16
Samson a nom Kasa
16.1-3
Iwe, lon eu rän Samson a feila Kasa. Ikenan a küna eman fin lisowu, a tolong o kon ren. Nge lupwen ekewe chon Kasa ra rong pwe Samson a nom, ra pweliela ewe leni, ra operi o witiwiti lon unusen ewe pwin leasamalapen ewe telinimw. Iwe, ra mosonoson lon unusen ewe pwin, pun ra apasa, “Ousipwe witiwit tori a ränila lesosor, mürin sipwe niela.” Nge Samson a chök kon tori lukenipwin. Mürin a pwätä, a kamwöch asamalapen ewe telinimw me üran kewe ruofoch o üttiretä meinisin fiti lokkun. A iseniretä won afaran o uweeretä won ungen ewe chukutekison peliötiuen Hepron.
Samson me Telila
16.4-22
Mürin ekoch fansoun, Samson a sani eman fefin itan Telila mi nom lon ewe lemolun Sorek. Iwe, ekewe samolun chon Filistia ra feito ren neminewe o üreni, “Kopwe echimwa Samson o kütta met popun a kon watte an pöchökül. Kopwe pwal kütta ren met aipwe tongeni turufi pwe aipwe tongeni föti o akufu. Mürin aipwe en me ngonuk engeröü ipükü föün moni silifer.” Iwe, Telila a üreni Samson, “Kose mochen kopwe pwäri ngeniei met popun a kon watte om pöchökül, pwal met ka tongeni föfö ren pwe eman epwe tongeni akufuk.” Nge Samson a üreni, “Are repwe föti ngeniei fufoch säl mi fö o ngüt, mürin üpwe apwangapwang usun chök aramas meinisin.” Mürin, ekewe samolun Filistia ra uwato ren neminewe fufoch säl mi fö o ngüt, nge neminewe a föti Samson ren. Iwe, a wor ekoch mwän mi op o witiwit lon ewe rum lukalapen imwen neminewe. Nge neminewe a köri Samson, “Samson, ekewe re Filistia repwe le turufuk.” Nge Samson a mwüti ekewe säl usun chök uput a mwü, lupwen ekkei a küri. Iei usun monomonen an pöchökül esap pwä.
10 Iwe, Telila a üreni Samson, “Nengeni, ka turunufaseei o chofana ngeniei. Kose mochen kopwe pwäri ngeniei met eman a tongeni föti ngonuk.” 11 Nge Samson a üreni, “Are repwe föti ngeniei säl mi fö resap piin aea, mürin üpwe apwangapwang usun chök aramas meinisin.” 12 Iei mine Telila a angei säl mi fö, a föti Samson o kökkö, “Samson, ekewe re Filistia repwe le turufuk.” Iwe, ekewe mwän ra op o witiwit lon ewe rum lukalapen ewe imw. Nge Samson a mwüti ekewe säl seni pöün usun terech.
13 Mürin, Telila a üreni Samson, “Tori ikenai ka chök turunufaseei o chofana ngeniei. Kopwe pwäri ngeniei met eman a tongeni föti ngonuk.” Nge Samson a üreni, “Are kopwe türünalong füchoch meten mökürei lon eu tür o annüküretiu ren ewe chüfölün tür, mürin üpwe apwangapwang usun chök aramas meinisin.” 14 Iwe, lupwen Samson a annut, Telila a angei füchoch meten möküran o türünirelong lon ewe tür. A pwal annüküretiu ren efoch chüföl o kökkö, “Samson, ekewe re Filistia repwe le turufuk.” Iwe, Samson a nennela le annut, a üttawu ewe chüföl, ewe ipo me ewe tür.
15 Mürin, Telila a üreni Samson, “Ifa usun om kopwe tongeni apasa pwe ka tongeei, nge lelukom a toau seniei. En ka turunufaseei fän ülüngat, nge kosap pwäri ngeniei popun om pöchökül.” 16 Iwe, lupwen neminewe a arianikisi Samson rän me rän o echimwa, a mos ren pwe a mochen mäla. 17 Mürin, Samson a pwäri ngeni Telila unusen monomonen lelukan o üreni, “Esap mwo fich mökürei fän eu, pun ngang eman Nasir, eu sokun aramas mi imwüla fän iten Kot seni ai uputiu. Are epwe fich mökürei, mürin ai pöchökül epwe sü seniei, nge üpwe apwangapwang usun chök aramas meinisin.”
18 Iwe, lupwen Telila a mefi pwe Samson a pwäri ngeni unusen monomonen lelukan, a titi ekewe samolun chon Filistia o üreniir, “Oupwe feito iei chök, pun a pwäri ngeniei unusen monomonen lelukan.” Mürin, ekewe samolun chon Filistia ra feito ren neminewe o uweato ewe moni. 19 Iwe, Telila a aünätä Samson won afön o föri met epwe anutela ren. Iwe a köri eman mwän, pwe a fichiela ekewe füchoch meten möküren Samson. Mürin a popuetä le ariaföüü Samson, nge an pöchökül a sü seni. 20 Mürin, Telila a kökkö, “Samson, ekewe re Filistia repwe le turufuk.” Iwe, Samson a nennela le annut o ekieki, “Üpwe apichiei o feila usun mesemwan.” Nge Samson esap silei pwe ewe Samol mi lapalap a likitala. 21 Iwe, ekewe chon Filistia ra turufi Samson o alusawu föün mesan. Mürin, ra emwenätiu ngeni Kasa o föti ngeni selipiras. Iwe, Samson a wisen föira föün wiich lon ewe lenien föir me lon imwen fötek. 22 Nge meten möküren Samson ra pwal pwüksefäl mürin an fich.
Samson a mäla
16.23-31
23 Iwe, ekewe samolun chon Filistia ra mwichfengen, pwe repwe eäni eu asor mi watte ngeni Takon ar we kot o föri eu mwichen apwapwa. Pun ra apasa, “Ach kot a atolonga lepöüch Samson ewe chon oputakich.” 24 Nge lupwen ekewe aramas ra küna Samson, ra mwareiti ar kot o üra, “Ach kot a atolonga lepöüch ewe chon oputakich, ätewe mi ataela fanüach o niela chomong leich.” 25 Lupwen leluker a fokun mwänek, ra apasa, “Oupwe körato Samson pwe epwe sipai ngenikich.” Iei mine ra kökkörawu Samson me lon imwen fötek, nge i a sipai ngeniir. Mürin, ra aütai lefilen ekewe üren ewe imw. 26 Iwe, Samson a üreni ewe ät mi amwöchü pöün, “Kopwe mwüt ngeniei pwe üpwe atapa ekewe ür ewe imw a ü won, pun üpwe ünnü ngeniir.” 27 Nge ewe imw a ur ren mwän me fefin, pwal ekewe samolun chon Filistia meinisin ra nom lon. Nge won ewe imw me asan mi wor ina epwe ükükün ülüngeröü mwän me fefin mi katol Samson, lupwen a sipai ngeniir.
28 Mürin, Samson a iotek ngeni ewe Samol mi Lapalap, “Ai Samol me ai Kot, üa tüngor ngonuk kopwe chechemeniei. Ai Kot, kose mochen kopwe apöchökülaei pwal fän eu chök o mwüt ngeniei, pwe üpwe ngeni ekei chon Filistia chappen ar föför ngeniei fän iten mine ra föri ngeni mesei kei ruoföü. 29 Iwe, Samson a angaloi ekewe ruofoch üren lukalap ewe imw a ü won, o tinifeseniir, pöüifichin a tini efoch, nge pöüimöngün a tini pwal ewe efoch. 30 Iwe, Samson a üra, “Üpwe eti ekewe chon Filistia le mäla.” Mürin a tiniir fän unusen an pöchökül, pwe ewe imw a turutiu won ekewe samol me ekewe aramas meinisin mi nom lon. Iwe, chokewe Samson a nirela lupwen an mäla ra chomong seni chokewe a nirela lupwen a manau. 31 Mürin, pwin kewe me unusen an famili ra feitiu o angei somän, ra uweela o peiaseni lefilen Sora me Estaol lon peiasen Manoa saman we. Iwe, Samson a soukapwüng lon Israel lon ükükün rüe ier.