4
Iei alon ewe Samol mi Lapalap, “Are oupwe liwinto, ämi chon Israel, oupwe fokun liwinitiei. Are oupwe atoauala ekewe uluulun anümwäl mi anioput me fän mesei, nge ousap chüen tokola, are oupwe pwon fän akapel itei fän let, pwüng me wenechar, mürin chon ekewe mwü repwe kütta ar feiöch me rei, repwe pwal mwareitiei.” Pun iei alon ewe Samol mi Lapalap ngeni ekewe chon Juta me chon Jerusalem, “Oupwe tuw ewe pwül esamwo tu, nge ousap amworafeili ekewe pwükil lein iräfölüföl. Os 10.12 Ämi chon Juta me chon Jerusalem, oupwe apwönüetä ämi pwon ngeniei, ngang ämi Samol mi Lapalap, o apinikemi fän itei. Are ousap föri ei, ai lingeringer epwe towu usun ngetengeten ekkei, pokiten ekewe föför mi ngau oua föriir. Epwe ngetenget, nge esap wor eman epwe kunuela.”
Kot a apasa pwe ewe fanü Juta epwe tö ren sounfiu
4.5-31
Oupwe asilefeili lon Juta o arongafeili lon Jerusalem,
“Oupwe ettiki ewe rappwa lemenen ewe fanü,
oupwe kökkö fän leüömong o apasa,
‘Ousipwe chufengen o feilong lon ekewe telinimw mi pöchökül tittir.’
Oupwe aüetä eu asisil won ewe al mi ale ngeni Sion,
oupwe süla ngeni eu lenien kinamwe, nge ousap mang.
Pun ewe Samol mi Lapalap epwe awarato feiengau me watten tatakis seni efeng.
 
Usun eman laion a towu seni pwangan,
iei usun ewe chon atai mwü a feiliwu.
A likitala lenian pwe epwe ataela fanüemi,
ämi kewe telinimw repwe tatakisitiu,
pwe resap chüen so.
Pokiten ei oupwe üföüf üf seni tuk, oupwe kechü o ngüngüres.
Pun än ewe Samol mi Lapalap song mi fokun watte
esap säp senikemi.”
Iei alon ewe Samol mi Lapalap, “Lon ena rän leluken ewe king me ekewe nöüwis repwe kisikisila, ekewe souasor repwe rükö, nge ekewe soufos repwe mairü.” 10 Mürin, üa apasa, “Ai Kot, Samol mi Lapalap, ka wesewesen atupu ekei aramasen Jerusalem ren om apasa pwe epwe wor kinamwe, nge efoch ketilas a fen arap ngeni chiorer.”
11 Lon ena fansoun eman epwe üreni ekei aramasen Jerusalem, “Eu asepwäl mi pwichikar epwe enito seni won ungen ekewe chuk mi amassawa me lon ewe fanüapö o eniti ekewe aramas. Ei asepwäl esap fän iten an epwe limeti ekewe föün wiich o ässala pöör, 12 nge epwe eu asepwäl mi fokun pöchökül, epwe enito fän än ewe Samol mi Lapalap allük. Püsin i epwe atowu pwüngün an kapwüng ngeniir.” 13 Nengeni, ewe chon oput a feito usun kuchu, an kewe wokenin maun ra feito usun eu ewiniär, nge nöün kewe oris ra müttir seni ekewe ikel. Feiengauach, pun sipwe tatakis. 14 En Jerusalem, kopwe limeti lelukom seni om föföringau, pwe kopwe manau. Ifa ükükün fansoun an epwe nom lomw om kewe ekiekingau. 15 Chon künö seni Tan pwal seni ekewe chukun Efraim ra asilefeili ewe pworausen afeiengau. 16 Repwe asile ngeni chon ekewe mwü o arongafeili ngeni chon Jerusalem pwe ekewe mwichen sounfiu ra feito seni eu fanü toau. Repwe akkapwas ngeni ekewe telinimwen Juta. 17 Repwe pwelifeili Jerusalem usun chon tümwünü eu tanipi, pokiten an ü ngeniei, iei alon ewe Samol mi Lapalap. 18 Om kewe lapalap me om kewe föför ra awarato ei feiengau womw. Iei popun ka küna apwüng ren, eu apwüng mi fokun aweires. A fokun küw lelukom.
19 Üa fokun riaföü, üa fokun riaföü.
Üa wilikilikiei fän ai cheuch.
Riaföün letipei! Lelukei a fokun mwökütüküt.
Üsap tongeni fanafanala.
Üa rongorong tikin ewe rappwa
mi tik fän iten maun.
20 Feiengau a chök afaün,
unusen ewe fanü a tala.
Imwei kewe imw mangaku ra müttir tatiu,
pwölüpwöli ra kamwetiu lon eu chök otun.
21 Ifa ükükün fansoun ai üpwe chök küna ewe filäiken maun
o rongorong tikin ewe rappwa?
22 Ewe Samol mi Lapalap a apasa, “Nei aramas ra umwes,
resap sileei.
Ra usun chök semirit mi tiparoch,
resap mirit.
Ra sipeöch le föri mine a ngau,
nge resap silei ar repwe föri föför mi öch.”
 
23 Üa nengeni fanüfan pwe a tala o pöön.
Üa netä läng o küna pwe esap wor an saram.
24 Üa nengeni ekewe chuk o küna pwe ra chechech,
ekewe chukutekison meinisin ra mwarorofeil.
25 Üa küna pwe esap wor eman aramas,
pwal ekewe machang meinisin ra süla.
26 Üa küna pwe ewe fanü mi mürina a wiliti eu fanüapö,
nge ekewe telinimwen lon ra tatakisila
pokiten än ewe Samol mi Lapalap song mi fokun watte. 27 Pun iei alon ewe Samol mi Lapalap, “Unusen ewe fanü epwe pönüla, nge üsap ataela unusan.
28 Ren ei fanüfan epwe letipeta,
nge läng epwe cholola.
Pun ngang üa kapas,
nge üsap siwili ai ekiek,
üa apwüngala mine üpwe föri,
nge üsap akasiwili.”
 
29 Aramas meinisin lon ewe fanü ra süla,
lupwen ra rong akürangen ekewe chon wawa oris me ekewe chon esefich.
Ekoch ra sülong lon ekewe wöllap,
ekoch ra töfetal won ekewe achau.
Ekewe telinimw meinisin ra pöön,
esap wor eman a imweimw lor.
30 Nge en, Jerusalem mi feiengau, met ka föri?
Pwota ka üföüf üf mi parochol?
Pwota ka foutei ngonuk fout seni kolt o teikei won mesom?
A solap om alinga inisum.
Noum kewe kamwet ra oputok
o mochen angei manauom.
31 Üa rongorong eu puchör usun puchörun eman fefin mi tori an cheuchen fam,
eu puchör fän riaföü usun puchörün eman fefin mi nöünätiu aemanün nöün.
Üa rongorong puchörün Sion mi ngasalap, a aitiewu pöün o apasa,
“Feiengauei, üa masaroch,
nge chon niela aramas repwe angeala manauei.”

4:3: Os 10.12