Hiop
Kapas akom
I. Iten ei puk: Hiop. Ei puk a angei itan seni iten ewe aramas mi aüchea a mak pworausan lon. Wewen ei it Hiop: Eman chon küna koput.
II. Chon makei ei puk: Esap fat iö a makei.
III. Itelapemongen ei puk: Ach silei Kot a lapala, lupwen sa tolong lon riaföü.
IV. Kapas aüchean ei puk: Kot a akota riaföü lon manauen chon pwüng, pwe epwe aöchüela manauen ar souläng.
V. Masouen ei puk Hiop: Lon ei puk a mak pworausen eman mwän mi pwüng, a tolong lon sokopaten riaföü me feiengau. Nöün kewe meinisin ra mäla, meinisin mine a eäni a pöüt seni, pwal püsin i a üri eu samau mi fokun ingau. Mürin ewe chon makei ei puk a apworausa lon ülüngat tettel usun än Hiop me chiechian kewe üpälüfengen won mefier ren ekei feiengau. A pwal apworausa usun mefier won än Kot föför ngeni aramas. Chiechien Hiop kewe ra awewei popun an riaföü won ititin örünien ar lamalam. Ra lükü pwe fansoun meinisin Kot a afeiöchü chon föri mine a pwüng, nge a apwüngü chon föri mine a ngau, iei popun Hiop a riaföü, pun a tipis. Nge Hiop esap ekieki iei usun. A lükü pwe esap pwüng an tolong lon ei sokun feiengau, pun i eman aramas mi fokun pwüng o föri mine a mürina. Esap wewe ren pwota Kot a mwütätä an tolong lon ei feiengau, iei mine a pälüeni Kot. Hiop esap likitala an lükülük, nge a mochen pwe epwe angesefäli an iteüöch. Kot esap pälüeni än Hiop kapas ais, nge a pälüeni än Hiop lükülük ren an pwärätä an manaman mi pin me an tipachem. Mürin Hiop a pwärätä fän tipetekison pwe Kot a tipachem o tekia, a pwal aier seni an kewe kapas pöchökül a eäni. Lesopolan ei pworaus a mak usun än Hiop liwinsefäliti usun nonomun me mwan, nge wöün a fen lap seni me mwan. Kot a apwüngü chiechien Hiop kewe, pokiten resap weweiti popun än Hiop kewe riaföü. Hiop echök a mefi pwe Kot a tekia seni örünien lamalam.
VI. Tettelin masouen ei puk:
Kapas akom 1.1–2.13
Hiop me chiechian kewe 3.1–31.40
1. Än Hiop lal 3.1-26
2. Aeuin än Hiop me chiechian kewe üpälüfengen 4.1–14.22
3. Aruuen än Hiop me chiechian kewe üpälüfengen 15.1–21.34
4. Aülüngatin än Hiop me chiechian kewe üpälüfengen 22.1–27.23
5. Än aramas kütta tipachem 28.1-28
6. Amwüchülan än Hiop kapas 29.1–31.40
Än Elihu afalafal 32.1–37.24
Ewe Samol mi Lapalap a pälüeni Hiop 38.1–42.6
Kapasen Lesopolan 42.7-17
1
Satan a sotuni Hiop
1.1–2.13
Mi wor eman mwän lon ewe fanü Us itan Hiop. Ätei a pwüng o wenechar, a niuokusiti Kot o kul seni föför mi ngau. Iwe, a wor füman nöün ät me ülüman nöün nengin. A pwal wor füngeröü nöün sip, ülüngeröü kamel, engeröü ätemwänin kow, limepükü liafefinin aas me chomong, chomong chon angang. Iei mine ei mwän a iteföüla seni ekewe aramas meinisin mi nom lon ewe fanü ötiu. Iwe, nöün kewe alüal ra soun föri eu kametip lon en me imwan, lupwen a tori en me an fansoun. Ra pwal titi fefiner kewe ülüman pwe repwe etiir le mongö me ün. Nge lupwen ekewe ränin kametip ra wesila, Hiop a tiitiir pwe epwe apiniir. A pwätä lesosorusich o eäni eu asoren kek fän iten nöün kewe meinisin, pun a üra, “Eli a fis pwe nei kewe alüal ra tipis o amamäsini Kot lon leluker.” Iei usun Hiop a föri fansoun meinisin.
Iwe, a tori eu rän, lupwen ekewe chon läng ra feito o ütä fän mesen ewe Samol mi Lapalap, Satan a pwal nonom lefiler. Ken 6.2 Iwe, ewe Samol mi Lapalap a aisini Satan, “Ia ka feito me ie?” Satan a pälüeni, “Üa feito seni fanüfan, ia üa saifeil ie seni epek tori epek.” Iwe, ewe Samol mi Lapalap a üreni Satan, “Ifa usun, ka küna nei chon angang Hiop? Esap wor eman aramas won fanüfan mi wewe ngeni, a pwüng o wenechar, a niuokusitiei o kul seni föför mi ngau.” Mürin, Satan a pälüeni ewe Samol mi Lapalap, “Ifa usun, Hiop epwe niuokusituk ika esap wor an feiöch? 10 Ifa usun, kosap tiela inisin me chon leimwan, pwal meinisin mine a eäni seni feiengau? Ka afeiöchü angangen pöün pwe nöün pwiin sip me kow ra chomongola won ewe fanü. 11 Nge kopwe aitiela poum o atapa meinisin mine a eäni, mürin epwe fokun amamäsinuk.” Pwär 12.10 12 Iwe, ewe Samol mi Lapalap a üreni Satan, “Ina, meinisin mine Hiop a eäni epwe nom fän nemenemom, chilon chök kosap atapa inisin.” Mürin Satan a feila seni fän mesen ewe Samol mi Lapalap.
13 Iwe, a tori eu rän, lupwen nöün Hiop kewe alüal me föpwül ra eäni eu kametip lon imwen ewe mwänichi, 14 eman chon angang a feito ren Hiop o üreni, “Lupwen ekewe ätemwänin kow ra tuw ewe pwül, nge ekewe aas ra mongöfetal ünükür, 15 ekewe chon Sapa ra mwu ngeniir o turufiir meinisin. Iwe, ra niela noum kewe chon angang ren ketilas, nge ngang echök üa süla pwe üpwe ürenuk.” 16 Lupwen ätei a chüen kapas, pwal eman chon angang a feito o üra, “Eu ekkei seni Kot a turutiu me läng o kenala ekewe sip me ekewe chon angang, nge ngang echök üa süla pwe üpwe ürenuk.” 17 Nge lupwen ätei a chüen kapas, pwal eman chon angang a feito o üra, “Ekewe chon Kaltea ra war lon ülüngat mwich, ra turufi ekewe kamel o angeerela. Ra niela noum kewe chon angang ren ketilas, nge ngang echök üa süla pwe üpwe ürenuk.” 18 Iwe, lupwen ätei a chüen kapas, pwal eman chon angang a feito o üra, “Noum kewe alüal me föpwül ra eäni eu kametip lon imwen ewe mwänichi. 19 Iwe, och asepwäl mi pöchökül a enito seni ewe fanüapö o eniti lepwokukun ewe imw me rüanü pwe a mök. Ewe imw a turutiu won noum kewe alüal me föpwül, iwe ra mäla, nge ngang echök üa süla pwe üpwe ürenuk.”
20 Mürin, Hiop a ütä, a kamwei üfan fän an letipeta o räisöü möküran, a chapala won pwül o fel ngeni Kot. 21 Iwe, a apasa, “Üa selela lupwen üa towu seni letipen inei, üpwe pwal selelasefäl lupwen ai üpwe towu seni fanüfan. Ewe Samol mi Lapalap a fangoto, ewe Samol mi Lapalap a angeesefäli, üpwe mwareiti ewe Samol mi Lapalap.”
22 Lon ekei feiengau meinisin mi tori Hiop, i esap tipis, esap pwal etipisi Kot ren an amwäli mine a föri.

1:6: Ken 6.2

1:11: Pwär 12.10