53
1 Nge iö a lükü ewe pworaus sa aronga?
Iö a tongeni küna angangen pöün ewe Samol mi Lapalap? ✡Rom 10.16; Joh 12.38
2 Pun a mämäritä fän mesen ewe Samol mi Lapalap
usun efoch irä mi pwüküfö a pwük seni waran mi nom lon pwül mi pwas.
Esap wor lapalapöchün, esap pwal wor lingöchün pwe sipwe pwapwa le katol,
esap pwal wor meseöchün pwe sipwe tongeni efich.
3 A küna turunufas me koput me ren aramas kana,
eman mwän mi örüni an nom lon cheuch me riaföü.
A wewe ngeni eman chon anioput sa aopa mesach seni.
A unusen itengau, pwe sa ekieki esap wor aüchean.
4 Ellet, a uwei ach samau o mwärei ach cheuch.
Nge kich sa ekieki pwe Kot a ariaföüü o apwüngü. ✡Mat 8.17
5 Nge a kinas pokiten ach pupungau,
a tatakis pokiten ach föföringau.
Liwinin ach tipis a nonom won pwe sipwe küna kinamwe,
nge ren an kinas kana a mola ach samau. ✡1.Pet 2.24
6 Kich meinisin sa mwalechfeil usun chök sip kana.
Sa püsin fili en me alan,
nge ach pwüngingau meinisin ewe Samol mi Lapalap a anomu won. ✡1.Pet 2.25
7 Iwe, a küna riaföü o weires, nge a chök fanafanala.
Esap fokun fos,
usun eman nienifön sip aramas ra emwenala pwe epwe ninnila,
pwal usun eman sip a fanafanala
fän mesen chokewe mi fichi ünan. ✡Pwär 5.6
8 Ra fötekini o apwüngü, mürin ra emwenala pwe epwe mäla.
Nge iö lein pilon kana a ekieki pwe manauan a üküpöküla me won fanüfan,
a pwal mäla pokiten pupungauen nei aramas? ✡Föf 8.32-33
9 Ra amolätä peiasan lein chon föföringau
o peiaseni lon peiasen eman chon pisekisek.
Nge esap wor an föföringau,
esap pwal atuputup kapasen awan. ✡1.Pet 2.22
10 Iwe, iei letipen ewe Samol mi Lapalap, pwe a kinas o cheuch.
Are a fangala manauan pwe eu asor fän iten tipis,
epwe wor mwirimwirin,
epwe pwal alangatama ränin manauan.
Iwe, letipen ewe Samol mi Lapalap epwe fisitä ren.
11 Iwe, wesin an riaföü lon manauan epwe eäni ewe saramen manau o pwapwa ren.
Nge ren an silei Kot nei chon angang mi pwüng
epwe afisätä än chomong aramas pwüng,
epwe pwal uwei ar tipis.
12 Iei mine üpwe ngeni wisan me lein chokewe mi iteüöch,
nge epwe ineti ngeni ekewe chon pwora liapan.
Pun a fangala manauan o mäla,
a pwal alealong lein chon pupungau.
Iwe, a uwei tipisin chomong aramas
o iotek fän iten chon pupungau. ✡Mark 15.28; Luk 22.37