1 Chon Israel ra wewe ngeni efoch irän wain mi mwuresires o ua. Lupwen a chomongola uar, ra pwal senätä chomong rongen asor. Lupwen fanüer a öchüla, ra pwal aöchüla ar kewe ür mi pin ra fel ngeni. 2 Leluker a atuputup. Iei repwe angei liwinin ar tipis. Ewe Samol mi Lapalap epwe ataetiu ar kewe rongen asor o ataela ar kewe ür mi pin.

3 Mürin ekewe aramas repwe apasa, “Esap wor ach king, pun sisap niuokusiti ewe Samol mi Lapalap. Nge met eman king epwe tongeni föri fän itach?” 4 Ra chök fos pön o föri pwonen atipeeu fän akapelmwäl. Iei mine pwüng a wiliti pwüngingau, a märitä usun fetil mi poison lon eu mälämäl mi tu. 5 Ekewe chon Samaria repwe niuokus fän äsengesin ewe uluulun nienifön kow mi nom Pet-awen. Repwe letipeta pokitan, nge ekewe souasor mi angang ngeni ewe uluulun anümwäl repwe kechüeiti lingan, pun a oola seniir. 6 Ewer, repwe uweela ewe uluulun anümwäl ngeni Asiria pwe eu lifang ngeni ewe king mi lap. Chon Israel repwe itengau me säw ren ar we uluulun anümwäl. 7 Ewe kingen Samaria epwe maanüla usun taronumo a maanüla won matau. 8 Ekewe lenien fel won ekewe leni tekia mi nom Awen, ewe ia chon Israel ra tipis me ie, repwe tala. Iräfölüföl me pötöwölingau repwe märitä won ar kewe rongen asor. Mürin ekewe aramas repwe üreni ekewe chukutekia, “Oupwe pwölükeemila,” repwe pwal üreni ekewe chukutekison, “Oupwe turutiu wom.” ✡Luk 23.30; Pwär 6.16

9 Iwe, ewe Samol mi Lapalap a apasa, “Chon Israel ra chök sopwela le tipis ngeniei seni ewe fansoun ra tipis me lon Kipea. Iei mine maun epwe tori ekewe chon föföringau me lon Kipea. ✡Souk 19.1-30 10 Lupwen üa mochen apwüngüür, üpwe chök apwüngüür. Chon ekewe mwü repwe chufengen o maun ngeniir, pwe repwe apwüngüür fän iten ar tipis mi chomong.

11 Israel a wewe ngeni eman nienifön kow mi sile angang, a fokun efich ewe angangen wichiwich umwun wiich. Nge iei üpwe uwätä efoch waas won üan mi mürina pwe epwe molotä ngeni angang weires. Juta epwe tuw pwül, nge Israel epwe asosonöchü ewe pwül. 12 Oupwe tuw ämi pwül esamwo tu me mwan. Oupwe amora pwüng fän itemi pwe oupwe kini ewe ua tong ellet. Pun a tori fansoun ämi oupwe kütta ewe Samol mi Lapalap tori epwe war o awarato manau womi. ✡Jer 4.3

13 Nge ämi oua fotuki föföringau o kini föföringau. Oua mongö uän ämi chofana. Pokiten oua eäni apilükülük wämi woken me chomongun nöümi sounfiu, 14 iei mine maun epwe tori nöümi aramas, nge ämi kewe imwen maun mi pöchökül meinisin repwe tala. Epwe usun ewe fansoun Salman a ataela Pet-arpel, lupwen a maun ngeni o atatakisi ekewe inelap fengen me nöür. 15 Iei usun epwe fis ngenikemi, ämi chon Petel, pokiten ämi föföringau mi fokun watte. Lupwen ewe maun epwe popuetä, ewe kingen Israel epwe mäla.”