 Iwe, Josua a üreniir, “Ousap niuokus ika rükö. Oupwe apöchökülakemi o tipepwora. Pun iei usun ewe Samol mi Lapalap epwe föri ngeni chon oputemi meinisin, chokewe oupwe maun ngeniir.” 26 Mürin, Josua a niela ekewe king o aitiueretä won limefoch irä. Iwe, ra nikemeittiu won ekewe irä tori lekuniol. 27 Nge lupwen akkar a tuputiu, Josua a allük pwe repwe apichiretiu me won ekewe irä. Iwe, ra atururolong lon ewe fööimw, ewe ia ra piin op ie, o pineela mesen ewe fööimw ngeni fau mi watte. Iwe, ekewe fau ra chüen nom tori ikenai.

28 Iwe, lon ewe rän Josua a liapeni Maketa o ataela, a pwal niela ewe kingen lon o fokun arosala aramasan. Esap amanaua eman. A föri ngeni ewe kingen Maketa usun mine a piin föri ngeni ewe kingen Jeriko.

29 Mürin, Josua me nöün sounfiu meinisin ra feil seni Maketa o feila Lipna. Iwe, ra maun ngeni. 30 Iwe, ewe Samol mi Lapalap a pwal atolonga fän nemenien chon Israel ewe telinimw me an king. Iwe, Josua a niela chon o arosala chokewe meinisin mi nom lon, nge esap amanaua eman. A föri ngeni kingen ewe telinimw usun mine a piin föri ngeni ewe kingen Jeriko.

31 Mürin, Josua me nöün sounfiu meinisin ra pwal feil seni Lipna o feila Lakis. Iwe, ra pwelifeili ewe telinimw fän ar pisekin maun o maun ngeni. 32 Nge ewe Samol mi Lapalap a atolonga Lakis fän nemenien chon Israel. Iwe, Josua a liapeni ewe telinimw lon aruuen rän o niela aramasen lon meinisin, usun mine a piin föri ngeni Lipna.

33 Mürin, Horam ewe kingen Keser a feito pwe epwe alisi chon Lakis. Nge Josua a niela ewe king me nöün sounfiu, tori esap chüen wor eman mi manau.

34 Iwe, Josua me nöün sounfiu meinisin ra feil seni Lakis o feila Eklon. Ra pwelifeili ewe telinimw fän ar pisekin maun o maun ngeni. 35 Iwe, ra liapeni ewe telinimw lon ewe chök ränin o niela aramasen lon meinisin, usun mine ra piin föri ngeni Lakis.

36 Mürin, Josua me nöün sounfiu meinisin ra feitä seni Eklon o feila Hepron. Iwe, ra maun ngeni. 37 Ra liapeni ewe telinimw o niela chon fiti ar we king. Ra pwal atai wisoposopun kewe o niela aramasen lor meinisin. Josua esap amanaua eman, nge a fokun ataala ewe telinimw o arosala aramasen lon meinisin, usun mine a piin föri ngeni Eklon. 38 Mürin, Josua me nöün sounfiu meinisin ra kul ngeni Tepir o maun ngeni. 39 Iwe, Josua a liapeni ewe telinimw me an we king pwal wisoposopun meinisin. Ra fokun niela aramasen lon meinisin. Josua esap amanaua eman. Usun mine a piin föri ngeni Hepron me Lipna me ar kewe king, iei usun a pwal föri ngeni Tepir me an king.

40 Iwe, Josua a liapeni unusen ewe fanü: ewe fanü mi chukuchukutä me ewe fanü Nekep, ewe fanü mi tekison me ewe fanü mi pal, a pwal liapeni ar kewe king. Esap amanaua eman, nge a fokun arosala meinisin, usun ewe Samol mi Lapalap ewe Koten Israel a allük. 41 Iwe, Josua a akufu chon ekewe fanü seni Kates-parnea tori Kasa, unusen chon ewe fanü Kosen tori Kipeon. 42 Iwe, Josua a liapeni ekei king meinisin me fanüer fän eu chök, pokiten ewe Samol mi Lapalap ewe Koten Israel a maun fän iten chon Israel. 43 Mürin, Josua me nöün sounfiu meinisin ra liwiniti Kilkal, ewe leni ia ra nom ie.