1 Iwe, a wor eman mwän itan Maika a nom won chukuchukutän ewe fanü Efraim. 2 Ätei a üreni inan, “Lon ewe fansoun eman a soläni senuk ekewe engeröü ipükü föün moni silifer, ngang üa rongorong pwe ka anümamaua ewe chon solä. Nengeni, ekewe föün moni silifer ra nom rei. Ngang üa angeer.” Mürin inan we a üreni, “Nei, kopwe feiöch me ren ewe Samol mi Lapalap.” 3 Iwe, lupwen ätewe a aliwini ekewe engeröü ipükü föün moni silifer ngeni inan, neminewe a üra, “Iei üa apini ai silifer fän iten ewe Samol mi Lapalap, pwe ewe anümamau esap küw nei ei. Eman epwe falei eu uluulun anümwäl o apachatä silifer won. Iei üpwe aliwini ngonuk ewe silifer.” 4 Mürin, ätewe a aliwini ewe moni ngeni inan, nge neminewe a angei ruupükü föün moni silifer o ngeni eman chon föri pisek seni silifer. Ätewe a falei eu uluulun anümwäl o apachatä silifer won. Iwe, Maika a anomu lon imwan. 5 Ei mwän Maika a wor eu an lenien fel. Iwe, Maika a pwal föri echö üf itan efot me ekoch uluulun anün leimw o seikätä eman nöün kewe mwän pwe epwe souasor. 6 Lon ekana fansoun esap wor eman king lon Israel. Eman me eman aramas a chök föri mine a pwüng me ren. ✡Souk 21.25

7 Iwe, a wor eman alüal seni Petleem lon Juta mi nom ren chon ewe ainangen Juta. Ätewe eman mwän seni ewe ainangen Lefi. 8 Ei mwän a feila seni Petleem lon Juta pwe epwe kütta eu leni ia a tongeni nonom ie. Nge lon an sai a tori imwen Maika lon chukuchukutän ewe fanü Efraim. 9 Iwe, Maika a aisini, “Ia ka feito me ie?” Nge ätewe a pälüeni, “Ngang eman mwän seni ewe ainangen Lefi seni Petleem lon Juta, nge üa siamüfetal pwe üpwe kütta eu leni ia üpwe tongeni nonom ie.” 10 Iwe, Maika a üreni, “Kopwe nom rei pwe kopwe eman semei me eman nei souasor. Nge ngang üpwe ngonuk engol föün moni silifer iteiten ier, üpwe pwal ngonuk ufom me anom.” 11 Iwe, ewe mwän seni ewe ainangen Lefi a tipeeu ngeni an epwe nom ren Maika. Nge ewe alüal a usun chök eman nöün kewe mwän me ren. 12 Mürin, Maika a seikätä ewe mwän seni ewe ainangen Lefi pwe epwe nöün souasor. Nge ewe alüal a nom ren lon imwan. 13 Iwe, Maika a üra, “Iei üa silei pwe ewe Samol mi Lapalap epwe afeiöchüei, pun a nom rei eman nei souasor seni ewe ainangen Lefi.”