5
Än chon Jerusalem me chon Juta tipis
5.1-31
1 Oupwe akaliwin won ekewe alen Jerusalem,
oupwe nenefetal o katol.
Oupwe ouwasacha ekewe lenien amwicheich,
are oupwe tongeni küna eman chök aramas
mi föri mine a pwüng
o kütta mine a wenechar,
pwe ewe Samol mi Lapalap epwe amusala än chon ei telinimw tipis.
2 Inamwo ika ra apasa, “Mwo manauen ewe Samol mi Lapalap,”
nge ir ra chök akapelmwäl.
3 Ai Samol mi Lapalap, ifa usun, kosap kütta aramas mi wenechar?
En ka niir, nge ir resap mefi riaföü.
Ka afeiengaueer, nge ir resap mochen miritila ren.
Ra tipepöchökül, nge resap fokun mochen ekieksefäl.
4 Mürin üa ekieki, “Ir chök aramas mi kis,
esap wor ar mirit,
pun resap silei letipen ewe Samol mi Lapalap
ika än ar we Kot allük.
5 Üpwe feila ren ekewe aramas tekia
o kapas ngeniir,
pun ir repwe silei letipen ewe Samol mi Lapalap
ika än ar we Kot allük.”
Nge pwal ir resap mochen anomuur fän än ewe Samol mi Lapalap nemenem,
resap pwal mochen aleasochis ngeni.
6 Iei mine eman laion seni ewe wöllap epwe niirela,
eman wolif seni ewe fanüapö epwe afeiengaueer.
Eman manmwacho itan lepart a operi ar kewe telinimw,
epwe atatakisi ekewe aramas mi towu me lor,
pokiten chomongun ar tipis
me watten ar tokola seni Kot.
7 Iei alon ewe Samol mi Lapalap, “Pwota üpwe amusala ämi tipis?
Nöümi kewe ra likitieila
o fel ngeni pwal ekoch kot resap wesewesen Kot.
Ngang üa amongöör tori ra fokun mötüla,
nge ir ra föri föförün lisowu
o feila ren imwen ekewe fin lisowu.
8 Ir ra wewe ngeni oris mi amongööch o sarawarawfetal,
eman me eman a mocheisou ngeni pwülüen chon arun.
9 Ifa usun, üsap apwüngüür pokiten ekei föför?
Ifa usun, üsap ngeni chon ei sokun mwü chappen ar föför?
10 Üpwe tinala chon oputeer ren ar kewe tanipin wain pwe repwe ataela ar kewe irän wain,
nge resap unusen atarela.
Repwe pöküetiu palan kewe,
pun resap ai.
11 Ekewe chon Israel me chon Juta ra fokun kirikiringau ngeniei.
Ngang ewe Samol mi Lapalap üa kapas.”
12 Nöün ewe Samol mi Lapalap aramas ra kapas mwäl usun o üra, “Esap föri och. Esor feiengau epwe feitiu woch, esap pwal torikich maun me lengita. 13 Ekewe soufos ra usun chök asepwäl, esap wor rer än Kot kapas. Iei mine epwe püsin fis ngeniir usun mine ra apasa.”
14 Iei popun ewe Samol mi Lapalap ewe Kot mi Unusen Manaman a apasa, “Pokiten ekewe aramas ra apasa ekei kapas, ngang üpwe föri pwe ai kewe kapas repwe usun chök ekkei me lon awom, nge ir repwe usun chök mwüch. Iwe, ewe ekkei epwe kenirela.” 15 Iei alon ewe Samol mi Lapalap, “Nengeni, üpwe awarato womi ämi chon Israel chon eu mwü mi feito seni toau. Ir chon eu mwü mi pöchökül o nom seni me lomlom, chon eu mwü ämi ousap weweiti ar kapas. 16 Nöür chon esefich ir mwän mi pwora, ra niela aramas, nge resap eäni tong. 17 Repwe enala enemi mongö pwal mine oua kini, o niela nöümi mwän me fefin. Repwe ochei nöümi pwiin sip me kow, pwal uän ämi irän wain me fik. Repwe pwal ataala ämi kewe telinimw mi pöchökül tittir oua eäniir apilükülük.”
18 Iei alon ewe Samol mi Lapalap, “Nge lon ena fansoun üsap pwal unusen arosala nei aramas. 19 Iwe, lupwen ekewe aramas repwe ais, ‘Pwota ewe Samol mi Lapalap ach we Kot a föri ngenikich ekei mettoch meinisin?’, mürin en Jeremaia kopwe üreniir, ‘Usun oua likitala Kot o angang ngeni pwal ekoch koten ekis me lon fanüemi, iei usun ämi oupwe angang ngeni chon ekis me lon eu fanü sap fanüemi.’ 20 Kopwe asile ngeni ekewe mwirimwirin Jakop ei pworaus o aronga ngeni chon Juta: 21 Oupwe rongorong ekei kapas, ämi aramas mi umwes o miritingau. A wor mesemi, nge ousap küna. A wor selingemi, nge ousap rongorong. ✡Ais 6.9-10; Is 12.2; Mark 8.18 22 Ngang ewe Samol mi Lapalap, pwota ousap meninitiei? Pwota ousap chechech me fän mesei? Üa anomu pi pwe kiännin matau, eu epet mi nom fochofoch esap tongeni tö ren sät. Inamwo ika ekewe no ra watte, resap tongeni lu seni ewe kiä, inamwo ika a wor öütöüt, nge esap tongeni atai. ✡Hiop 38.8-11 23 Nge ämi oua lukeni eu leluk mi ülöförea o lükümach, oua kul o feila seniei. 24 Ousap ekieki lon lelukemi, ‘Ousipwe meniniti ewe Samol mi Lapalap ach we Kot, mi fang ngenikich üt lon fansoun öch, mi fang ngenikich ewe ütten lefen me ütten leres o awarato ngenikich ewe fansoun kinikin iteiten ier.’ 25 Ämi kewe föför mi ngau ra atoka senikemi ekei fansoun öch, ämi tipis ra amwöchü senikemi ekei feiöch. 26 Pun aramasangau ra nom lein nei aramas. Ra op usun aramas ra op lupwen ra eseichi machang. Ra föri eu sär pwe repwe liapeni aramas. 27 Usun eu tittin machang a ur ren machang, iei usun imwer kewe ra ur ren pisekin solä. Iei popun a wor maner, ra pisekisekila, 28 ra pwal kitinupula o lükümisimis. Ar föföringau esap wor aükükün. Resap alisi ekewe mi mäsen lon kapwüng pwe repwe win, resap pwal peni ekewe chon mwelele pwe epwe toriir ar pwüüng. 29 Ifa usun, ngang ewe Samol mi Lapalap üsap apwüngüür pokiten ekei föför? Ifa usun, üsap ngeni chon ei sokun mwü chappen ar föför. 30 Och föför mi amairü o aniuokus a fis lon ei fanü: 31 Än ekewe soufos osuni a chofana, nge ekewe souasor ra nemenem fän püsin ar mochen. Nei aramas ra sani an epwe iei usun. Nge met repwe föri lon ewe fansoun sopolan?”