1 Iwe, lon arüanün ierin mwün Jehoiakim ewe kingen Juta nöün Josia we mwän, ewe Samol mi Lapalap a kapas ngeni Jeremaia, ✡2.King 24.1; 2.Kron 36.5-7; Tan 1.1-2 2 “Kopwe angei echö toropwe o makei won ekewe kapas meinisin üa fen kapas ngonuk won fänäsengesin Israel, Juta me ekewe mwü meinisin. Kopwe makei meinisin mine üa kapas ngonuk won seni ewe fansoun Josia a king tori ikenai. 3 Eli ika chon Juta repwe rongorong usun ekewe feiengau meinisin üa ekiekin föri ngeniir, repwe kul seni ar föför mi ngau. Mürin, ngang üpwe amusala ar föföringau me tipis.”

4 Mürin, Jeremaia a köri Paruk nöün Neria we mwän. Nge lupwen Jeremaia a niwowomönü ngeni ekewe kapas meinisin ewe Samol mi Lapalap a üreni, Paruk a wisen makeretiu lon ewe toropwe. 5 Iwe, Jeremaia a akünöü Paruk o üreni, “Esap mwümwü ngeniei ai üpwe chüen feila lon imwen ewe Samol mi Lapalap. 6 Iei mine en kopwe wisen feila lon eu ränin echikefel. Kopwe aleani ewe toropwe ngeni ekewe aramas meinisin me lon ewe imwenfel, pwe repwe rongorong mine ewe Samol mi Lapalap a üreniei, nge üa niwowomönüür ngonuk. Kopwe pwal aleani ngeni ekewe aramasen Juta meinisin mi feito seni ar kewe telinimw, pwe repwe rongorong. 7 Eli repwe iotekin tüngor ngeni ewe Samol mi Lapalap o kul seni ar föför mi ngau. Pun a fokun watte än ewe Samol mi Lapalap song me lingeringer a apwüngü ngeni ekei aramas.” 8 Iwe, Paruk a föri meinisin mine ewe soufos Jeremaia a akünöü ngeni. A aleani än ewe Samol mi Lapalap kapas seni ewe toropwe me lon ewe imwenfel.

9 Iwe, lon alimuen ierin mwün Jehoiakim ewe kingen Juta nöün Josia we mwän, lon ewe atiuen maram, ekewe chon Jerusalem me ekewe aramas meinisin mi feito Jerusalem seni ekewe telinimwen Juta ra föri ar ränin echikefel me fän mesen ewe Samol mi Lapalap. 10 Mürin, Paruk a aleani än Jeremaia kewe kapas seni lon ewe toropwe, nge ekewe aramas meinisin ra rongorong. A aleani me lon imwen ewe Samol mi Lapalap lon rumwen Kemaria nöün Safan we mwän ewe seketeri. Ei rum a nom lon ewe leni asan ünükün ewe Asamalap mi Fö, asamen ewe imwenfel.

11 Iwe, Mikaia nöün Kemaria we mwän, nge Kemaria nöün Safan a rong än ewe Samol mi Lapalap kapas meinisin seni ewe toropwe. 12 Mürin a feila ngeni imwen ewe king lon rumwen ewe seketeri, ia ekewe nöüwis meinisin ra mwich ie. Elisama ewe seketeri, Telaia nöün Semaia, Elnatan nöün Akpor, Kemaria nöün Safan, Setekia nöün Hanania me ekewe nöüwis meinisin ra nom. 13 Iwe, Mikaia a apworausa ngeniir ekewe kapas meinisin a rongorong, lupwen Paruk a aleani ewe toropwe me fän mesen ekewe aramas. 14 Mürin ekewe nöüwis meinisin ra titi Jehuti nöün Netania we mwän, nge Netania nöün Selemia, nge Selemia nöün Kusi, pwe epwe üreni Paruk, “Kopwe angei ewe toropwe ka aleani me fän mesen ekewe aramas o feito.” Iei mine Paruk a angei ewe toropwe o feila rer. 15 Iwe, ra üreni, “Kopwe mottiu o aleani ngenikem ewe toropwe.” Iei mine Paruk a aleani ngeniir. 16 Iwe, lupwen ra rongorong masouen ewe toropwe, ra sapefengen lon ar niuokus o üreni Paruk, “Äm aipwe asile ngeni ewe king ekei kapas.” 17 Mürin ra aisini Paruk “Kopwe ürenikem, ifa usun om makei ekei kapas meinisin? Ifa usun, Jeremaia a niwowomönü ngonuk?” 18 Nge Paruk a pälüeniir, “Jeremaia a niwowomönü ekei kapas meinisin ngeniei, nge ngang üa makeretiu ren ink lon ei toropwe.” 19 Mürin, ekewe nöüwis ra üreni Paruk, “Oupwe feila o op, ämi me Jeremaia, nge ousap asile ngeni eman ia oua op ie.”

20 Iwe, mürin ar iseis ewe toropwe lon rumwen Elisama ewe seketeri, ra feila lon imwen ewe king o apworausa ekewe kapas meinisin ngeni ewe king. 21 Mürin, ewe king a tinala Jehuti pwe epwe angei ewe toropwe. Iwe, Jehuti a angei ewe toropwe seni rumwen Elisama we o aleani ngeni ewe king me ekewe nöüwis mi nom ren. 22 Ei a fis lon atiuen maram, nge ewe king a mot lon imwan imweimwen lon fansoun patapat, ia a wor ie eu ekkei mi kü lon lenian me fän mesan. 23 Iwe, lupwen Jehuti a aleani ülüngat ika rüanü kinikinin ewe toropwe, ewe king a pöküela ren efoch sar o monerelong lon ewe ekkei. A föri ei ngeni ewe toropwe tori a unusen karala. 24 Nge ewe king me nöün kewe chon angang mi rongorong ekei kapas meinisin resap niuokus ren, resap pwal kamwei üfer ren ar lolilen. 25 Inamwo än Elnatan me Telaia me Kemaria tüngormau ngeni ewe king pwe esap kenala ewe toropwe, nge ewe king esap fokun aüselingeer. 26 Nge a fen allük ngeni Jeramel nöün we mwän, pwal ngeni Seraia nöün Asriel me Selemia nöün Aptel, pwe repwe feila o turufi ewe soumak Paruk me ewe soufos Jeremaia. Nge ewe Samol mi Lapalap a aopeer.

27 Iwe, mürin än ewe king kenala ewe toropwe, ia a mak ie ekewe kapas Jeremaia a niwowomönü ngeni Paruk, ewe Samol mi Lapalap a kapas ngeni Jeremaia, 28 “Kopwe angei pwal echö toropwe o makei lon ekewe kapas meinisin mi fen mak lon ewe aeuin toropwe, Jehoiakim ewe kingen Juta a kenala. 29 Nge kopwe üreni Jehoiakim ewe kingen Juta, ‘Iei alon ewe Samol mi Lapalap: Ka kenala ewe toropwe o üra, “Pwota ka makei lon pwe ewe kingen Papilon epwe fokun feito o ataela ei fanü, epwe pwal ärala aramas me man seni?” 30 Iei mine ngang ewe Samol mi Lapalap üa apasa fänäsengesin Jehoiakim ewe kingen Juta: Esap wor eman mwirimwirin epwe king o nemeni ewe mwü Tafit a nemeni me lom. Nge somän epwe koturula lükün pwe epwe nom fän pwichikar lerän me patapat lepwin. 31 Üpwe apwüngü i me nöün kewe pwal nöün kewe nöüwis pokiten ar föföringau. Üpwe awarato wor pwal won chon Jerusalem me ekewe re Juta ekewe feiengau meinisin üa apwüngala ngeniir pokiten resap aüseling.’ ”

32 Mürin, Jeremaia a angei pwal echö toropwe o ngeni Paruk ewe soumak. Iwe, Jeremaia a niwowomönü ngeni Paruk ekewe kapas meinisin mi fen mak lon ewe toropwe Jehoiakim ewe kingen Juta a kenala, a pwal apacha chomong kapas mi wewe ngeniir.