1 Lon ena fansoun ekoch aramas ra nom ikenan, ra apworausa ngeni Jesus usun ekewe chon Kalilea Pilatus a niirela, pwe chaar a nofit ngeni chaan ar kewe mönün asor ra eäni asor ngeni Kot. 2 Iwe, Jesus a aisiniir, “Oua ekieki, pwe ekei chon Kalilea ra kon tipis lap seni ekewe ekoch chon Kalilea, pokiten ra ninnila lon ei sokun lapalap? 3 Apwi, sap ina! Üpwe ürenikemi, pwe are ämi ousap aier seni ämi tipis, oupwe pwal mäla ämi meinisin usun chök ir. 4 Are ifa usun, ekewe engol me waluman aramas mi mäla, lupwen ewe imw tekia lon Siloam a turutiu wor? Oua ekieki, pwe ir ra kon tipis lap seni ekewe aramas meinisin mi nom lon Jerusalem? 5 Apwi, sap ina! Nge üpwe ürenikemi, pwe are ämi ousap aier seni ämi tipis, oupwe pwal mäla ämi meinisin usun chök ir.”

6 Mürin Jesus a üreniir ei pworausen awewe: “A wor eman mwän mi wor efoch an irä fiik, a märitä lon an tanipin wain. Iwe, a feila pwe epwe nengeni are a ua, nge esap küna och. 7 Iwe, a üreni ewe chon tümwünü an we tanipi, ‘Nengeni, lon ükükün ülüngat ier üa feito ikei, pwe üpwe nengeni ika ei irä fiik a wor uan, nge üsap fokun küna och. Kopwe üküfala! Pwota epwe angemwäli feiöchün ei pwül?’ 8 Nge ewe chon tümwünü ewe tanipi a pölüeni, ‘Ai samol, kose mochen kopwe mwo likiti pwal eu ier, pwe üpwe tuw ünükün o koiasini. 9 Iwe, are ewe irä a ua mürin eu ier, epwe öch, nge are esap ua, kopwe tongeni üküfala.’ ”

10 Iwe, lon ränin sapat Jesus a afalafal lon eu imwen felikis. 11 A wor eman fefin ikenan a wor eman ngününgau won, pwe a sasamau lon ükükün engol me walu ier. Neminei a pworofengen inisin, pwe esap tongeni wenecharatä. 12 Iwe, lupwen Jesus a küna neminewe, a kökköri o apasa, “Nemin, kopwe ngas seni om samau!” 13 Iwe, Jesus a iseis pöün won, lon ewe chök otun ewe fefin a wenecharatä o mwareiti Kot.

14 Nge ewe nöüwisen ewe imwen felikis a chou, pwe Jesus a apöchökülätä ewe fefin lon ewe ränin sapat. Iei mine a üreni ekewe aramas, “A wor wonu ränin ach sipwe föri ach angang lon. Oupwe feito lon ekei rän pwe oupwe küna pöchökül, nge sap lon ränin sapat.” ✡Eks 20.9-10; Tut 5.13-14 15 Mürin ewe Samol a üreni, “Ämi chon likatuputup! Ifa usun ousap apichi ririn nöümi kow ika aas seni ewe ia a riri ie o etekinala, pwe oupwe aünü ngeni koluk lon ewe ränin sapat? 16 Nge ikei a nom eman fefin, i mwirimwirin Apraham, Satan a föti lon ükükün engol me walu ier. Ifa usun, esap pwüng ngeni an epwe küna ngas lon ränin sapat?” 17 Iwe, lupwen Jesus a apasatä ekei kapas, ekewe chon ü ngeni meinisin ra säw. Nge ekewe aramas ra fokun pwapwa ren ekewe mettoch mi amwarar Jesus a föri.

18 Mürin Jesus a ais, “Met ewe Mwün Kot a wewe ngeni? Met üpwe tongeni awewe ngeni? 19 A wewe ngeni eföü föün pwükilin irä mi fokun kükün, eman aramas a angei o fotukätiu lon an tanipi. Iwe, ewe föün irä a märitä o wiliti efoch irä, nge machang ra föri faser won palan kana.”

20 Iwe, Jesus a pwal ais, “Met üpwe tongeni awewe ngeni ewe Mwün Kot? 21 A wewe ngeni iis eman fefin a angei o nofitifengeni me eu watten sepien pilawa mi amas tori unusen ewe pilawa a pwotä.”

22 Iwe, Jesus a feilfetal lon ekewe telinimw me sopw o afalafala ekewe aramas, nge a fefetal ngeni Jerusalem. 23 Iwe, eman a aisini, “Ai Samol, ifa usun, repwe chokükün chök ir mi küna manau?” Jesus a pölüeniir, 24 “Oupwe achocho ämi oupwe tolong lon ewe asam mi pwangekükün. Pun chomong aramas ra sotuni ar repwe tolong lon, nge resap tongeni. 25 Iwe, are samolun ewe imw epwe pwätä o öppüngala ewe asam, mürin oupwe ütä lükün o popuetä le fichifich ngeni ewe asam o apasa, ‘Äm samol, kose mochen suki ngenikem ewe asam.’ Nge i epwe pölüenikemi, ‘Ngang üsap silekemi ia oua feito me ie.’ 26 Mürin oupwe pölüeni, ‘Äm aia etuk le mongö o ün, nge en ka afalafal lon ach telinimw.’ 27 Nge i epwe ürenisefälikemi, ‘Üsap silekemi ia oua feito me ie. Oupwe feil seniei ämi chon föföringau!’ ✡Kölf 6.8 28 Iwe, oupwe fokun puchör o akarüngi ikenan, lupwen oupwe küna Apraham me Isaak me Jakop me ekewe soufos meinisin lon Mwün Kot, nge püsin ämi oupwe kösüla lükün. ✡Mat 22.13; 25.30 29 Aramas repwe feito seni ötiu me lotou, pwal seni efeng me ör o mot ngeni ewe kametip lon Mwün Kot. ✡Mat 8.11-12 30 Ewer, chokewe mi kükümwir lon ei fansoun repwe akom, nge chokewe mi akom lon ei fansoun repwe kükümwir.” ✡Mat 19.30; 20.16; Mark 10.31

31 Iwe, lon ewe chök fansoun ekoch ekewe Farisi ra feito ren Jesus o üreni, “Kopwe sü seni ikei o feila ekis, pun Herotes a ekiekin niikela.” 32 Jesus a pölüeniir, “Oupwe feila o üreni ena foks, ‘Ngang üa asüela anün rochopwak o apöchöküla aramas ikenai me lesor, nge lon ewe aülüngatin rän üpwe awesala ai we angang.’ 33 Inamwo ei, nge üpwe chök sopwela ai sai ikenai, lesor pwal sorotän lesor. Pun esap pwüng ngeni eman soufos an epwe ninnila ekis, pwe lon Jerusalem chök.

34 “Ämi chon Jerusalem, ämi chon Jerusalem, oua niela ekewe soufos o monei fau ngeni ekewe chon künö Kot a tiniireto remi. Fän chomong üa mochen achufengeni nöümi aramas, usun eman chuko a achufengeni nöün fan pöükässin, nge ämi ousap mochen. 35 Nengeni, ämi we imwenfel epwe pönüla. Nge ngang üpwe ürenikemi, pwe ousap chüen künaei, tori oupwe apasa, ‘A feiöch ätewe a feito fäniten ewe Samol.’ ” ✡Kölf 118.26; Jer 22.5