1 Iwe, lupwen ekewe re Israel ra nom Mispa, ra pwon fän akapel pwe esap wor eman me leir epwe apwüpwülüa nöün föpwül ngeni eman re Peniamin. 2 Mürin ar maun, ekewe aramasen Israel ra feito Petel o nom ikenan fän mesen Kot tori lekuniol. Ra alapatä mwelier o fokun kechüengau. 3 Iwe, ra apasa, “Äm Samol mi Lapalap, Koten Israel. Pwota a fis ei sokun lapalap lon Israel? Pwota eu ainang esap chüen nom lon Israel ikenai?” 4 Nge sorotän ewe rän ekewe aramas ra pwätäkai, ra senätä eu rongen asor o eäni asoren kek me asoren kinamwe won. 5 Mürin, ekewe aramasen Israel ra ais, “Iö lein chon ekewe ainangen Israel esap feito lon ewe mwich me fän mesen ewe Samol mi Lapalap lon Mispa?” Pun ra eäni eu pwon mi aüchea fän akapel, pwe ätewe esap feito Mispa ren ewe Samol mi Lapalap epwe ninnila. 6 Iwe, ekewe aramasen Israel ra tongei pwiir kewe chon ewe ainangen Peniamin o apasa, “Ikenai eu ainang a käriwu seni Israel. 7 Met sipwe föri pwe epwe wor pwülüen chokewe mi chüen manau? Pun sa pwon fän akapel ngeni ewe Samol mi Lapalap pwe sisap ngeniir eman me lein nöüch föpwül pwe pwülüer.”

8 Mürin ra ais, “Iö lein chon ekewe ainangen Israel esap feitä Mispa ren ewe Samol mi Lapalap?” Iwe, a pwä pwe esap wor eman seni Japes-kiliat a feito ren ewe leni o fiti ewe mwich. 9 Pun lupwen ra alea iteiten ekewe aramas, a pwä pwe esap wor eman chon Japes-kiliat a nom. 10 Iei mine ewe mwich a tinala Japes-kiliat ükükün engol me ruungeröü mwän mi fokun pwora o allük ngeniir, “Oupwe feila o niela chon Japes-kiliat ren ketilas, oupwe pwal niela fefin me semirit. 11 Iei usun mine oupwe föri: Iteiten mwän me iteiten fefin mi pwüpwülü oupwe fokun aroserela.” 12 Iwe, ra küna me lein ekewe chon Japes-kiliat ükükün föpükü föpwül resamwo tori mwän. Ra emwenireto ngeni ewe leni lon Silo mi nom lon ewe fanü Kanaan.

13 Mürin, unusen ewe mwich a tinala pworausen kinamwe ngeni ekewe chon Peniamin mi nom fän ewe achau lon Rimon. 14 Lon ena fansoun ekewe chon Peniamin ra liwinsefäl. Iwe, ekewe chon Israel ra ngeniir ekewe föpwül ra amanaueer me lein ekewe fin Japes-kiliat. Nge ekewe föpwül resap ku ngeniir. 15 Iwe, ekewe aramas ra tongei chon Peniamin, pun ewe Samol mi Lapalap a föri eu aimwü lefilen ekewe ainangen Israel.

16 Mürin, ekewe souakomwen ewe mwich ra ais, “Met sipwe föri pwe epwe wor pwülüen chokewe mi chüen manau, pun ekewe fin Peniamin ra rosola?” 17 Iwe, ra üra, “Ekewe chon Peniamin mi chüen manau epwe fokun wor mwirimwirir pwe esap mola eu ainang me lon Israel. 18 Nge sisap tongeni apwüpwülüa ngeniir nöüch föpwül, pun sa pwon fän akapel pwe iö leich a apwüpwülüa nöün föpwül ngeni ekewe chon Peniamin epwe anümamau.” 19 Mürin ra apasa, “Nengeni, epwe wor eu chulap fän iten ewe Samol mi Lapalap mi fis iteiten ier lon Silo.” Nge Silo a nom efengin Petel peliötiuen ewe alelap seni Petel tori Sikem örün Lepona. 20 Iei mine ra öüröüra ngeni ekewe chon Peniamin o üreniir, “Oupwe feila o op lon ekewe tanipin wain. 21 Iwe, oupwe mamasa ika ekewe föpwülün Silo ra towu pwe repwe pworuk, mürin ämi oupwe towu seni ekewe tanipin wain o tur en me pwülüan me lein ekewe föpwülün Silo. Iwe, oupwe nukirela lon ewe fanü Peniamin. 22 Nge lupwen semer ika mongeer repwe feito o anini ngenikemi, ämi oupwe üreniir, ‘Oupwe mwütiretä ngenikem fän kirikiröch. Pun äm aisap angang pwülüem fän iten eman me eman leim lon maun. Nge ämi ousap pwal ngenikem nöümi föpwül. Pun are oupwe föri iei usun, oupwe tipis ren ämi atai ewe pwon.’ ” 23 Iwe, ekewe chon Peniamin ra föri mine ra üreniir. Iteiten eman me eman leir a angei pwülüan seni lein ekewe föpwül mi pworuk o uweerela. Mürin, ra liwiniti fanüer, ra aüsefälietä ekewe telinimw o imweimw lor. 24 Lon ena fansoun ekewe aramasen Israel ra feila seni ikenan o liwiniti en me an ainang me an famili pwal en me fanüan.

25 Iwe, lon ekana fansoun esap wor eman king lon Israel. Eman me eman aramas a chök föri mine a pwüng me ren. ✡Souk 17.6