19
Jesus a afalafal usun mwüfesenin pwüpwülü
19.1-12
(Mark 10.1-12)
Iwe, lupwen Jesus a wes me pworaus usun ekei mettoch, a feila seni Kalilea o feila ngeni ewe fanü Jutea epekin ewe chanpupu Jortan me epek. Eu mwichen aramas mi chomong a tapwela mürin, iwe, a apöchöküleer me lon ewe leni.
Iwe, ekoch Farisi ra feito ren o sotuni ar repwe särei ren ar ais ngeni, “Ifa usun, a pwüng ngeni allükün ach lamalam pwe eman mwän epwe mwü seni pwülüan fän iten ekoch popun esap lifilifil?” Jesus a pölüeniir, “Ousap aleani mine a mak lon ekewe Toropwe mi Pin, pwe seni lepoputän ewe mi föri aramas a föri mwän me fefin? Ken 1.27; 5.2 Iwe, Kot a apasa, ‘Iei mine eman aramas epwe likitala saman me inan o pach ngeni pwülüan, iwe, ekewe ruoman repwe wiliti eu chök inis.’ Ken 2.24 Iei mine resap chüen ruoman, pwe eman chök. Mine Kot a rifengeni esap wor eman aramas epwe mwütifeseni.” Iwe, ekewe Farisi ra aisini, “Pwota chök Moses a föri ewe allük, pwe eman mwän a tongeni ngeni pwülüan echö toropwen mwüfesen o tinala?” Tut 24.1-4; Mat 5.31 Jesus a pölüeni, “Moses a mwütätä pwe ämi mwän oupwe mwü seni pwülüemi pokiten ämi tipeförea. Nge esap ina usun seni lepoputän, lupwen Kot a föri fanüfan. Nge ngang üpwe ürenikemi, ‘Are eman mwän a mwü seni pwülüan fän iten och popun, nge esap fän iten an kirikiringau ngeni, ätewe a lisowu are a pwülüenisefäli pwal eman fefin.’ ” Mat 5.32; 1.Kor 7.10-11
10 Iwe, nöün kewe chon kaiö ra üreni, “Are epwe iei usun lefilen eman mwän me pwülüan, epwe fen öch ach sisap pwüpwülü.” 11 Jesus a üreniir, “Sap aramas meinisin ra tongeni etiwa ei sokun afalafal, pwe chokewe chök Kot a ngeniir tufichir. 12 Pun mi wor ekoch popun pwe mwän resap tongeni pwüpwülü: Ekoch pokiten ra ter seni leuputiuer, ekoch pokiten aramas ra föri ngeniir pwe resap tongeni pwüpwülü, nge pwal ekoch pokiten ra püsin pölükü pwüpwülü fän iten Mwün Läng. Iö a tongeni etiwa ei afalafal epwe etiwa.”
Jesus a afeiöchü semirit
19.13-15
(Mark 10.13-16; Luk 18.15-17)
13 Iwe, mürin ekoch aramas ra uwato semirit ren Jesus, pwe epwe iseis pöün wor o iotek fän iter, nge ekewe chon kaiö ra apwüngü ekewe aramas mi uweiireto. 14 Nge Jesus a üra, “Oupwe mwüt ngeni ekewe semirit pwe repwe feito rei, nge ousap epetiir, pun iö a wewe ngeni ekei semirit epwe mwüni Mwün Läng.” 15 Iwe, a iseis pöün won ekewe semirit o afeiöchüür, mürin a feila seniir.
Ewe alüal mi pisekisek
19.16-30
(Mark 10.17-31; Luk 18.18-30)
16 Iwe, lon eu rän eman mwän a feito ren Jesus o aisini, “Sense, met sokun föför mürina üpwe föri pwe üpwe eäni ewe manau esemüch?” 17 Jesus a pölüeni, “Pwota ka aisiniei usun mine a mürina? A chök wor Eman mi mürina. Are ka mochen angei manau esemüch, kopwe apwönüetä ekewe allük.” 18 Ewe alüal a aisini, “Meni allük?” Jesus a pölüeni, “Kosap niela aramas, kosap lisowu, kosap solä, kosap atipisimwäli eman. Eks 20.13-16; Tut 5.17-20 19 Kopwe asamolu semom me inom, kopwe echeni chon arum usun püsin om echenuk.” Eks 20.12; Tut 5.16; Lif 19.18 20 Ewe alüal a üreni, “Ngang üa aleasochisi ekei allük meinisin. Mi chüen pwal wor met üsamwo föri?” 21 Jesus a pölüeni, “Are ka mochen unusen föföröch, kopwe feila o amömöla meinisin mine ka eäni, nge ewe moni kopwe fang ngeni ekewe chon wöüngau pwe epwe wor woumw lon läng. Mürin kopwe feito o tapweto müri.” 22 Lupwen ewe alüal a rong ekei kapas, a feila fän letipeta, pun wöün a fokun chomong.
23 Mürin Jesus a üreni nöün kewe chon kaiö, “Enlet, üpwe ürenikemi: Epwe fokun weires ngeni aramas mi pisekisek ar repwe tolong lon Mwün Läng. 24 Üpwe apasasefäli, a men fokun weires ngeni eman aramas mi pisekisek an epwe tolong lon Mwün Kot lap seni än eman kamel epwe tolong lon pwangen efoch tikek.” 25 Iwe, lupwen ekewe chon kaiö ra rongorong ei pworaus, ra fokun mairü ren o ra aisini, “Iö chök epwe tongeni küna manau?” 26 Nge Jesus a newenewen ngeniir o üreniir, “Ei esap tufich ngeni aramas, nge mettoch meinisin ra tufich ngeni Kot.” 27 Mürin Petrus a üra, “Nengeni, äm aia likitala meinisin o tapwela mürum. Iwe, met liwin aipwe angei?” 28 Jesus a üreniir, “Enlet, üpwe ürenikemi, pwe lupwen Nöün Aramas epwe mot lon an lenien motun king mi ling lon fansoun mettoch meinisin repwe försefäl, mürin ämi mi tapwela müri oupwe pwal mot won engol me ruu lenien motun king, pwe oupwe nemeni ekewe engol me ruu ainangen Israel. Mat 25.31; Luk 22.30 29 Iwe, iteiten eman me eman mi likitala imwan, ika pwiin, ika fefinan, ika saman, ika inan, ika nöün, ika fanüan fän itei epwe angei liwinin fän ipükü lap seni, epwe pwal angei manau esemüch. 30 Nge chomong mi akom repwe kükümwir, nge chomong mi kükümwir repwe akom.” Mat 20.16; Luk 13.30

19:4: Ken 1.27; 5.2

19:5: Ken 2.24

19:7: Tut 24.1-4; Mat 5.31

19:9: Mat 5.32; 1.Kor 7.10-11

19:18: Eks 20.13-16; Tut 5.17-20

19:19: Eks 20.12; Tut 5.16; Lif 19.18

19:28: Mat 25.31; Luk 22.30

19:30: Mat 20.16; Luk 13.30