1 Iwe, ewe Samol mi Lapalap a ngeni Moses 2 ekei allük fän iten eman mi eäni eu kilingau mi afeiengau lon ränin an limelim: Repwe emwenato ewe aramas ren ewe souasor, ✡Mat 8.4; Mark 1.44; Luk 5.14; 17.14 3 nge ewe souasor epwe feila lükün ewe leni ia aramas ra nonom ie. Iwe, ewe souasor epwe nenengenöchü ewe chon samau. Nge are ewe kilingau mi afeiengau a mola seni, 4 ewe souasor epwe allük pwe repwe uwato fän iten ewe epwe limelim ruoman machang mi manau o limöch, mwüch seni ewe irä itan setar, ekam mangaku mi par pwal ülün ewe irä itan isop. 5 Iwe, ewe souasor epwe allük pwe repwe niela eman me lein ekewe machang asen eu sepi mi för seni pwül, nge lon ewe sepi epwe wor koluk mi mürina. 6 Mürin epwe angei ewe machang mi chüen manau fiti ewe mwüch seni ewe irä setar, ewe ekam mangaku mi par me ülün ewe irä isop, o atukurelong lon chan ewe machang a fen ninnila asen ewe koluk mi mürina. 7 Iwe, epwe äsupu ewe cha fän fisu won ewe aramas, pwe epwe limöch seni an kilingau mi afeiengau. Mürin, ewe souasor epwe anomu ewe aramas lon tettelin chon limöch, epwe pwal ässala ewe machang mi chüen manau lemäl. 8 Nge ewe aramas mi mochen limöch epwe sopuni üfan o räisöü ülöülan meinisin, epwe pwal tütü pwe epwe limöch. Mürin a tongeni tolong lon ewe leni ia aramas ra nonom ie, nge epwe chök nom lükün imwan lon ükükün fisu rän. 9 Iwe, lon afisuen rän epwe räisöüla möküran meinisin pwal alüsan me fötün, epwe pwal räisöü ülöülan meinisin. Mürin epwe sopuni üfan o tütü. Iwe, epwe limöch.

10 Nge lon awaluen rän epwe uwato ruoman ätemwänin lam me eman liefefinin lam eu ierir esap wor terir. Epwe pwal uwato limu paun pilawa mi amas o mürina a nofitfengen me apüra, pwal ina epwe ükükün esop kuoch noppuk. 11 Iwe, ewe souasor mi föri ewe angangen limelim epwe emwenato ewe aramas mi mochen limelim fiti an kewe asor mwen ewe Samol mi Lapalap leasamalapen ewe imw mangaku ia aramas ra churi Kot ie. 12 Mürin, ewe souasor epwe angei eman me lein ekewe ätemwänin lam o eäni asor fän iten asoren pupungau fitifengen me ewe esop kuoch noppuk. Iwe, epwe assaweer fän mesen ewe Samol mi Lapalap pwe eu asoren assaw. 13 Mürin epwe niela ewe lam lon ewe leni mi pin, ewe ia ra niela ie ewe mönün asoren tipis me ewe mönün asoren kek. Pun ewe asoren pupungau inetin ewe souasor usun chök ewe asoren tipis, a pwal unusen pin. 14 Iwe, ewe souasor epwe angei ekis chan ewe mönün asoren pupungau o tofi ngeni emin fän pelifichin selingen ätewe mi mochen limöch, pwal ngeni aütülapen pelifichin pöün me pechen. 15 Mürin, ewe souasor epwe angei ekis seni ewe esop kuoch noppuk o ninalong lon pelimöngün püsin pöün. 16 Iwe, epwe atukalong aütün pelifichin pöün lon ewe noppuk o äsupu fän fisu ekis seni ewe noppuk fän mesen ewe Samol mi Lapalap. 17 Nge ekis seni ewe noppuk mi chüen nom lepöün epwe tofi ngeni emin fän pelifichin selingen ätewe mi mochen limöch, pwal ngeni aütün pelifichin pöün me pechen. Nge epwe chök tofätä ewe noppuk won ewe ia a fen tofätä ie chan ewe mönün asoren pupungau. 18 Iwe, lusun ewe noppuk mi chüen nom lepöün epwe epiti ngeni möküren ätewe mi mochen limöch. Ren ei ewe souasor epwe föri asoren amusamusen tipis fän iten ewe aramas fän mesen ewe Samol mi Lapalap. 19 Mürin, ewe souasor epwe eäni ewe asoren tipis, pwe epwe föri asoren amusamusen tipis fän iten ätewe mi mochen limöch seni an limengau. Nge mürin epwe niela ewe mönün asoren kek. 20 Iwe, ewe souasor epwe keni ewe asoren kek me ewe asoren mongö won ewe rongen asor. Iei usun ewe souasor epwe föri asoren amusamusen tipis fän iten ewe aramas. Iwe, epwe limöch.

21 Nge are ewe aramas a wöüngau pwe esap tufich ngeni an epwe uwato ei ükükün, epwe chök uwato eman ätemwänin lam fän iten asoren pupungau epwe assaw, pwe epwe fis asoren amusamusen tipis fän itan. Epwe pwal uwato ruu paun pilawa mi amas o mürina nofitfengen me apüra fän iten asoren mongö, pwal ina epwe ükükün esop kuoch noppuk. 22 Iwe, epwe pwal uwato ruoman lisom ika ruoman apansüsün lisom ükükün chök an tongeni, eman epwe fän iten asoren tipis, nge ewe eman epwe fän iten asoren kek. 23 Iwe, lon awaluen rän epwe uwato ekei mönün asor fän iten an limelim ren ewe souasor leasamalapen ewe imwenfel seni mangaku mwen ewe Samol mi Lapalap. 24 Mürin, ewe souasor epwe angei ewe lam me ewe esop kuoch noppuk fän iten asoren pupungau o assaweer fän mesen ewe Samol mi Lapalap, pwe eu asoren assaw. 25 Iwe, ewe souasor epwe niela ewe lam fän iten asoren pupungau. Mürin epwe angei ekis chan o tofi ngeni emin fän pelifichin selingen ätewe mi mochen limöch, pwal ngeni aütülapen pelifichin pöün me pechen. 26 Epwe pwal ninalong ekis ewe noppuk lon pelimöngün püsin pöün 27 o äsupu fän fisu ekis seni ewe noppuk ren aütün pelifichin pöün fän mesen ewe Samol mi Lapalap. 28 Mürin, ewe souasor epwe tofi ekis seni ewe noppuk mi chüen nom lepöün ngeni emin fän pelifichin selingen ätewe mi mochen limöch, pwal ngeni aütülapen pelifichin pöün me pechen. Nge epwe chök tofätä ewe noppuk won ewe ia a fen tofätä ie chan ewe mönün asoren pupungau. 29 Iwe, lusun ewe noppuk mi chüen nom lepöün ewe souasor epwe epiti ngeni möküren ätewe mi mochen limöch, pwe epwe föri asoren amusamusen tipis fän itan fän mesen ewe Samol mi Lapalap. 30 Mürin, epwe eäni asor ekewe ruoman lisom ika ekewe ruoman apansüsün lisom ükükün än ewe aramas tongeni. 31 Epwe eäni asor eman fän iten asoren tipis, nge ewe eman fän iten asoren kek fitifengen me ewe asoren mongö. Iei usun ewe souasor epwe föri asoren amusamusen tipis fän mesen ewe Samol mi Lapalap fän iten ewe aramas mi mochen limöch. 32 Iei ewe allük fän iten ewe aramas mi eäni ewe kilingau mi afeiengau esap tufich ngeni an epwe uwato ekewe sokun asor fän iten an limelim.”

33 Iwe, ewe Samol mi Lapalap a üreni Moses me Aaron, 34 “Lupwen oupwe tolong lon ewe fanü Kanaan üpwe ngenikemi pwe fanüemi, nge üpwe awora eu nuumw mi chöfetal lon eu imw won fanüemi, 35 ätewe imwan ewe epwe feito o asile ngeni ewe souasor, ‘Üa küna och me lon imwei mi usun chök nuumw.’ 36 Mürin, ewe souasor epwe allük pwe chon ewe imw repwe towu seni fiti pisekir me mwen an epwe tolong pwe epwe nenengenöchü ewe nuumw, pwe esap wor och mettoch mi nom lon ewe imw epwe tolong lon tettelin limengau. Mürin, ewe souasor epwe tolong lon ewe imw 37 o nenengenöchü ewe nuumw. Nge are anüen ewe nuumw mi nom won etippen ewe imw a aroanüen fetil ika aroanüepar, are ewe nuumw a pwal ekis pwangenalong ewe etip, 38 ewe souasor epwe towu me lon asamalapen ewe imw o lokkenala lon ükükün fisu rän. 39 Nge lon afisuen rän ewe souasor epwe liwinsefäliti ewe imw o nenengeni. Iwe, are ewe nuumw a lapala won etippen ewe imw, 40 ewe souasor epwe allük pwe repwe ämwetawu ekewe fau mi nuumw o atururela lon eu leni mi limengau lükün ewe telinimw. 41 Iwe, epwe pwal allük pwe repwe örööti omwotowun etippen pwelin lon ewe imw. Nge mine ra örööti repwe aturalong lon eu leni mi limengau lükün ewe telinimw. 42 Mürin repwe angei ekoch fau o siwilirelong lerasen ekewe fau ra kämwetewu, repwe pwal omwotowusefäli ewe imw.

43 Nge are ewe nuumw a pwüküsefälitä lon ewe imw mürin ar ämwetawu ekewe fau me ar örööti omwotowun ewe imw, pwal lupwen ar omwotowusefäli, 44 ewe souasor epwe feila o nengeni. Iwe, are ewe nuumw a lapala lon ewe imw, ewe nuumw a fokun ngau. Ewe imw a limengau. 45 Iwe, ewe imw epwe kata, nge föün, irän me omwotowun meinisin repwe uweerewu seni lon ewe telinimw o atururela lon eu leni mi limengau. 46 Nge iö mi tolong lon ewe imw, lupwen a kesipela, epwe limengau tori lekuniol. 47 Iö kana ra konola lon ewe imw ika mongö lon repwe sopuni üfer.

48 Are ewe souasor epwe feito o nenengenöchü ewe imw, nge ewe nuumw esap pwüküsefäl mürin ar omwotowu ewe imw, ewe souasor epwe anomu ewe imw lon tettelin limöch, pun ewe nuumw a mola. 49 Iwe, ren angangen limelimen ewe imw, ewe souasor epwe angei ruoman kükün machang pwal mwüch seni ewe irä setar, ekam mangaku mi par me ülün ewe irä isop. 50 Epwe niela eman lein ekewe machang asen eu sepi mi för seni pwül, nge lon ewe sepi epwe wor koluk mi mürina. 51 Mürin epwe angei ewe mwüch seni ewe irä setar, ülün ewe irä isop me ewe ekam mangaku mi par fiti ewe machang mi chüen manau, o atukurelong lon chan ewe machang a fen ninnila asen ewe koluk mi mürina. Iwe, epwe äsupu ewe cha fän fisu ngeni ewe imw. 52 Iei usun ewe souasor epwe limeti ewe imw ren chan ewe machang me ewe koluk mi mürina, ren ewe machang mi chüen manau me ewe mwüch seni ewe irä setar, pwal ren ülün ewe irä isop me ewe ekam mangaku mi par. 53 Mürin epwe ässala ewe machang mi chüen manau seni lon ewe telinimw, pwe epwe ässila lemäl. Iei usun ewe souasor epwe föri asoren limelim fän iten ewe imw, iwe, epwe limöch.”

54 Ikkei ekewe allük fän iten sokopaten kilingau mi afeiengau: fän iten kilingau mi pwerik, 55 fän iten niwangirin üf ika nuumw lon imw, 56 fän iten pwoon won inis ika tir ika och tikepwechepwech. 57 Ren ekei allük epwe pwä inet eman aramas ika och mettoch a limengau ika limöch. Ikkei ekewe allük fän iten kilingau mi afeiengau, fän iten niwangir me nuumw.