1 Iwe, lupwen Japin ewe kingen Hasor a rong pworausen än chon Israel win, a titi Jopap kingen Maton pwal ewe kingen Simron me ewe kingen Aksaf. 2 A pwal titi ekewe king seni ewe fanü mi chukuchukutä mi nom efeng, seni ewe lemolun Jortan örün ewe nomun Kaliläa, seni ewe fanü tekison, pwal seni ewe fanü mi pal itan Tor mi nom lotou. 3 Iwe, a titi ekewe chon Kanaan mi nom ötiu me lotou, ekewe chon Amor, chon Hit, chon Peris me chon Jepus mi nom lon ewe fanü mi chukuchukutä, pwal ekewe chon Hiw mi nom fäsonun ewe chuk Hermon lon ewe fanü Mispa. 4 Iwe, ra feito me nöür kewe sounfiu meinisin lon mwicheicher mi fokun watte, ükükün chochor usun föün pien aroset. A pwal wor rer chomong oris me woken. 5 Iwe, ekei king meinisin ra achufengeni nöür kewe mwichen sounfiu, ra feito o nonomfengen arun ewe kolukun Merom, pwe repwe maun ngeni Israel.

6 Nge ewe Samol mi Lapalap a üreni Josua, “Kosap niuokusitiir, pun iei otun lesor üpwe atolongeer meinisin lepöün chon Israel, nge ir mei mä. Kopwe pökü selin pechen nöür kewe oris o kenala war kewe woken.” 7 Iwe, Josua me nöün kewe sounfiu meinisin ra aserengaueer me arun ewe kolukun Merom o maun ngeniir. 8 Iwe, ewe Samol mi Lapalap a awinna chon Israel, pwe ra akufuur o tapweriir tori Sitonlap me Misrefot-maim, pwal tori ewe lemolun Mispa mi nom ötiu. Iwe, ra nirela meinisin tori esap chüen wor eman mi manau. 9 Iwe, Josua a föri ngeniir usun mine ewe Samol mi Lapalap a allük ngeni. A pökü selin pechen nöür kewe oris o kenala war kewe woken.

10 Mürin Josua a kulsefäl, a liapeni Hasor o niela an king. Lon ena fansoun Hasor a samolun telinimwen ekewe mwü. 11 Iwe, ra niela chon ewe telinimw meinisin o fokun aroserela. Esap chüen wor eman mi manau me lon. Josua a pwal kenala Hasor. 12 Iwe, Josua a liapeni ekewe telinimw me ar kewe king meinisin, a niela aramasen lor o fokun aroserela, usun Moses nöün ewe Samol mi Lapalap we chon angang a fen allük. 13 Nge ekewe chon Israel resap kenala ekewe telinimw mi kaütä won chukutekison, chilon chök Hasor Josua a kenala. 14 Ekewe chon Israel ra angei mine ra liapeni me lon ekewe telinimw pwal ekewe pwiin man pwe choon wokur. Nge ekewe aramas meinisin ra nirela. Resap fokun amanaua eman. 15 Usun mine ewe Samol mi Lapalap a allük ngeni nöün we chon angang Moses, iei usun Moses a allük ngeni Josua. Nge Josua esap likiti och, pwe a föri meinisin mine ewe Samol mi Lapalap a allük ngeni Moses.

16 Iwe, Josua a liapeni unusen ewe fanü: Ewe fanü mi chukuchukutä me ewe fanü tekison mi nom efeng me ör, unusen ewe fanü Kosen me ewe fanü Nekep pwal ewe lemolun Jortan. 17 Iei ükükün ewe fanü seni ewe chuk Halak mi nom ör arap ngeni Etom tori Paal-kat mi nom efeng lon ewe lemolun Lepanon fäsonun ewe chuk Hermon. Iwe, a liapeni kingen ekewe fanü o nirela. 18 Josua a maun ngeni ekewe king meinisin fansoun langatam. 19 Ekewe aramasen Israel ra liapeni ekewe telinimw meinisin lon maun, pun esap fokun wor eu me leir a kinamwe ngeniir, chilon chök ewe telinimw Kipeon, ia ekewe chon Hiw ra nom ie. 20 Pun ewe Samol mi Lapalap a aföreai leluker pwe repwe ü ngeni Israel lon maun. Ren ei ra atoto feiengau wor pwe ra fokun rosola, nge esap wor eman a ümöümöch ngeniir. Iei usun ewe Samol mi Lapalap a allük ngeni Moses. ✡Tut 7.16

21 Lon ena fansoun Josua a feito o arosala ekewe mwänämong ir mwirimwirin Anak seni ewe fanü mi chukuchukutä, seni Hepron me Tepir, seni Anap me unusen ewe fanü mi chukuchukutä me lon Juta me Israel. Josua a fokun aroserela, a pwal ataala ar kewe telinimw. 22 Iwe, esap wor eman mwirimwirin Anak a chüen manau lon fanüen ekewe aramasen Israel, chilon chök ekoch mi chüen nom lon Kasa, lon Kat pwal lon Astot. 23 Iei usun Josua a liapeni unusen ewe fanü fän alon ewe Samol mi Lapalap ngeni Moses. Iwe, Josua a ngeni chon Israel ewe fanü pwe repwe fanüeni lon ükükün inetin eu me eu ainang. Mürin ewe fanü a kinamwe, pun esap chüen wor maun.