Rut
Kapas akom
I. Iten ei puk: Rut. Ei puk a angei itan seni iten ewe aramas mi aüchea a mak pworausan lon. Wewen ei it Rut: liöch, pwipwiöch ika aramasöch.
II. Chon makei ei puk: Esap fat, eli Samuel.
III. Itelapemongen ei puk: Iö a lükü Kot a tolong lon tettelin nöün.
IV. Kapas aüchean ei puk: Ewe puk Soukapwüng a aiti ngenikich ewe feiengau a tori ekewe chon Israel, lupwen ra kul seni Kot. Nge ewe puk Rut a aiti ngenikich ewe feiöch a tori eman chon lükün Israel mi kul ngeni ewe Koten Israel, iei mine a pach ngeni nöün Kot kewe aramas mi allükülük.
V. Masouen ei puk Rut: Lon ei puk a mak pworausen Rut, eman fin Moap mi pwüpwülü ngeni eman re Israel. Lupwen ewe mwän a mäla, Rut a pwärätä an allükülük ngeni inen pwülüan we, pwal an lükü ewe Koten Israel seni unusen letipan. Lesopolan ei puk a pworaus usun än Rut küna eman pwülüan seni me lein märärin pwülüan we mi mäla. Pokiten a pwülüeni ei mwän, Rut a wiliti inelapen inen inen Tafit. Tafit i ewe king mi iteföüla seni ekewe kingen Israel meinisin.
VI. Tettelin masouen ei puk:
Än Elimelek we famili a feila Moap 1.1-5
Naomi me Rut ra liwin seni Moap 1.6-18
Naomi me Rut ra tori Petleem 1.19-22
Rut a angang lon tanipin Poas 2.1-23
Rut a küna eman pwülüan 3.1-18
Poas a pwülüeni Rut 4.1-17
Rut än Tafit we lewo 4.18-22
1
Rut me Naomi
1.1-22
Lon mwün ekewe soukapwüng a fis lengita lon ewe fanü Israel. Iwe, eman mwän seni Petleem lon ewe fanü Juta a feila pwe epwe nonom lon ewe fanü Moap, i me pwülüan me nöün kewe ruoman alüal. Iwe, iten ewe mwän Elimelek, iten pwülüan we Naomi, nge iten nöün kewe ruoman alüal Maalon me Kilion. Ir chon ewe eterekesin Efrat seni Petleem lon Juta. Iwe, lupwen ra nonom lon ewe fanü Moap, Elimelek pwülüen Naomi a mäla. Nge Naomi chök me nöün kewe ruoman alüal ra nonom. Iwe, ekewe alüal ra pwülüeni ruoman fin Moap, iten eman Orpa, nge iten ewe eman Rut. Iwe, lupwen ra nonom ikenan ina epwe ükükün engol ier, ekewe ruoman alüal Maalon me Kilion ra pwal mäla. Iei usun Naomi a chök nonom mürin mälan nöün kewe me pwülüan we.
Iwe, lupwen Naomi a chüen nom lon ewe fanü Moap, a rong pwe ewe Samol mi Lapalap a afeiöchü nöün aramas o aresisefäli fanüer. Mürin, Naomi a amolätä an epwe towu seni ewe fanü Moap, nge pwülüen nöün kewe ra eti. Iei mine ra towu seni Moap, pwe repwe liwiniti ewe fanü Juta. Nge lupwen ra mwinemwinela won ewe al, Naomi a üreni pwülüen nöün kewe, “Oupwe liwinla en me lon imwen inan. Amwo ewe Samol mi Lapalap epwe kirikiröch ngenikemi, usun ämi oua kirikiröch ngeni ekewe mönümä, pwal ngeniei. Ewe Samol mi Lapalap epwe föri pwe oupwe künökünsefäl en me pwülüan.” Iwe, a mitiriir, nge ir ra kechü fän leüömong. 10 Iwe, ra üreni Naomi, “Apwi, äm aipwe etuk le liwinla ren aramasom.” 11 Nge Naomi a üreniir, “Oupwele liwinla, nei föpwül. Pwota oua mochen etiei? Ifa usun, oua ekieki pwe üpwe chüen tufichin nöünöü pwe epwe wor pwülüemi? 12 Oupwele liwinla, nei föpwül, oupwele liwinla. Pun ngang üa fen chinlap pwe üsap chüen tongeni pwüpwülüsefäl. Nge ika üpwe üra pwe a wor ai apilükülüköch, ika epwe pwal wor pwülüei lepwinei pwe üpwe nöünöü ät, 13 ifa usun, oupwe witiwit tori ra mämäritä? Are if usun, ämi oua mochen kaüla seni ämi pwüpwülü? Apwi, nei föpwül, oua silei pwe ei esap tufich. Üa fokun tongeekemi ren ämi riaföü, pun ewe Samol mi Lapalap a ü ngeniei.” 14 Mürin ra kechüsefäl fän leüömong. Iwe, Orpa a mitiri inen pwülüan o liwiniti fanüan we, nge Rut a chök romi.
15 Iwe, Naomi a üreni Rut, “Nengeni, pwülüen pwin pwülüom we a fen liwinla ren aramasan me an kewe kot. Kopwe chök pwal tapwela mürin.” 16 Nge Rut a üra, “Kosap apiitaei pwe üpwe likituk. Kopwe mwüt ngeniei pwe üpwe etuk. Ia en kopwe feila ie, pwal ngang üpwe feila ie, nge ia en kopwe nonom ie, pwal ngang üpwe nonom ie. Aramasom repwe pwal aramasei, nge om Kot epwe pwal ai Kot. 17 Ia en kopwe mäla ie, pwal ngang üpwe mäla ie, ikenan üpwe pwal peias ie. Amwo ewe Samol mi Lapalap epwe fokun apwüngüei, are üpwe likituk, nge mäla chök epwe aimwüfesenikich.” 18 Nge lupwen Naomi a küna weiresin tipen Rut pwe a chök mochen eti, esap chüen apasa och.
19 Iei usun ekewe ruoman ra mwinemwinela Petleem. Iwe, lupwen ra tori Petleem, chon ewe telinimw meinisin ra mwökütüküt rer. Nge ekewe fin Petleem ra ais, “Ifa usun, wesewesen iei i Naomi?” 20 Iwe, a üreniir, “Ousap aita ngeniei Naomi * wewen Naomi liemürina, nge oupwe aita ngeniei Mara wewen Mara liemaras, pun Ewe mi Unusen Manaman a amarasa letipei. 21 Lupwen ai feila üa uren feiöch, nge ewe Samol mi Lapalap a aliwinieito fän ai asöülapö. Pwota oua aita ngeniei Naomi, are ewe Samol mi Lapalap Ewe mi Unusen Manaman a ü ngeniei o afeiengauaei?”
22 Iei usun Naomi a liwinto me Moap, nge Rut ewe fin Moap pwülüen nöün we a eti. Iwe, ra tori Petleem, lupwen fansoun resin parli a popuetä.

*1:20: wewen Naomi liemürina

1:20: wewen Mara liemaras