9
Hiop esap tongeni pälüeni Kot
9.1-35
1 Mürin, Hiop a apasa,
2 “Ellet, üa fen silei meinisin mine ka üreniei.
Nge ifa usun än eman aramas epwe tongeni küna pwüng me fän mesen Kot? ✡Hiop 4.17
3 Are eman aramas a mochen anini ngeni,
esap tongeni pälüeni eu me lein engeröü kapas ais.
4 Kot a tipachem o fokun pöchökül.
Iö a pwäk ngeni an epwe ü ngeni?
5 Kot a amwökütükütü ekewe chuk o atururetiu lon an song,
nge aramas resap silei me mwan.
6 A achecha fanüfan o amwökütü seni lenian,
a pwal achecha üran kana.
7 A allük ngeni akkar pwe esap tötä,
a amwöchü ekewe fü pwe resap tin.
8 I chök a förätä ekewe läng
o fetal won nonoon lematau.
9 Kot a förätä ekewe fü iter Uwölö me
Öniön me Mweriker,
pwal ekewe muchiechien fü mi nom ör. ✡Hiop 38.31; Am 5.8
10 A föri mettoch mi tekia esap wor eman a tongeni weweiti.
A föri mettoch mi amwarar esap wor eman a tongeni aleani.
11 Lupwen a feila ünüki, üsap tongeni nengeni,
lupwen a lu seniei, üsap tongeni küna.
12 A turufi mine a mochen, nge esap wor eman a tongeni pinei.
Iö a tongeni aisini, ‘Met ka föri?’
13 Kot esap aükätiu an song.
Ekewe chon alisi Rahap *Rahap eman mönün leset mi mwacho o fokun watte lon än ekewe aramasen lom tutulap, a aliosunätä manaman mi ngau. ra chapetiu arun pechen.
14 Ifa usun ai üpwe tongeni pälüeni Kot?
Ifa usun, meni sokun kapas üpwe tongeni eäni ngeni?
15 Inamwo ika üa pwüng, nge üsap tongeni pälüeni.
Üa chök tongeni tüngor ngeni Kot ai we soukapwüng,
pwe epwe ümöümöch ngeniei.
16 Ika mwo ngang üpwe kökköri Kot, nge i epwe pälüeniei,
üsap lükü pwe epwe rongorong ngeni ai kewe kapas.
17 Pun a atatakisiei ren eu mölümöl o achomonga kinasei,
nge esap wor popun.
18 Kot esap mwüt ngeniei pwe üpwe ngasangas,
nge a amasoua manauei ren riaföü.
19 Ika iei eu akufufengenin pöchökül, nengeni, i a kon pöchökül.
Nge ika iei eu angangen kapwüng, iö a tongeni kökköri?
20 Inamwo ika üa pwüng, püsin kapasen awei epwe apwüngüei.
Inamwo ika esap wor ai tipis, i epwe pwärala pwe üa tipis.
21 Ikamwo esap wor ai tipis, nge üsap püsin ekieki inisi.
Üa anioputa manauei.
22 Aramas meinisin ra wewefengen.
Iei mine üa apasa pwe Kot a niela ätewe esap wor an tipis usun chök ätewe mi tipis.
23 Lupwen feiengau a aworato mäkai,
i a takirin ämängau ren än ewe chon pwüng feiengau.
24 Lupwen eu fanü a tolong lepöün ekewe aramasangau,
Kot a pwölüela mesen ekewe soukapwüng.
Are esap i, iö chök a föri?
25 Ränin manauei ra müttir sü seniei, lap seni müttirin eman chon sä.
Ra süla, nge esap wor feiöch lor.
26 Ra säila seniei usun chök müttirin efoch waseres,
ra müttirila usun chök müttirin eman ikel mi tur won liapan.
27 Are üa apasa, ‘Üpwe manlükala ai siö,
üpwe likitala ai wowongau pwe üpwe wopwapwa,’
28 nge üa chök niuokus ren ai kewe riaföü meinisin,
pun üa silei pwe Kot esap atolongaei lon tettelin chon pwüng.
29 Are üa nom lon tettelin chon tipis,
pwota üpwe weiresmwäl, nge esap wor lomotan?
30 Ikamwo üpwe limetiei ren sop o limetöchü pei ren sarasko,
31 nge Kot epwe chök aturueilong lon eu pwang mi anou,
pwe püsin üfei epwe anioputaei.
32 Pun Kot esap eman aramas usun ngang pwe üpwe tongeni pälüeni,
ika aipwe tongeni kapwüngfengen.
33 Amwo epwe wor eman chon aför lefilem
pwe epwe anomu pöün wom me ruoman,
34 pwe Kot epwe ükütiu le apwüngüei,
nge an eniwaei esap chüen aniuokusuei.
35 Mürin üpwe kapas, nge üsap niuokusiti Kot.
Nge usun nonomi iei üsap tongeni.”
*9:13: Rahap eman mönün leset mi mwacho o fokun watte lon än ekewe aramasen lom tutulap, a aliosunätä manaman mi ngau.