1 Iwe, lupwen Jesus a feitiu me won ewe chuk, eu mwichen aramas mi chomong a tapwela mürin. 2 Iwe, eman mwän mi üri rupun pwötür a feito ren Jesus, a fotopwäsuk me mwan o üreni, “Ai samol, are ka mochen, ka tongeni alimöchüei.” 3 Jesus a aitiela pöün, a atapa ewe mwän o apasa, “Ngang üa mochen, kopwe limöch.” Lon ewe chök otun ewe rupun pwötür won ewe mwän a wesila. 4 Mürin Jesus a üreni ewe mwän, “Kopwe pii, pwe kosap üreni eman usun mine a fis. Nge kopwe feila ren ewe souasor pwe epwe nenengenuk. Iwe, kopwe eäni ewe asor Moses a allük fän iten limelim, pwe epwe alletätä ngeni aramas pwe ka limöch.” ✡Lif 14.1-32

5 Lupwen Jesus a tolong lon ewe telinimw Kapernaum, eman meilapen sounfiun Rom a churi o tüngormau ngeni pwe epwe alisi. 6 Iwe, a üreni, “Ai samol, nei chon angang a mwenilong leimw, esap tongeni mwökütüküt, a pwal fokun watte an metek.” 7 Jesus a üreni, “Üpwe feila o apöchöküla.” 8 Nge ewe meilapen sounfiu a üreni, “Ai samol, ngang üsap eman aramas mi aüchea ngeni om kopwe feito lon imwei. Nge kopwe chök apasa och kapas, iwe, nei we chon angang epwe pöchökületä. 9 Pun pwal ngang eman mi nom fän nemenien ekewe meilap seniei, nge mi pwal wor sounfiu ra nom fän nemeniei. Üa üreni eman, ‘Kopwe feila,’ iwe, a feila. Üa pwal üreni eman, ‘Kopwe feito,’ iwe, a feito. Üa üreni nei amanau, ‘Kopwe föri ien me ien,’ iwe, a föri.” 10 Iwe, lupwen Jesus a rongorong ekei kapas, a mairü ren o üreni ekewe aramas mi tapwela mürin, “Enlet, üa ürenikemi, üsap fokun küna eman lon Israel a eäni ei sokun lükülük. 11 Üpwe ürenikemi, pwe chomong aramas repwe feito seni ötiu me lotou o mot arun chepel ren Apraham, Isaak me Jakop lon ewe kametip lon Mwün Läng. ✡Luk 13.29 12 Nge chokewe itä ürürün repwe nom lon ewe Mwün Kot repwe koturuwu lon ewe lenien rochopwak ia repwe pupuchör o akarüngi ie.” ✡Mat 22.13; 25.30; Luk 13.28 13 Mürin Jesus a üreni ewe meilapen sounfiu, “Kopwe liwinla le imwom, epwe fis ngonuk usun ka lükü.” Iwe, nöün ewe meilapen sounfiu we chon angang a pöchökületä lon ewe chök otun.

14 Iwe, Jesus a feila lon imwen Petrus. Ikenan a küna inen pwülüen Petrus, a eäni eu samaun pwichikar. 15 Jesus a atapa pöün, iwe, ewe pwichikar a towu seni. Mürin neminewe a pwätä o angang ngeni. 16 Iwe, lekuniolun ewe rän, lupwen akkar a tuputiu, aramas ra uwato ren Jesus chomong aramas mi waan anü. Jesus a atowu ekewe ngününgau ren an kapas o apöchöküla chokewe meinisin mi samau. 17 A föri ei an epwe pwönüetä mine ewe soufos Aisea a apasa, “A uwei ach samau o mwärei ach cheuch.” ✡Ais 53.4

18 Lupwen Jesus a küna ewe mwichen aramas mi chomong a nom ünükün, a üreni nöün kewe chon kaiö, “Ousipwe feila epek ewe noom.” 19 Iwe, eman Sensen Allük a feito ren o üreni, “Sense, ngang üa molotä ai üpwe etuk ekis meinisin ia kopwe feila ie.” 20 Jesus a üreni, “Ekewe foks a wor pwanger fän pwül, ekewe mansüsü a wor faser, nge Nöün Aramas esap wor lenian ia epwe konola ie.” 21 Nge pwal eman nöün kewe chon kaiö a üreni, “Ai samol, kopwe akomwen mwüt ngeniei ai üpwe liwinla mwo o peiaseni semei.” 22 Jesus a pölüeni, “Kopwe tapweto müri. Kopwe likiti ngeni ekewe mi mäla repwe püsin peiaseni ar somä.”

23 Iwe, lupwen Jesus a tötä won efoch wa, nöün kewe chon kaiö ra eti. 24 A müttir fis eu mölümöl mi pöchökül lon ewe noom o ekewe no ra nulong leföön ewe wa, pwe a arapakan ngeni an epwe kokola. Nge Jesus a chök möür. 25 Iwe, ekewe chon kaiö ra feila ren, ra föngünätä o üreni, “Äm Samol, kopwe amanauakich! Sia arapakan ngeni ach sipwe le mäla!” 26 Jesus a üreniir, “Pwota oua niuokus? Pwota iei me lükükisikisimi.” Mürin a ütä o fos ngeni asepwäl me no pwe repwe ükütiu. Iwe, ewe asepwäl a söötiu o a fokun lüala won matau. 27 Iwe, ir meinisin ra weitifengeniir o apasa, “Met sokun aramas ätei, pwe asepwäl me no ra mwo nge aleasochisi?”

28 Lupwen Jesus a tori ewe fanüen Katara mi nom epek ewe noom, ruoman mwän mi feito seni ewe lenien peias ra churi. Ekei mwän anün rochopwak ra wäniir, ra fokun rochongau pwe esap wor eman a tongeni fetal won ewe al. 29 Lon ewe chök otun ra puchörütä, “En Nöün Kot, met ka mochen föri ngenikem? Ifa usun, ka feito pwe kopwe ariaföüükem mwen ewe fansoun apwüng?” 30 A wor epwi pwiin pik mi chomong, ra mongöfeil ekis toauala seni ewe leni. 31 Iwe, ekewe anün rochopwak ra tüngormau ngeni Jesus, “Are kopwe asükeemila, kopwe tinikeemila, pwe aipwe tolong lon ekewe pik.” 32 Jesus a üreniir, “Oupwe feila!” Iei mine ekewe anün rochopwak ra towu seni ekewe mwän o tolong lon ekewe pik. Iwe, unusen ewe pwiin pik ra sätiu lepokun ewe achau o turulong lon ewe noom, iwe, ra mop meinisin. 33 Mürin ekewe chon foleni ekewe pik ra süla o tolong lon ewe telinimw, iwe, ra apworausa unusen met a fis ngeni ekewe mwän ekewe anün rochopwak ra wäniir. 34 Iei mine chon ewe telinimw meinisin ra feila pwe repwe churi Jesus. Iwe, lupwen ra küna, ra tüngormau ngeni an epwe feila seni fanüer we.