1 Mürin, ewe Samol mi Lapalap a pälüeni Hiop seni lon ewe mölümöl o apasa,

2 “En iö pwe ka afatangaua ai kapasen öüröür ren kapas esap wor mirit lon?

3 Kopwe ütä o tipeni tipen mwän.

Ngang üpwe aisinuk, nge en kopwe pälüeniei.

4 Ia ka nom ie, lupwen üa föri longolongun fanüfan?

Kopwe üreniei ika ka weweiti.

5 Iö a filätä aükükün ika iö a selipichi?

Ifa usun, ka silei?

6 Met ekewe üren fanüfan ra fot won?

Ika iö a isetiu ewe föün lepwokuku,

7 lupwen ekewe fün lesosor ra kölfengen,

nge nöün Kot kewe chon läng meinisin ra mweireir fän pwapwa?

8 Iö a apüngalong matau lon lenian,

lupwen a puwu seni leutun fanüfan?

9 Ngang ewe mi pwölüela matau ren kuchu

o filiti ngeni rochopwak.

10 Üa aükü kiännin matau

o föri asaman me amwöchün.

11 Üa apasa, ‘Iei ükükün toauom, nge kosap lu seni.

Om kewe no mi pöchökül repwe kaüla ikei.’ ✡Jer 5.22

12 Ifa usun, Hiop, ka fen allük fän eu lon ränin manauom pwe epwe ränila

o aiti ngeni mallen rän lenian,

13 pwe epwe amwöchü lesopun fanüfan

o asupala ekewe aramasangau seni?

14 Saramen akkar a apwäöchü uluulun fanüfan

usun pwäöchün maken impwang won pwülüpar,

a pwä lapalapan usun a pwä lapalapen eu üf.

15 Saramen lerän a kon saram ngeni ekewe aramasangau,

iei mine resap chüen tongeni föri ar föföringau.

16 Ifa usun, ka fen tori ekewe puächen matau

ika ka fetal won epin matau?

17 Ifa usun, eman a fen aküna ngonuk ekewe asamalapen mäla,

ika ka fen küna ekewe asamalapen rochokichin rochopwak?

18 Ifa usun, ka weweiti watten fanüfan?

Kopwe üreniei are ka silei ekei mettoch meinisin.

19 Ia a nom ie ewe al mi alela ngeni ewe lenien saram?

Nge ia a nom ie ewe lenien rochopwak?

20 Ifa usun, ka tongeni emweniir ngeni lenier,

ika ka silei alen lenier?

21 Ewer, en ka silei pwe ierum ra fokun chomong,

pun ka fen uputiu, lupwen fanüfan a fis.

22 Ifa usun, ka fen tolong lon ekewe imwen iseis sno,

ika ka küna ekewe imwen iseis ütten fau?

23 Üa amoleretä fän iten ewe fansoun osukosuk,

ewe fansoun fiu me maun.

24 Ifa alen ewe leni ia saram a tötä me ie pwe epwe tinfeil?

Ika ia ewe asepwälin ötiu a enifeil won fanüfan me ie?

25 Iö a tuw eu warawar fän iten ewe üt mi püngümong

o föri alen ewe inefi fiti chopulap?

26 Iö a apüngätiu üt won eu fanü ia esap wor aramas ie,

won eu fanüapö esap so?

27 Iö a achöchönü ewe fanü mi pwasapwas o pön,

pwe fetil epwe märitä?

28 Ifa usun, a wor semen ewe üt, ika iö a nöünätiu chiin amwurenipwin?

29 Iö inelapen ais, nge iö a nöünätiu sno seni läng?

30 Ekewe koluk ra pöchökülela usun fau,

nge won ewe matau a föüla.

31 Ifa usun, ka tongeni rifengeni selin ewe mwuchiechien fü iter Mweriker,

ika apichi selin ewe fü itan Öniön? ✡Hiop 9.9; Am 5.8

32 Ifa usun, ka tongeni alinga ekewe mwuchiechien fü lon ar fansoun,

ika alinga ekewe fü iter Uwölö me Tämailapen efeng?

33 Ifa usun, ka silei akoten läng?

Ifa usun, ka tongeni anüküchara än Kot nemenem won fanüfan?

34 Ifa usun, ka tongeni kökkötä ngeni ekewe kuchu

pwe püngümongun üt epwe püngütiu womw?

35 Ifa usun, ka tongeni tinala ekewe inefi pwe repwe fiila,

repwe feito reöm o apasa, ‘Äm ikei?’

36 Iö a atolonga tipachem lon letipen aramas,

ika iö a atolonga weweöch lon ar ekiek?

37 Iö a tipachem le aleani ekewe kuchu?

Iö a tongeni äpea ekewe lenien koluk mi nom läng

pwe repwe niitiu won fanüfan,

38 pwe ewe pwül moromor epwe pwakakala,

nge ekewe föün pwül repwe pachfengen?

39 Ifa usun, ka tongeni liapeni ochän ewe laion,

ika amötü ekewe nienifön laion, lupwen ra echik,

40 lupwen ra op lon lenier ika asousoula lon pwanger?

41 Iö a amongöni ekewe ängä, lupwen ra äsfeil ren ar echik,

lupwen apaner kana ra siö ngeniei, pun esap wor ener mongö.