1 Mürin ekoch fansoun, lon fansoun kinikin wiich, Samson a feila pwe epwe churi pwülüan we o uwei eman apanen kuuch. A üreni semen neminewe, “Üpwe tolong ren pwülüei lon ewe rum.” Nge ätewe esap mwüt ngeni an epwe tolong. 2 Iwe, semen neminewe a üra, “Üa fokun ekieki pwe ka wesewesen oput neminewe. Iei mine üa apwüpwülüa ngeni chienom. Ifa usun, pwin kükün esap liöch seni? Üa tüngor ngonuk pwe kopwe angei neminewe pwe akasiwilin.” 3 Nge Samson a üreniir, “Lon ei otun esap tipisi are üpwe afeiengaua ekewe re Filistia.” 4 Iei mine Samson a feila o turufi ülüpükü foks, a pwal angei töl. Iwe, a fötifengeni iteiten mechen eman foks ngeni mechen eman o iseis efoch töl lefiler. 5 Nge lupwen a keni ekewe töl, a asüela ekewe foks pwe repwe süla lon än ekewe chon Filistia tanipin wiich resamwo pöküpök, pwe ekewe pilükün wiich me ewe wiich esamwo pöküpök ra karala, pwal ekewe tanipin olif. 6 Mürin, ekewe chon Filistia ra ais, “Iö a föri ei?” Nge ra pälüeni, “Samson, pwülüen nöün ewe re Timna, pun ra angei seni pwülüan we o apwüpwülüa ngeni chienan.” Iei mine ekewe re Filistia ra feito o kenala ewe fefin me saman we. 7 Samson a üreniir, “Ika iei usun mine oua föri, üpwe pwon fän akapel pwe üsap ükütiu le afeiengauakemi tori üpwe wes le ngenikemi chappen ämi föför.” 8 Iwe, a fokun fiu ngeniir fän song o niela chomong. Mürin, a feitiu o nonom lon pwangen ewe achau lon Etam.

9 Mürin, ekewe chon Filistia ra feila, ra tolong lon ewe fanü Juta o maun ngeni ewe telinimw Lehi. 10 Nge ekewe re Juta ra aisiniir, “Pwota oua feito pwe oupwe maun ngenikem?” Iwe, ra pälüeni, “Äm aia feito pwe aipwe föti Samson o föri ngeni usun mine i a föri ngenikem.” 11 Mürin, ülüngeröü re Juta ra feitiu ren pwangen ewe achau lon Etam o üreni Samson, “Kosap silei pwe ekewe chon Filistia ra nemenikich? Met ei ka föri ngenikem?” Nge Samson a üreniir, “Usun mine ir ra föri ngeniei, iei usun ngang üa pwal föri ngeniir.” 12 Iwe, ekewe re Juta ra üreni Samson, “Äm aia feitiu reöm pwe aipwe fötuk o atolongok lepöün chon Filistia.” Nge Samson a üreniir, “Oupwe pwon fän akapel ngeniei pwe ousap püsin nieila.” 13 Mürin, ekewe re Juta ra üreni, “Apwi, äm aipwe chök fötuk o atolongok lepöür, nge aisap niikela.” Iwe, ra föti Samson ren ruofoch säl mi fö o emwenato seni ewe achau.

14 Iwe, lupwen Samson a tori Lehi, ekewe chon Filistia ra feila fän mweireir pwe repwe churi. Nge Ngünün ewe Samol mi Lapalap a feitiu won Samson o apöchöküla, pwe a mwüti ekewe ruofoch säl mi föfö ngeni pöün, usun eman a mwüti terech mi kar. 15 Mürin, Samson a küna chün ngächin eman aas ekärän mäla, a müttir angei o aea le niela engeröü mwän. 16 Iwe, Samson a apasa,

17 Iwe, lupwen a wes me kapas, a pöütala ewe chün ngächin aas.

18 Mürin, Samson a fokun kaka, a kökköri ewe Samol mi Lapalap o apasa, “Ka föri ei angangen ngasala mi lapalap rei ngang noum ei chon angang. Nge ifa usun, üpwe mäla iei ren ai kaka o tolong lepöün chokewe resap sirkomsais?” 19 Mürin, Kot a asanga ewe pwang lon ewe pwül mi nom lon Lehi, pwe koluk a michitä seni. Iwe, lupwen Samson a ün, a pöchökülsefäl. Iei mine ewe leni a iteni En-hakkore † wewen En-hakkore än ewe mi kökkö chönüttu, a nom lon Lehi tori ikenai. 20 Iwe, Samson a soukapwüng lon Israel lon ükükün rüe ier lupwen fansoun chon Filistia ra nemeni ewe fanü.