1 Iei alon ewe Samol mi Lapalap, “Feiengauen ekewe chon nemenem mi niela o atoropasa nei aramas.” 2 Iei usun mine ewe Samol mi Lapalap ewe Koten Israel a apasa fän äsengesin ekewe chon nemenem mi wisen tümwünü nöün aramas, “Oua atoropasa nei aramas o asürela, nge ousap tümwünüür. Nengeni, üpwe apwüngükemi fän iten ämi föföringau. 3 Nge üpwe achufengeni chokewe mi chüen manau me lein nei aramas seni ekewe fanü meinisin ia üa asürela ie. Üpwe emwenisefälireto ngeni lenier, repwe nöünöütiu o chomongola. 4 Üpwe awisa chon nemenem repwe tümwünüür. Resap chüen niuokus ika rükö, esap pwal wor eman epwe malechela. Ngang ewe Samol mi Lapalap üa kapas.”

5 Iei alon ewe Samol mi Lapalap, “Nengeni, epwe war ewe fansoun üpwe seikätä seni mwirimwirin Tafit efoch ‘Palan mi pwüng’, epwe king o nemenem fän tipachem, epwe föri mine a wenechar o pwüng me lon ewe fanü. 6 Lon ränin manauan, chon Juta repwe küna manau, nge chon Israel repwe nom fän kinamwe. Iwe, iei ewe it epwe iteni, ‘Ewe Samol mi Lapalap ach pwüng.’ ” ✡Jer 33.14-16

7 Iei alon ewe Samol mi Lapalap, “Nengeni, epwe war ewe fansoun pwe aramas resap chüen eäni ei akapel, ‘Mwo manauen ewe Samol mi Lapalap mi emwenawu ekewe aramasen Israel seni ewe fanü Isip,’ 8 nge repwe eäni ei akapel, ‘Mwo manauen ewe Samol mi Lapalap mi emwenawu ekewe mwirimwirin Israel seni ewe fanü efeng me ekewe fanü meinisin ia a asürela ie.’ Mürin repwe nom lon poputän fanüer.”

16 Iei alon ewe Samol mi Unusen Manaman ngeni ekewe aramasen Jerusalem, “Ousap aüselinga än ekewe soufos kapas, ir ätekewe mi osuni ngenikemi pwe oupwe apilükülük mwäl. Ra fos usun künaer seni püsin ar ekiek, nge sap fän aloi. 17 Ra kapasfochofoch ngeni chokewe resap mochen aüselinga aloi, ‘Oupwe feiöch.’ Nge ngeni chokewe mi ülöförea lon leluker ra apasa, ‘Esap wor och feiengau epwe torikemi.’ ”

18 Nge iö me lein ekewe soufos a nom lon än ewe Samol mi Lapalap mwichen pwüngüpwüng, pwe epwe küna o rongorong än Kot kapas? Ika iö a afäli an kapas o aüselinga? 19 Nengeni, än ewe Samol mi Lapalap lingeringer a usun chök eu mölümöl, usun eu ewiniär mi märäkukulfetal won möküren ekewe aramasangau. 20 Än ewe Samol mi Lapalap song esap kul tori epwe afisi o apwönüetä mine a ekiekin föri. Lon ekewe fansoun repwe feito oupwap weweöchiti.

21 Iei alon ewe Samol mi Lapalap, “Üsap tini ekewe soufos, nge ra fen feila. Üsap kapas ngeniir, nge ra fen osuni. 22 Nge are repwe nom lon ai mwichen pwüngüpwüng, mürin repwe tongeni asilefeili ai kewe kapas ngeni nei kewe aramas, repwe pwal tongeni akuluur seni ar kewe lapalap mi ngau, pwal seni ar kewe föför mi ngau.

23 Ifa usun, ngang eman Kot mi arap chök, nge üsap pwal eman Kot mi nom toau? 24 Ifa usun, eman aramas a tongeni op lon leni mi monomon, pwe üsap tongeni küna? Ifa usun, üsap aura läng me fanüfan? 25 Üa rongorong mine ekewe soufos mi osuni mine a chofana fän itei ra apasa, ir mi üra pwe üa fos ngeniir lon ar tan. 26 Ifa ükükün fansoun än ekewe soufos atoka nei aramas ren ar osuni chofana won mine ra püsin ekiekietä. 27 Ra ekieki pwe nei aramas repwe manlükieila ren ar apworausafeili leir ar kewe tan, usun ar kewe lewo ra manlükieila o kul ngeni ewe anü Paal. 28 Eman soufos mi eäni eu tan epwe apworausa ewe tan, nge ätewe mi rongorong ai kapas epwe pwärätä ai kapas fän allükülük. Met wewefengenin fetilipwas me wiich? 29 Ifa usun, ai kapas esap wewe ngeni ekkei, ika esap usun efoch ama mi amökkükisi achau? 30 Iei mine ngang ewe Samol mi Lapalap üa ü ngeni ekewe soufos mi angei än eman soufos kapas o apasa pwe iei ai kapas. 31 Üa pwal ü ngeni ekewe soufos mi eäni püsin ar kapas o üra, ‘Iei alon ewe Samol mi Lapalap.’ 32 Oupwe aüselinga mine ngang ewe Samol mi Lapalap üa apasa: Nengeni, üa ü ngeni chokewe mi osuni ar tan mi chofana, chokewe mi apworausa ekewe tan o atoka nei kewe aramas ren ar kapas chofana me ar tunosikesik. Ngang üsap tinirela ika akünöör, iei mine resap fokun alisi ekei aramas. Ngang ewe Samol mi Lapalap üa kapas.”

33 Iwe, ewe Samol mi Lapalap a üreniei, “Are eman me lein ekei aramas ika eman soufos ika eman souasor epwe aisinuk, ‘Met ewe weires ewe Samol mi Lapalap a kapas usun?’, kopwe üreni, ‘En ewe a weires reöm, nge i epwe ärukola. Iei alon ewe Samol mi Lapalap.’ 34 Nge are eman soufos ika souasor, ika eman lein ekewe aramas epwe apasa, ‘Iei ewe weires ewe Samol mi Lapalap a kapas usun,’ ngang üpwe apwüngü ewe aramas me chon leimwan. 35 Iwe, iei usun mine oupwe apasa ngeni en me chon arun ika pwin, ‘Met ewe Samol mi Lapalap a eäni pälüen?’ ika ‘Met ewe Samol mi Lapalap a apasa?’ 36 Nge ousap chüen apasa, ‘Ewe weires ewe Samol mi Lapalap a kapas usun’, pun püsin än eman me eman kapas epwe wiliti an weires. Nge ämi oua sorei ewe kapas än ewe Kot mi manau, ewe Samol mi Unusen Manaman ämi we Kot. 37 Iei usun mine oupwe aisini ewe soufos, ‘Met ewe Samol mi Lapalap a eäni pälüen ngonuk?’ ika ‘Met ewe Samol mi Lapalap a apasa?’ 38 Nge are oua apasa, ‘Iei ewe weires ewe Samol mi Lapalap a kapas usun,’ mürin ngang ewe Samol mi Lapalap üpwe ürenikemi, ‘Pokiten oua apasa iei usun, nge üa fen allük ngenikemi pwe ousap apasa ekei kapas, 39 üpwe fokun särisikemiitä o pöütikemiila toau seniei, ämi me ämi kewe telinimw üa ngenikemi me ämi kewe lewo. 40 Üpwe uwato womi itengau ese ük me säwfochofoch esap manlüküla.’ ”